يارا فتحي

( انتي هرموناتك جوزائيه ) إضطراب ثنائي القطب ، Bipolar الهوس الإكتئابي

قعدوا يقولولك أصل هرموناتي مش مظبوطة و أصل انا برج الجوزاء و نسيو يقلولك إنك مريض نفسي و محتاج تتعالج يا بشا
الاضطراب ده عبارة عن تقلبات مزاجية حادة الي هو انت مش راسيلك على بر شويه فرحان و مفيش حد أدك و ماشي تقول يا أرض اتهدي ما عليكي أدي و حاسس ان الدنيا بمبي و فيها فراشات و شوية مكتئب و حزين و بائس و شايف ان الي جي كله سواد و بتموت جواك و بتبكي علي حالك ميكس كده بين أغاني تامر عاشور و مهرجانات حمو بيكا
بس متخافش أغلب اصلا الي بيصابوا بالمرض ده هم طبقة المبدعين و الناجحين زي عمك صلاح جاهين و أبراهام لنكولن و تشرشل يعني اسمك مع العظماء أفرح 

_طب يعني ايه هو انا كدة خلاص مجنون و لازم اروح لدكتور نفسي ؟!
_ لا يا صاحبي انت حد جميل قبل متحكم علي نفسك بكدة لازم تفهم الأول ايه المرض ده و عبارة عن ايه و امتي احس اني لازم اكشف فعلا و اروح لدكتور !!!

*مبدأيا*:
مرض اضطراب ثنائي القطب “الهوس الاكتئابي” نسبة المرضى المصابين بين حوالي 2,5% من سكان العالم بيعانوا من مرض الهوس الإكتئابي و بييجي في الغالب في أوائل العشرينات و بتقل جدا الأصابة بيه بعد سن ال 40 يعني نادر اوي يبقي عندك كل متعجز اكتر

و بعدين هو أسمه ثنائي القطب عشان عبارة عن نوبتين نوبة الحزن او الاكتئاب ، و نوبه الابتهاج او الهوس
طيب ايه أعراض كل نوبه منهم بقييي ؟!!!

1) لما بتكتئب مثلا : شعور لا متناهي بالتعاسة ، احساس باليأس ، معندكش ثقة ف نفسه ، متوتر زيادة عن الطبيعي مش قادر تركز مش قادر ناخد ابسط القرارات ، بتخسر شغفك للحجات الي دايما كنت بتستمتع بيها ، نومك مقطع بتاكل كتير او مبتاكلش خالص ، بتعيط كتيير فجأة و من غير سبب او عايز تعيط و مش عارف ، بتميل للعزلة و عايز تبقي لوحدك مش عارف تبقي إيجابي و لا يتفائل و الحجات الي كنت بتعملها بسهولة كل يوم متبقاش قادر تعملها و أخيرا بقي و ليس آخراً بتفكر في الانتحار و عندك استعداد تنفذ و دة لازم بقي تروح لدكتور

2) طيب لما بتفرح او بتبتهج و دي اسمها نوبة الهوس “Hypomania” : ده بقي كل الي فات حمادة و كل الي جي حمادة تاني خالص فرامل دماغك بتفك مبيبقاش عندك كنترول علي اي حاجه لو عاجبك واحدة هتروح تتجوزها دلوقتي لو حد دايقك هتضربوا ، فرحان لأقصى درجة ممكنة ، حاسس انك محور الكورة الارضية و مهم جدا و محدش يقدر يعيش من غيرك ، عصبي جداا مع اي حد يعترض علي رأيك او ليه وجهة نطر مختلفة عنك ، عندك افكار جديدة دايما و بتتنقل من فكرة للتانيه بمنتهي السهولة ، بتاخذ قرارات سريعه جدا و مصيريه في نفس الوقت ، مبدع جدا جدا و عندك طاقه فظيعه لدرجه انك ممكن تنام ف اليوم كله ساعتين تلاته و تصحي فايق جداا و نوبة الهوس دي بيفرح بيها المبدعين جدا يعني لو كاتب ممكن يكتب الكتاب كله ف أسبوعين تلاته فطبعا بيبقي إنجاز عظيم لدرجة انه لو مستبصر بمرضة بيستني النوبة دي تجيله عشان يشتغل ، بيتكلم بسرعة و كتييرر لدرجة ان الدكتور النفسي ساعات عشان يتأكد من نوع الاضطراب الي عنده بيعمله اختبار انه يقدر يسكت 3 دقايق بس كاملين و في النوبه دي بقي بيتصرف فلوس بالهببللل يعني تخيل كدة واحدة في النوبه دي ممكن تبيع ممتلكاتها كلها و تصرف فلوسها كلها عشان تشتري فستان عجبها او تسافر يومين بس و لما تفوق بقي ترجع تلطم

• طب انت كدة فهمت ايه بيحصل في الحالتين عندك فضول طبعا تعرف ايه أسباب المرض ده و بييجي ازاي يعني الواحد بيصحي من النوم كدة بيلاقي نفسه مريض بايبولار ؟!!

• لا طبعا هقولك نفس الكلمتين بتوع كل مرض نفسي يأما وراثه يأما اضطرابات كيميائية او جينات او ضغوط إجتماعية و نفسية بس المرض ده بقي بالذات 80% من المصابين بيه بيكون وراثه يعني حد من عيلتهم كان عنده مرض نفسي قبل كدة و طلعوا مخبيين عليك يا منحوس

• علاجه في المقام الأول بالأدوية مش نفسي و بيكون بالليثيوم كنوع من مثبتات المزاج عشان يظبط مستوي الليثيوم في الدم و دة الي بينتج عنه التقلبات المزاجية دي كلها و بيستخدموه الدكاترة من اكتر من 50 سنة و ده طبعا بيكون بأمر من الدكتور عشان متودونيش في داهية

• طب تحمي نفسك من المرض ده ازاي و تثبت مزاجك و تخليه طبيعي كدة مش زجزاج !!

** بص يا سيدي الي هقولهولك ده زي ماهي نصايح تبعدك عن المرض هي برضو العلاج النفسي للمريض ألا و هي :
1) أعرف المرض ده عبارة عن ايه و بييجي ازاي و كدة ثقف نفسك عنه يعني و انا اديتك فكرة عن المرض و طبعت دكتور جوجل موجود
2) أبعد عن الإجهاد المفرط الي يجيبلك اكتئاب او هوس و طبعا بما ان الإجهاد بيجري ورانا فممكن بعد متبذل مجهود كبير تعمل تمارين استرخاء يوجا مثلا
3) لازم يكون في حياتك علي الأقل شخص واحد عارف انك مريض بايبولار و يكون قريب منك و بتقدر تتكلم معاه براحتك
4) لازم تمارس هواياتك او نشاطات لانك لو سيبت نفسك للشغل الكتير الي ورا بعض ممكن يجيلك نوبة هوس فلازم يكون فيه وقت للراحة و الاسترخاء و يكون فيه توازن في حياتك ما بين شغلك و اهتماماتك و عيلتك و أصحابك و هكذا و لو كنت عاطل خد كورسات و اقرأ كتب متسيبش نفسك للفراغ الي يجيب اكتئاب
5) مارس اي رياضة بتحبها لمدة 20 دقيقه و مش اقل من تلت مرات ف الاسبوع و اتأكد انك بتعمل في يومك حجات مسليه و بتحبها عشان انت عارف ان الاكتئاب بيجري ورانا و كدة

• عايزه بقي افهمك معني كلمة اضطراب بما إنك كملت للبوست للاخر
• “الاضطراب” بالبلدي و من الاخر لما بيجيلك بيمنعك انك تمارس حياتك بشكل طبيعي زي ما كنت بتمارسها قبل كدة ، مبتبقاش عارف تتعامل مع الناس زي مانت متعود تعاملهم بتحس ان فيه حاجه غلط و ان ده مش انت و الي حواليك كمان بياخدوا بالهم و يمكن قبلك كمان و لازم ساعتها تروح لدكتور نفسي او اخصائي

طلعت مريض بايبولار ؟!!! إني اسف

• الي عندة اي استفسار عشان انا لخصت البوست علي اد مقدر يسأل في الكومنتس ، و يا جماعه فضلا و ليس أمرا بلاش تشخصوا نفسكم بنفسكم و الي لاحظ الأعراض دي عليه يروح لدكتور نفسي و ميحكمش من دماغه و يبتدي يعامل نفسه علي انه مريض و يوهم نفسه بكدة

قولولي طلعتم مضطربين و لا لا ؟!!
و اقترحوا الموضوع الجي

بواسطة | يارا فتحي

الوسوم

مقالات ذات صلة

زر الذهاب إلى الأعلى
إغلاق
إغلاق