قصه وزير ال PR

= رحلتى من الانطوائية الى شبح الكلام الجميل بس فى المفيد او زى ما بيسمونى #وزير ال PR .. 

 

الى الان معرفش مين سمانى باللقب ده الحقيقه بس انا ممتن له واتمنى اكون قد الثقه دى..

انا النهاردة مش هتكلم عن الفقرة بتاعتي..

=======================

انا حابب احكي لكم قصة صغيرة.. (هو ممكن مكونش بعمل حاجه ضخمه لسه بس انا فخور باللي بعمله وبمدى تاثيره فى الغير)

معلش بقى استحملونى  .. ويشرفنى ان كل واحد يوصل ل هنا انه يقرأ للاخر  .. 

 

انا حابب اعرفكم بنفسي 

انا محمود غزلان (وزير ال PR)

 

تجربتى البسيطه جدا اللى حاليا انا فيها 21 سنة…

 

 حاليا انا فين ؟!

= انا Public relations Specialist فى شركة من الشركات الجميله جدا وكمان شغال استشارى علاقات عامه وتسويق فريلانسرينج وانا لسه فى رابعة كلية (وللعلم انا كلية علوم) -جامعة الازهر- يعنى انا بعيد جدا عن مجالى انا شفت كارير زى ما بيقولوا 

 

لازم فى حياة اى انسان تلاقى نقطة تحول (يوم معين تاريخ محدد وقت ما اتغير فيه) .. من الافضل للاسوأ او من الأسوأ للافضل .. على حسب الشخص .. ف انا نقطة التحول بتاعتى كانت ثانوى .. فى فترة ثانوى كان والدى عنده محل عطور .. كنت بروح اشتغل فيه واتعامل مع زباين وغيره ومن هنا بدأت اترتبط بالعملاء.. الكلام ده كان فى 1 و 2 ثانوى .. طبعا كان اسلوبى وحش شوية مع الزباين (كنت اوقات مش بعرف اتعامل واتكلم من مناخيرى ومفيش زوق خالص).. بس اكتسبت شوية مهارات فى ال Sales منه .. مكنتش بحب اروح المحل كنت مزهق والدى شوية معايا 

 

المهم جت فترة تالتة ثانوى وبداية الدروس والايام بتمر بتمر ويأتى يوم كان فاصل مهم فى حياتى يوم 30-7-2015 ..

 

اليوم اللى جالى فيه خبر وفاة والدى .. (نقطة التحول)

لسه فاكر لحد دلوقتى التفاصيل بتاعت اليوم ده كله…

 

بتمر الايام ضغط الثانوية بيزيد عليا ضغط نفسي زياده يزيد عليا بسبب الوفاة .. بس مستسلمتش ولا نخيت ولا قولت لا انا هأجل احسن السنه دى عشان اعرف اركز السنه الجايه .. 

 

لا دخلت وبقلب جامد وكنت بطلع مطمن انى مش هنزل عن 94% وادخل اسنان ان شاء الله .. (الكلية اللى بحبها) -ثانويه ازهريه-

عدت الايام وجت فترة النتيجه .. كام يا محمود .. 87.3% .. يا نهار ابيض.. علوم زى اخواتك!! (ملحوظة اخواتى الاتنين خريجى علوم برضه) .. بعد التعب ده كله تجيب علوم!! 

 

عدت الايام .. التنسيق جاب لى علوم ازهر القاهره .. قسم ايه ؟! قسم فيزياء ورياضة..

كمان…. يعنى مش هدخل حتى القسم اللى اثبت فيه نفسي .. قولت لنفسي لا انا هعمل التماس .. على كام درجة يا محمود ؟! على 6 درجات .. 

 

*الشؤون* لا الالتماس بتاعك مش هيتقبل حول أسيوط افضل لك..

(كان ملازمنى حاجه واحده بس هى جملة -الحمد لله-) .. خير خير .. احول أسيوط الكترونى.. 

*الشؤون* التحويل الالكترونى اتقفل .. متاح لك تاخد ملفك وتحول ورقى بنفسك .. يعنى هسافر أسيوط .. 

ربنا كان بيختبر الواحد تقريبا وبيختبر مدى صبره.. سافرت أسيوط وكان معايا اخويا..

 

قدمت الورق .. الدراسة هتبدأ امتى ؟! .. 

تبدأ ايه يا ابنى الدراسة بدات من اسبوعين وصحابك بدأوا فى الاقسام واخدوا سكاشن أجرى على مدرجك… 

فلاش سريييع كده .. من الجرى على المدرجات والسكاشن والبهدله.. بعد شهر ونص شوفت اعلان عن تيم تطوعى اسمه MOIC .. عجبنى اوى الاسم وعجبنى اكتر افهم اي التطوع ده (اول مره اجرب ادخل حاجه مشابهة) .. حبيت اخوض التجربه (لازم من وقت للتانى تخوض التجارب وتجرب كل حاجه غريبه عليك) .. روحت عملت الانترفيو .. واتقبلت (الجزء ده اخويا الى الان ميعرفهوش 😀 .. رغم أنه كان معايا طول السنه لكنى كنت متحفظ بيه لنفسي عشان كان بيقولى متضيعش وقتك فى حاجات زى دى انا بدأت مسيرة التطوع فى اولى كليه ولو قريت الكلام ده يا محمد ف اعرف ان اخوك كان أسد وكان واخدها جد  ) ..

 

التطوع بتاعى كان فى لجنة الـ HR (امال ايه حببنى فى ال PR ؟!).. عمرى ما كنت افهم لا يعنى ايه تطوع ولا بحب اتعامل مع الناس (فاكرين معاملتى مع الزباين) .. ولا اجتماعى .. كنت انطوائي لابعد الحدود .. كنت ببقا متكتف على نفسي

 

بدأت فى التيم اتعامل مع الناس واشوف الطبيعة بتاعتهم ورغم انى كنت لسه فى اولى كليه يعنى المفروض جى سخن على الكليه الا انى كنت مختار انى لازم اغير من نفسي للاحسن واخد خطوه صح فى حياتى .. يعنى الكليه لو راحت انا الاقى نفسي..

 

وفعلا غيرت وبدأت اركز اكتر على تنمية مهاراتي الشخصية .. روحت حضرت ندوة كانت بتتكلم عن كتابة السيرة الذاتية Cv

 

مع اول اجازة ليا بعد وجودى شهرين فى اسيوط نزلت البيت اخدت ال Cv بتاع اخويا الكبير وقلدته بالظبط وعملت واحد مشابه له بالظبط .. كان فاضي بس كان انجاز عظيم ليا .. اول شهادة في التطوع اخدتها كانت انجاز عظيم بالنسبة لتغيري .. 

 

عدت اولى كلية وجبت فيها 84% (كان فاضلى 1%) و اجيب امتياز (كنت دحيح اوى ماشاء الله ) وكمان اتطوعت وخرجت بره حيز الانطوائيه وبقيت اعرف اتعامل واكون علاقات وبقيت احسن وافضل .. بقيت احب اتنطط .. 

 

جه وقت التحويل للقاهرة بقا .. حولت القاهرة ودخلت القسم اللى انا عايزه .. (كلية علوم جامعة الازهر القاهرة) .. وفى القاهره بقا تزايد التنطيط في الأعمال التطوعية .. ما بين تيمات فى الجامعه عندى (اتطوعت فى عدد لا يحصى من التيمات)  وايفنتات بره الجامعه تيمات بره الجامعه ورسالة وزيارات لجمعية رسالة.. وزيارات لمستشفى 57357…

 

وهوب جت فرصه صغيره.. حضرت مؤتمر دولى للتحاليل الطبية وتشخيص الأمراض .. حبيت مجال التنظيم فى المؤتمرات والكلام ده.. قولت لازم اقدم مع التيم اللى نظم المؤتمر ده السنه الجايه… 

 

وفعلا حصل وقدمت معاهم وكنت ماسك بوزيشن هايل Head of organisation committee in Cairo (كنت انا اللى ماسك محافظة القاهرة كلها تنظيم وتخطيط وإدارة للمؤتمر) .. وبعده طبعا اثبت شغل والاكاديمية دى كانت عايزانى اشتغل معاهم بس انا محبيتش اشتغل انا حبيت ابقى حر واتحرك واساعد الناس اكتر بالتريننج اللى كنت بنزلها وادرب تيمات وغيره

 

كنت بحب التنطيط اوى مشاوير من مدينه نصر لعين شمس وتجارب وتعاملات وادخل جامعات كتير واتعرف على دكاتره محترمين ناس عظيمة في مجالاتهم 

 

تدريجى تدريجى فى نهاية تانية كلية بدأ صحابى يتكلموا معايا عن التطوع وازاى نستفيد منه وانا احكى لهم فوايده وازاي بيساعدنا نتأهل للسوق وافهمهم واربطه بالمجال بتاعنا بعد التخرج (الميديكال ريب) اللى كان بسمع لشخص ممتاز جدا جدا فى المجال ده وهو دكتور ابراهيم عبد الواحد اللى بعد فتره قررت ارد له الجميل

 

توالى بعد كده التطوعات فى تيمات كتيررررررر اوى اوى فى الازهر وبره الازهر انا نفسى مش متذكر كم التيمات التطوعية اللى كنت فيها.. كنت بتنطط وعينك ما تشوف الا النور Head لجنة على Vice Head علي Member على Delegate .. وغيره وغيره كتير.. كنت بشرح للناس اللى فى اللجان وأعلمهم اكتر و اتعمق اكتر في المجالات وادور على اليوتيوب واعلم نفسى…

 

عدت الفترة دى لقيت صحابى بيجوا يسالونى على التطوع ونعمل ايه ونجهز للدنيا ازاى وأمور مشابهة لكده ودردشه مع ناس صحابى فى امور مختلفة وبيقولوا لى غزلان احنا عايزين نعمل تيم تطوعى نساعد بيه الشباب الصغير .. يالا نحط الخطه ونشوف الدنيا هتمشى ازاى وكلنا مع بعض .. 

 

بدانا انا وصحابى نخطط ونقرر وفى اجازة تالته عملنا التيم على الواتس وبعدها عملنا بيدج وبعدها عملنا (Recruitment) كان حصل شوية سقطات وعقبات بس ده طبيعى جدا يحصل .. بس بدات الدنيا تتحسن تانى وبدات الدنيا تمشي افضل وبتخطيط افضل .. 

 

التيم اتعمل والناس موجودة .. حطينا خطة تدريب والدنيا تمام التيم كله اتدرب .. يوم 29-11-2018 .. كان اول ايفنت للتيم وكسر الدنيا فى الجامعه عندنا وفيه رديت الجميل لناس غالين عليا زى دكتور ابراهيم عبد الواحد و دكتورتي فاتن الفقى وكانوا اسبيكرز فى الايفنت.. Ebrahim Abd Elwahed Faten Elfeky

 

عدت الأيام وتتابع نجاحات التيم وعملنا اول سلسلة ورش عمل لمدة شهر متواصل لتعليم الطلبة سوق العمل بسعر رمزى متناهى الصغر .. (غطي اجر القاعة والاسبيكرز)..

 

تمر الايام واستمر فى تحقيق هدفى اللى دايما كنت بسعى له .. 

 

*محو مصطلح السبوبه من حياتنا*.. كنت بدرس فى الوقت ده بالكورسات الاونلاين وغيرها من الايفنتات اللى بحضرها مجال ال PR العلاقات العامه

 

بدأت اركز اكتر على المجال ومدى انه مجال مهدور حقه ومحدش بيقدره ولا يقدر فايدته .. 

 

بدأت اقرر انى انمى نفسي بنفسي (ذاتى من النت اخدت كمية كورسات أونلاين لا تعد ولا تحصي وكنت بلف حولين الكورسات اللى بفلوس عشان اخدها ب اى طريقة مجانا او الاقى لها كوبون ولو ملقيتش بشتريه عشان اخده) .. 

 

نزلت ترينر للمجال فى التيم عندى ضمن الورش اللى كانت معموله لمدة شهر وعلمت فوق ال40 شخص عن المجال ده كل حاجه انا اتعلمتها وفهمتها .. 

 

جت الاجازة بدات ازود نفسى واعمل جروبات واتس واعلم ناس جديده البى ار وعملت السنه دى اكبر جروب بى ار على الفيس ضامم حاليا 800 فرد .. 

 

اتعلموا كلهم بى ار بصوره ممتازه .. وعملت 5 راوند واتس اب تعليم برضه مجال ال بى ار .. كل راوند 50 فرد .. وصل العدد الى الان اكتر من 1000 شخص اتعلموا بى ار وفهموا مدى ارتباط المجال بحياتهم وانه مش كلام مرسل وإنه مش سبوبة يتعمل منها كورس ب 1500 او 3000 او غيره زى ما كنت بقرأ الاسعار وبتصعق لما اقرأ المحتوى والاقيه اللى انا بقدمه مجانى هو هو اللى بيتقدم ب فلوس.. 

 

انا قررت امحى فكرة ان الانسان ميقدرش يعلم نفسه بنفسه محيت فكرة التسويف .. محيت فكرة السبوبه وان كل حاجه لازم لها مقابل .. انا المقابل عندى دعوة صادقة لوجه الله .. 

 

عدت الايام واشتغلت فى المجال بجد (مش تطوع بقا) .. مسكت مشروع لشركة طلبوا منى ترتيب خطه ممنهجه للتدريب فى الشركه .. وتمت الحمد لله .. 

 

طلبوني في ايفنتات كتير خلال الفترة الاخيرة ك Speaker وناس عرضوا افكار مشاريع عليا لكن للاسف اغلبهم كنت بعتذر لهم لان المواعيد مش متناسبة معايا فيهم واخرهم كان ايفنت في أسوان وكان كل شيئ مجهز الحجز وكل حاجه لكن اعتذرت  قبلها بفترة بسبب التزاماتى لكن انا عند وعدى بكل حاجه انا مقرر اساعد اكبر عدد ممكن بشرط انى امحى مصطلح السبوبه من حياتنا.. وهعمل كده بإذن الله

 

حاليا انا مسؤول علاقات عامة في شركة وانا لسه طالب فى رابعه كليه…

 

وقريب ان شاء الله هيكون فيه شغل تانى مع العزيز عليا (وزير الشغل)  Daly Abd-ElNaby زى ما اتفقنا وان شاء الله نقدر نمحى مفهوم السبوبه فعلا من حياتنا عموما و نوصل لمرحلة اننا نكون ذي أثر في حياة الناس حولينا .. 

 

وحاليا انا مقرر اكمل الافادة دى و اعلم و افهم واعرف الناس ان مفيش حاجة اسمها فشل انا طالب لسه فى رابعة كلية شغال حاليا فى تلات حاجات .. ما بين فريلانسرينج وشركة وكمان ماسك 2 تيم تطوعي.. ده غير الاماكن اللى بتتعرض عليا لكن للاسف الضغط بيفرض عليا انى ادى كل مكان حقه فقط

 

اى حد عايز يكون اى حاجه يقدر يكون اى حاجه .. وعمرى ما انسا الكلمتين اللى حسام هيكل قالهم فى ايفنت من الايفنتات اللى حضرتهم له (الكورسات والايفنتات والكلام ده كله جميل بس مفيش اجمل من انك تنزل كده فى الشغل تاخد لك قلمين على كام شلوت تتعلم منهم صح الصنعة) 

 

وانا قررت انى اعلم وافيد وانا فى مكانى و اكمل الهدف بتاعى من تعليمى لغيرى وانى افهمهم يعنى ايه سعى .. 

 

بعتذر على الاطالة .. طبعا قصتي بسيطه جدا وسط الشخصيات العظيمة فى الجروب لكنى كنت حابب احكيها .. وهختم بالهاشتاج بتاعى اللى مصاحبنى فى حياتى كلها القصيره دى ( #السعي_حلو ) .. 

 

نفسك انت اللى بتختار عايزها تكون عامله ازاى. ومكمل بإذن الله فى مسارى وناوى أعلم الناس يعنى ايه تعليم ذاتي ويعنى ايه اصلا تطور نفسك وتأهل نفسك وناوى اكتر ارجع حق العلاقات العامة ومدى اهميتها.. وناوى فى الفقرة بتاعتي انى اخليها مرحله فاصله لكل واحد فى حياته

 

اختار انت عايز تكون ايه فى حياتك .. قيمة ولا بلا قيمة …

 

ولكل واحد بيقول عليا (وزير الPR) صدقا انا نفسى اكون عند ثقتك فيا دى جدا .. واخد ب ايدكم واساعدكم فى كل حاجه وانا حطيت نفسي فى الريسك ده عشان يوم ما دخلت الكليه ملقيتش حد يقولى الخطوط العريضة دى 

 

عايز اشكر كل الناس اللى بتقدر بجد .. انا بشكركم جميعا وبإذن الله ناوى اكون قد الثقه العاليه دى 

 

عذرا على الإطالة رغم ان الافعال اللى عملتها مش كبيره اوووى بس اللى واثق منه ان فيا طاقة اساعد بيها مصر كلها ان شاء الله (بس كده هو ده انجازاتى فى الحياة الى الان والحقيقه مش بحب اذكر شهادات اخدتها او كده لان مفيش اكتر من الورق عندى .. لكن انا مؤمن بأن التعليم مش ب ورقة الشهادة .. التعليم بالممارسة والفهم) .. 

= واخيرا اى حاجه محتاجها سيبها فى كومنت اى حاجه عايز تتعلمها سيبها فى كومنت بأمر الله ربنا هيقدرنى واساعدك فيها.. اطلب منى اساعدك ازاى 

دمتم بخير..  

 

كتبه | محمود غزلان