محمود غزلان

ازاي تبدأ في مجال ال pr

= مساء الخير عليك 

فاكرنى ولا لا 

 

 ايوه انا محمود غزلان (وزير ال PR).. والنهارده تانى بوست معانا فى الفقرة بتاعتنا ويعتبر أهم بوست للبداية فى مجال زى ال PR او للبداية بدايه صح فى حياتك بصفة عامة.. 

اغلب الناس لما سالت المرة اللى فاتت الاسبوع اللى فات قالوا 

 

*احنا عايزين نبدأ فى المجال .. ابدأ ازاى ؟!

 

*انا حاسس ان المجال ده ليا بس عايز اعرف ابدأ صح ازاى فيه

 

ده السؤالين الغالبين .. ورغم ان الاجابه بسيطه وقد تكون موحده بس برضه هغطى الاسئلة وندخل فى المفيد على طول بعدها .. 

 

مجال ال PR زى ما قولنا من أكثر المجالات الممتعه والمرهقة في نفس الوقت .. 

 

هتقولى ليه؟! .. 

هقولك لان ببساطه المجال ده محتاج واحد له مزاج فى الشحططه والتنطيط واحد بيحب يدخل فى المعمعة زى ما بيقولوا .. واحد  بيحب يسيب اثر وبصمة واحد بيحب يتعلم من الاخطاء مش بيغلط وبيركن ويقول انا فاشل انا فاشل…

 

*لا.. هو بيفرح بالخطأ عشان بيقول انا اخطأت اذا انا اتعلم حاجه جديده*

 

أهم الصفات التى تميز شخصية ال PR ايه او ايه اهم السمتات اللى بيحتاجها الشخص فى شخصية ال PR عشان يبقى كويس ويطور نفسه ب استمرار؟! 

 

ملحوظة: يومنا دسم النهارده فى ركز معايا كده وهات ورقة وقلم عشان كل بوست هنشرحه هتكتب منها فقرات في كشكولك 

 

يلا نبدأ… 

=====

  • اول حاجه وممكن الكل يستغربها بس هى حقيقه : انه يكون Motivation .. لنفسه ولغيره .. 

 

لأنه يمر بمواقف كتير فى حياته تكسره وتديله طاقة سلبية عمره ما يتخيلها فأنت محتاج يبقى عندك immune system (جهاز مناعى بما اننا فى كلية علوم بقا و كده) هتحتاج مناعه قويه للمواقف دى وهى ال motivation اللى تعتبر المناعة بتاعتك

 

*اصبر بس انت هتشوف العجب فى المجال اصبر 

 

  • تانى حاجه Communicator : متكلم كويس اوى .. 

 

محتاج تكون واحد بيعرف يتعامل مع كل الانواع والاصناف البشريه بتعرف تميز الأسلوب اللى تتكلم وتتعامل بيه مع كل واحد كويس اوى اوى .. 

محتاج انك تكون واحد دارس كويس الأنماط المختلفة وقرأت على الاقل فى ال4 انماط الاساسية للانسان اللى هما ال (القيادى – التحليلى – المعبر – الودود) .. وعندك معلومات كافية من ال16 نمط الشاملين ال هما تبع اختبار 16 Personality.. او ال MBTI test حد سمع عنه قبل كده ولا لا 

 

 هنتطرق للموضوع اكتر فى يوم شرح الانماط ان شاء الله لكن النهارده الفرشه الاساسيه لل PR اللى منها هتعرف انا محتاج ايه عشان ابقى PR فعلا.. 

 

  • تالت حاجه ومن الاهميات جدا جدا : Negotiator مقنع .. 

 

اه انت لو قررت تدخل المجال ده لازم تدرس “علم الاقناع” وانا بقول علم وتدرسه لان انت عشان تقنع شخص .. بتحتاج توصل للعقل الباطن عنده بتدرسه من الاخر (عارف شارلوك هولمز ايوه ان شاء الله هتاخد جزء منه من المجال ده) .. 

مش دايما هتلاقى نفسك مقنع فى تعاملاتك.. بص حواليك كل يوم فى تعاملاتك كده .. 

كام مره النهارده فى  يومك اقنعت حد بحاجه او بفكره ؟! قليل اوى مش كده .. عشان تقنع الناس ب الافكار انت بتحتاج تدرس الناس و عشان تدرس الناس .. ف ده محتاج لنا يوم كامل نشرح فيه ال Negotiation skills وهيحصل ان شاء الله ضمن الفقرة 

 

  • رابع حاجه و هى اللى بتميز اى Instructor واى PR واى شخص فى الدنيا عن التانى : ال Presentation.. 

 

انك تعمل برزينتيشن مش معناه انك تطلع وتحضر للموضوع وتلقى وتقدم محاضرة كأنك فى الكلية بس لا ده كمان بيشمل ال Presentation بتاعك لما تتكلم مع موظفين وعمال ومجموعة شباب مع بعض انت مسلم انك ممكن تتحط فى المواقف دى يعنى هتتحط فيها 

 

ف انت عشان توصل لمستوى برزينتيشن محترم مش محتاج مجرد دراسة بس .. *لا.. انت محتاج تكون نفسك* .. 

يعني ايه اكون نفسى؟! .. يعنى تخلى طريقتك الخاصه هى اللى تميزك .. متقلدش حد .. كريم اسماعيل طريقته بتنفع عشان هو كريم اسماعيل مش عشان طريقته هى الصح المطلق.. عشان كده Be yourself

 

  • واخر واهم حاجه معانا وهى الاهم فيهم من وجهة نظري فعلا واللى لها الأعظم منهم وهناخد لها وقت اكبر نتكلم فيها فى يوم ب تعمق شديده وهى ال Leadership:   

 

القيادة .. ازاى اصلا هيبقا فيا كل اللى فوق دول وانا معنديش القدرة على التحريك والتوجيه .. كللللل اللى فوق ده يندرج تحتها .. كل اللى فوق ده مهم بس الاهم بيهم دى .. ازاى اقنع حد من غير ما اكون مؤثر بطريقتى فى الناس ؟! .. مينفعش…. 

 

عشان كده انك تكون قائد مش بس ب انك تكون صاحب المكان .. لا انت تقدر تكون قائد وانت مجرد عضو صغير فى المكان .. انت تقدر تكون قائد وانت ميمبر فى لجنة من لجان اى تيم بس كله ب عدة ابعاد (اختيار كلماتك – حسن الأسلوب – الرزانه – الهدوء – التحليل – الخ…) هنتطرق فيها باستفاضة اكتر فى يومها بأمر الله 

 

ممكن تقول يا نهار ابيض انا مش افقه اى حاجه فى دول .. انا مينفعش اكون PR  .. هقولك لا طبعا كل ده قابل للتعليم وانا هعلمه لك ان شاء الله 

 

فاضل حاجه اخيره نقولها بما ان الفقرة مرتين بس فى الاسبوع  ف قولت ادام احنا بنتعلم PR ف ليه مديكمش طرف خيط لحاجه حلوه زى دى وتخلينى ادام انا بتعلم PR اروح اجري على النت واتعلم مهارة جديده برضه.. (الصديق الصدوق للPRains هو جوجل واليوتيوب حبهم عشان يحبوك) 

 

طب ايه هى الحاجه اللى عايزنا نتعلمها يا غزلان!!

 

  • عارف دكتور ابراهيم الفقى ؟! 

 

اه اعظم مبرمج في الهندسة اللغوية العصبية واعظم محفز مر على التاريخ .. 

حلو اوى .. اخدت بالك من جملة الهندسة اللغوية العصبية ؟! 

 

عمرك فكرت تبحث عنها فى اى مكان 

 

طيب تعال اقولك قصه عليها :

 

* الساعه 11.30ص …

 

يركب شريف عربة المترو .. العربه ممتلئة .. والتكدس بعض الشيء ..

يدخل شريف العربة ويقف ممسكاً بسقف العربة .. 

 

تتحرك العربة ثم تمر دقائق .. شريف يقف .. وتبدأ عليه علامات عدم الارتياح فى الظهور .. لما عليه تلك العلامات!! 

يبدوا ان شخص ما امامه ينظر الى عينيه بصورة مباشرة ولا يغير ناظريه .. شريف غير مرتاح الى نظراته .. ماذا يفعل ماذا يفعل!! 

 

تذكر شريف أنه قد قرأ فى شيء يطلق عليه الهندسة اللغوية العصبية .. انه اذا اردت ان تعجل شخص يرتبك ويرتجف .. انظر الى حذائه ب استمرار 

 

نعم .. الى الحذاء 

 

قام شريف بلعب الحيلة الذكية ثم نظر الى حذاء الرجل ب استمرار .. فلاحظ ظهور علامات ارتباك وتوتر على الرجل .. انه ينظر الى حذائى .. ماذا به ؟!! ماذا بحذائي يجعله ينظر هكذا .. ظل الرجل مرتبك دقيقة ثم ادار وجهه الناحيه الاخرى وفاز شريف فى الحيله .. 

 

نجح شريف فى تنفيذ خطته ووصلت العربة المحطه التي ينزل بها شريف .. فخرج منها وهو يبتسم *

 

ايه رايك ف الروايه .. انفع راوى 

 

ده مثال مبسط على حيلة من حيل الهندسة اللغوية العصبية…

 

شايف اللى عمله شريف ده .. دى اسمها هندسة لغويه عصبيه : فيه حيل كتير عنها وفيه تعمق اكتر فيها ممكن نتطرق لها هى خصيصا فى يوم لوحدها ونختار مع بعض عايزنها امتى..

 

الهندسة اللغوية هتساعدك فى تحسين حاجات كتير عندك زى (تعاملاتك – تنظيم وقتك – إنجاز مهامك – اختيار نسب الاختيارات فى حياتك …الخ) امور عظيمه تانيه كتير بتحسن حياتك تدريجياً ..

 

وحاجه كمان اتعلمناها من البوست .. ان اى كلمه غريبه وجديده عليا اقرأ فيها وابحث عنها فى جوجل واليوتيوب وابقا ملم عنها زى ما قولت لك مثال دكتور ابراهيم الفقى كان كلمة “هندسة لغوية عصبية” غريبه شويه ف انت تاخدها وتبحث عنها اكتر وتتعمق اكتر واكتر فيها.. 

 

انك تقرر تكون حاجه دى شيء جميل لكن الاجمل انك تثبت بالتعب والشغل انك عايز تكون الحاجه دى .. اتعب فى تطوير نفسك عشان تلاقى كل ده ثمرة علمك وتعليمك لنفسك طول الفتره دى .. 

 

  • وبكده نكون خلصنا بوست النهاردة ب كم كلمات جديدة و معلومات جديدة محطوطه فى البوست ما عليك الا انك تاخد من البوست Copy الكلمه البسيطه دى وتروح على جوجل الجميل بتاعنا وتبحث عنها وتقرأ كتير اقرأ كتير اوى اوى .. اتفرج على فيديوز كتير .. عقلك اغلى حاجه عندك استغل ده ونميه اكتر واكتر استثمر فى عقلك .. مش فى بطنك 

 

اللى هيميزك فى المجال ده عن اى PR تانى هى مهاراتك .. انك تكون مميز بيها يعنى انك تكون خبره فيها .. مش بس خبرة تعليم من غير تمرس .. لا اتعلم وانزل مارس وجرب بنفسك ال PR (Public relations) العلاقات العامة .. مش بتثبت الا بالممارسه والاستمرارية..

 

دول كانوا أهم 5 اعمده محتاجهم فى البى ار في البداية .. وكمان معاهم الهندسة اللغوية العصبية اللى هى من اهم الامور اللى محتاج تدرسها .. 

 

المهمة بتاعتك بقى يا بطل ال PR بعد ما خلصت البوست  (انك هتسيب كومنت ب اختيارك ضمن الامور اللى اتكلمنا فيها فوق دى عشان على حسب الاختيار الغالب هنتكلم المرة الجايه باستفاضة اكتر واكتر عنهم + لو عندك اى سؤال سيبه برضه هكون مبسوط بيه 

ولو عندك اى اضافة قولها هكون سعيد بيها اكتر واكتر )

 

واستنا ان شاء الله الاسبوع الجاي يوم الاثنين الساعه 9 م مع بوست جديد وحاجة جديدة بإذن الله هنتعلم مع بعض واحده واحده 

 

لو فاتك البوست اللى فات اطلبه فى كومنت .. لو عجبتك الفكرة ابدي رايك فيها ب الاستمرارية .. لو عندك اى سؤال سيبه .. 

 

وبكده اكون خلصت وفاضل انت والكومنت بتاعك اللى اختارت فيه الحاجه اللى حابب نتكلم فيها عن اللى فوق والشير والمنشن بتاعك لصاحبك المهتم بال PR وقوله الوزير رجع يتكلم فى ال PR تانى

 

  • ملحوظه : اللى لسه ماخدش الداتا بتاعت البوست اللى فات يسيب كومنت برضه

كتبه | محمود غزلان

 

 

 

مقالات ذات صلة

شاهد أيضاً
إغلاق
زر الذهاب إلى الأعلى
إغلاق
إغلاق