أندرو أشرف يتحدث عن نفسه …

أندرو أشرف| Andrew Ashraf

انا اسمي اندرو اشرف
عندي ٢٤ سنة حالياً – السن متحدث وقت شير البوست
ابتديت حياتي من و انا عندي 16 سنة اشتغلت فترة كبيرة علي الانترنت
اشتغلت بتاع كومنتات
كنت بعمل كومنتات في المنتديات و كنت باخد في الشهر من الموضوع ده تقريبا كمان بعد فترة كبيرة بتاع حوالي 10 جنيه في الشهر .
و بعد كدة كان فيه كمية ضغط من اهلي علي اني لازم ابقي كويس و انجح و كدة فجيت في يوم ذاكرت الفوتوشوب من العظيم Mostafa Makram كان ساعتها اتعلم الفوتوشوب في 24 ساعة و طبقت 3 ايام لحدت ما خلصت الكورس بتاع 4 مرات و اجرب و اجرب و بقيت بقلد شغل قدامي لحد ما اشتغلت مصمم جرافيك بــ 100 جنيه في الشهر .
و بعد كدة دخلت ثانوية عامة اصعب فترة عالية ذاكرت فيها كويس بس و التنسيق سوحني شويتين تلاتة و لكن الحمدلله
بعدها اشتغلت في شركة 12 ساعة كنت بقبض 400 جنيه !! كنت بشتغل IT و مكنش ليا مكتب و لا اي حاجة و بعد كدة بقيت ماسك IT في الشركة كلها و شاركت صاحب الشركة وفضلت شغال 7 شهور مش باخد مرتب انا حابب انه يكون عندي شركة و كدة و الجزء التاني من اليوم كنت بتشتغل في بنزينة عشان اقدر يخشلي دخل و شوية اروح الشركة دي و انزل برنامج و اخد 200 جنيه و امشي و حااجات كدة .
و الحمدلله حققنا نجاح كبير في الشركة و لكن لخبرتي القليلة صفيت و مشيت و رجعت ابتدي من الصفر تاني
فترة بقي التدريب و الكورسات و المعافرة عشان اتعلم بزنس صح :
اول حاجة كنت بذاكر كورسات كتير اووي اونلاين و و تقريباً ضيعت فلوسي عليها فكنت محتاج فلوس طبعاً فاشتغلت Sales في العقارات و الTime Share و مجالات تانية كتير و كنت Top Achiever في كل مجال اشتغلت فيه و بعد كدة قررت اركز اكتر في اني اذاكر بزنس
فوصلت اني حصلت علي دبلومة في البزنس من جامعة Harvard و معايا دبلومة في تطوير مجالات العمل من جامعة Oxford ( كلهم منح ) .
و بعد كدة ابتديت اشتغل في العمل المجتمعي و دي اكتر حاجة ساعدتني في حياتي اني اكبر في سنة ٢٠١٥ دربت ١٥ الف شاب علي مستوي الجامعات المصرية ووصلوا في ٢٠١٧ ل١٠٠ الف شخص بمختلف الاعمار و في سنة ٢٠١٦ كنت سبب في ان اكتر من ٥٠٠٠ شخص يشتغلوا في جميع المجالات و لسة مكمل و الحمدلله حتى الان في ٢٠١٧ بقوا ٣٢ الف شخص .
و في اول 2018 الحمدلله تعاونت مع دار دَوِّن للنشر والتوزيع Dawen Publishers الجمال جداً و قمت بتأليف كتاب اسمه ” سفير الشغل ” موجود في كل المكتبات و الهدف منه اني اوضح و افتح نقاط مهمة للشباب اللي حابب يشتغل في مصر حالياً يفكر فيها و فيه كتاب هنزله السنة الجاية ان شاء الله بتكلم علي الذكاء المالي و ازاي تعمل ثروة او تتربح و تحصل علي مصادر للدخل ” الدخل السلبي و الغير سلبي ”
طيب انا مين دلوقتي و بعمل ايه و ناوي اعمل ايه :
1- انا اسمي المعروف سفير الشغل و دي ليه نشاط مجتمعي هو اني اساعد الناس انها تشتغل و عندي كم فكرة في الموضوع شغال عليهم من تدريبات و ورش و كورسات اونلاين و شراكات الفترة الجاية مع Wuzzuf و Forasna – فرصنا – وظائف مصر و اي شركة تساعدني في تحقيق النشاط المجتمعي ده .
2- عندي شركة بيع و توريد الاثاث المنزل بكافة انواعه و ان شاء الله في خلال 3 السنوات القادمة تسمعوا عننا في مصر كلها .
3- عندي شركة اسمها Think Business و دي بنساعد فيها الشباب و الشركات الصغيرة و المتوسطة و الكبيرة انها تعمل الWebsite اللي بيحلموا بيه باسعار تنافسية و بكل احترافية و الحمدلله عندنا سابقة اعمال كويسة جداً .
4- عندي شركة اسمها المستثمر المصري و دي شركة تطوير عقاري و الحمدلله عندنا سابقة اعمال كويسة بحكم تنفيذنا باكتر من منطقة و الفترة الجاية ( قريباً جداً ) هنطرح مشاريع استثمارية و وحدات بنص التكلفة ان شاء الله .
5- عندي فكرة اسمها الفرص فين و دي الحمدلله تم تفعيل الانشطة بتاعتها من اول 2019 بشكل فعلي و الحمدلله ربنا وفقنا في 4 مشاريع اهمهم مشروع المطعم الجديد ” طاسة اند جبنة ” و ان شاء الله نكسر الدنيا و تسمعوا عننا في مصر كلها و نعمل فروع و نفرحكم باكلنا و جودته و سعره المناسب للفئات الاكثر استهلاكاً في مصر للأكل و الفرص فين هدفها توحيد الشباب علي انشاء مشاريع و هي الي بتدريها و بتضمن نجاحها فانهم يسيبوا حياتهم البائسة في الوظائف الثابتة و يتجهوا الي انهم يفتحوا مشاريع تعود عليها بالدخل المناسب و النجاح المرجو .
6- بدرب في شركات كتيرة جداً Sales و Business Development و Marketing و بحاول ارفع معدل نمو الشركة في الاقسام بدي بنسبة 30% سنوياً و الحمدلله حققت ده مع اكتر من شركة .
في النهاية حابب اقول انك لما تتعب فهتلاقي بس المهم انت لازم تبقي عارف انت بتتعب ليه و عاوز ايه في الاخر ! عشان تقدر تحقق نتائج و الاهم يكون عندك قدر كافي من المرونة في تقبل اي شئ دون الاخلال بمبادئك الشخصية والي اتربيت عليها .
ربنا يوفقكم و يوفقني
و خلينا متفقين علي اكثر من نقطة
1- ” خليك بات مان ”
انك لازم توسع الافق الخاصة بيك في حلمك لانه نفس المجهود اللي هتاخده عشان تحقق حلم صغير هو نفس المجهود اللي هتاخده عشان تحقق حلم كبير .
2- كلما زادت مرونتك كشخص في افكارك و قراراتك زادت قدرتك علي الوصول إلي اعلى قدر من الادراك و النجاح و الاحترافية .
3- ” كل ما اقدر اساعد او اسعد حد هعمل كدة ”
الخير و مساعدة الناس شئ عظيم جداً ساعد علي قد ما تقدر و علي قد وقتك المتاح عشان تحافظ علي استمراريتك في المساعدة و الي يعمل خير لازم يلاقيه .
4- ” متحدين نقف متفرقين نسقط ” جملة الجميل احمد الشقيري .
انا عندي اقتناع كامل ان بلدنا دي فيها خير غير طبيعي و فيه شغل كويس جداً لكن المشكلة اننا مش بنتحد علي اننا ننجح دايماً بنحاول نوقع نفسنا لكن لو اتحدنا علي الوصول لاننا نكون مؤثرين و فعلاً نبقي حاجة محترمة هتفرق كتير اووي معانا.

كتب بواسطة | هشام أحمد