انماط الشخصية التسعة : اتعرف علي نفسك وشخصيتك

في المقالة هنتكلم عن انماط الشخصية التسعة, تنصنيف الشخصيات و ده بالنسبه للشخصيات السوية الطبيعية مش المرضي النفسيين ، مبيخرجش عن 9 شخصيات.

علم النفس

هقدم مواضيع في علم النفس كل الحجات الي ممكن تكون مبهمة و مش مفهومة لاي شخص عادي مش شرط يكون حد فاهم في المجال و هناقش هوسنا بالأكتئاب وإعتقاداتنا الي أغلبها غلط ناحية الأمراض و الاضطرابات النفسية هيكون فيه كمان موضوعات تنمية بشرية و نحاول سوا نحقق الصحة النفسية السليمة و السلام النفسي الداخلي علي أد منقدر بإذن الله و مشيئته و دعمكم
كنت نزلت أول بوست ليا و قدرا الحمدلله اتمسح مع الجر البوست كان بيتكلم عن تصنيف الشخصيات السوية و اد ايه ممكن تستفاد و هتحقق سلامك الداخلي لو عرفت نوع شخصيتك و قدرت تصلح عيوبك
فهنزل البوست تاني
***********

السلام عليكم
أنا مش أول حد هيقولك أن الانترنت و السوشيال ميديا سلاح ذو حدين و إنك تقدر تستغلها ف حجات كتير مفيدة اولها إنك تزود ثقافتك و ممكن هي الي تستغلك و تخليك بني ادم تافه بس انا عايزة ألفت انتباهك لتشبيه غريب شوية ان السوشيال ميديا او الإنترنت عموما شبه شخصيتك لو وعيت و ادركت عيوبها و ميميزاتها كويس هتقدر تستفاد بأكبر كم ممكن من الإيجابيات الي فيها و تتفادي سلبياتها عشان كدة أول حد سعي انه يفهم نفس البني ادم هو ” سقراط ” الي ركزت فلسفته حول مفهوم “أعرف نفسك” و هو انه يكتشف ذاته و أهدافها و معرفه الأسرار الكامنة وراها ، عشان كدة مهم جدا انك تبقي فاهم شخصيتك عشان تستغل طاقتك دايما في انك تبقي أحسن نسخة ممكن تكونها و تصلح عيوبك علي أد متقدر

تنصنيف الشخصيات و ده بالنسبه للشخصيات السوية الطبيعية مش المرضي النفسيين ، مبيخرجش عن 9 شخصيات مهما بحثت و لقيت أعداد أزيد فهتلاقي كذا شخصية مشتركة في حجات كتير و الزيادة دي مجرد في المصطلحات مش أكتر عشان كدة جمعتلك حتي المصطلحات الزيادة و الي بتدل علي نفس الشخصية ..

انماط الشخصية التسعة

انماط الشخصية التسعة

(1)النوع الاول : (المصلح)

او محب الكمال ده بيكون حكيم و ذكي.
بيحسب كل حاجة الأول كويس قبل مبيعملها و دايما عنده شعور بالمسؤلية و فعلا بيقدر يتحملها.

إيجابي و بيحاول يحل كل المشاكل الي بتقابله سواء تخصه أو تخص غيره.
و ملتزم جدا و دقيق و منضبط في كل حاجه.
عشان طبعا بيحاول دايما يكون مثالي و كامل و مفهوش غلطة لكن الكمال لله وحده طبعا
*سلبياته بقي* : معندوش مرونة في التعامل الي هو دايما كدة صارم و مش بيتكيف علي رد فعل مكنش متوقعه مثلا و دايما بيحب ينتقد و يحكم علي الأشخاص
و الأشياء شبه متسلط يعني 

انماط الشخصية التسعة : النوع التاني : (المساعد)

او محب الغير ده بيحب الي حواليه.
و بيحب دايما يقدم المساعدة طيب و كريم و بيحب يشيل المسؤلية و إجتماعي جدا و بيحب يشارك في اي حاجة و عمره ما بيحس بالغيرة أو الحقد علي حد أحسن منه..

*سلبياته* : إنه حساس جدا فلازم تاخد بالك من كلامك عشان ميتقمصش و بيخدم الي حواليه بستمرار فبالتالي بيأثر في حق نفسه..

النوع التالت : (المنجز)

أو المكافح ده بيكون مجتهد و نشيط و عنده ثقة كبيره ف نفسه
عشان كدة لما بيحط هدف لازم يوصلو بيحب دايما ينافس الي حواليه.
و التحدي دايما بيشجعو يبذل مجهود أكبر

*سلبياته* : بيحب الظهور و انه يكون لافت إنتباه الي حواليه بإنجازاته ، حقود و غيور مبيحبش حد يبقي أنجح منه أو يتميز عنه و ده في الغالب بيكون حافز ليه و بيكون من مدمنين الشغل

النوع الرابع : (المتفرد)

او “الرومانسي” النوع ده بقي الي بيتقاله انت عايش في الlala land.
شايفين ان الحل الأنسب لكل حاجه هو الحب او الارتباط.
بيحسسك ان الدنيا دايما بمبي كدة و سعاد حسني اوي ف نفسه

و بيكون كمان مرهف و حساس جدا بيتأثر بسرعه و كمان ذكي و مبدع.
كتوم جدا مبيحبش حد يعرف حاجه عن حياته ..

*سلبياته* دايما متقلب المزاج و عنده حدة الانفعال الي هو يأما فرحان اوووي يأما بائس و مكتئب معندوش وسط و دايما بيحس ان هو محور حياة الي حواليه و حياتهم بقي هتقف عليه لو غاب

انماط الشخصية التسعة: النوع الخامس : (المفكر)

او الباحث و دول بقي الناس بتوع الover thinking الي بيركزوا في تفاصيل كل حاجه
و يحللوها لحد مبتجيب أجلهم و نادرا لما بيعرفوا يستمتعوا بيوقتهم

مترددين جدا و طبعا بيبقو فضوليين بيحبوا يعرفو أخبار الناس و تفاصيل حياتهم
ماهو طبع بقي بس برضو برغم ده مستقلين بذاتهم و بيحبوا ينعزلوا عن الناس من وقت للتاني
*سلبياته* : بيشك في اي حاجه حواليه سواء شخص او موقف مش سهل يثق في حد و بيحب يتدخل في شخصيات الناس و حياتهم

النوع السادس : (المخلص)

بيكون مخلص لكل الي حواليه مرتبط اوي بعيلته و أصحابه
و دول أهم أولوياته بيعرف يكسب ثقه الناس و شخصيته جد جدا و بيقدر يتحمل المسؤلية و بيساعد الي حواليه..
*سلبياته* : بيكون في أوقات كتير قلقان و بيخاف من المخاطر و مبيحبش يخوض اي مغامرة او يجرب حاجة مختلفة ميكونش عارفها

النوع السابع : (المتحمس)

او محب الحياة ده بقي الي ضارب الحياة صرمة زي ما بيقولو نشيط كدة
و بيحب ينطلق و متفائل بيحاول يستمتع بالحياة بكل الطرق الممكنة و بيكره الملل و الروتين
عشان كدة دايما بيعمل حجات جديدة
و بيخوض مغامرات عشان يكسر الملل ده و بيكون مرن كدة في التعامل مع اي موقف و عفوي في كلامه..
*سلبياته* : متمرد و متهور مش بيفكر في الحاجه الأول هتأذيه و لا لا و بيسرح كتييير

انماط الشخصية التسعة : النوع التامن : (القيادي)

او المتحدي ده بقي بيكون في حياتنا كلنا
و بنعرفو بسهولة عشان دايما بيحاول يبقي هو المسؤل عن كل حاجه
تحسه اتولد عشان يبقي رائد عنده ثقة كبيرة في نفسه و في قدراته.
و دايما بيبقي أد اي مسؤلية و بيقدر يكون قائد مثالي عشان بيبقي حازم في قراراته و قوي و عنده حيل و أفكار كتير بتخليه يوصل لأي حاجة عايزها..
*سلبياته* : مبيحبش حد ينتقدة أبدا و بيحب انه يبقي دايما مسيطر علي الي حواليه و يتحكم فيهم و متهور أحياناً

(9)النوع التاسع : (صانع السلام)

او الوسيط ده بيحب يصلح كل العلاقات عامل زي حمامة السلام كدة موثوق فيه و بيسعي دايما انه يعمل جو ألفه كدة مع الي حواليه و بيحب يندمج معاهم ، متفائل و عنده اصل كدة و بيصون العشرة ..
*سلبياته* : كسول بيحب يأجل كل حاجه و عندي جدا و بيبسط كل حاجة و كل مشكله لحد مبتتعك خالص
-*-*-*-*-*-*-*-*-*-*-*-*-*-*-*-
دة كان أول موضوع في فقرة *A B psychology*
أتمنى أكون قدرت أفيدكم و هيكون في موضوع جديد كل يوم السبت الساعة 5 بإذن الله و مشيئته و دعمكم
و الي حابب يسأل في اي حاجة او يقترح فكرة الموضوع الجي يعمل كومنت و شاركوني طلعتم انهي نوع من الشخصيات 

بواسطة | يارا فتحي

اقرأ ايضاً:

كيفية تعلم الانجليزية من خلال مكتبة السفارة الامريكية
من هو ستيف جوبز مقتطفات من حياته و كتاب عن حياته
تعلم اللغة ألاسبانية للمبتدئين مقدمة من قناة طليق 2020