طريقة تعيين مدرسي الإنجليزي ..

طريقة تعيين مدرسي الإنجليزي بتختلف شوية عن باقي الوظايف التانية، الموضوع مش بس تقديم الـ CV وإنك تعدي من الانترفيو، خليني أوضّح لك الـ typical steps إللي هتعدي بيها عشان تشتغل في المجال ده، مع العلم إنها ممكن تختلف شوية من مكان للتاني.

“CV”
الموضوع بيبدأ بإنك تكون مجهّز الـ CV بتاعك وتشوف الفرص المناسبة ليك في مدرسة أو جامعة أو معهد أو مركز كورسات أو حضانة، طبعاً بتكون كاتب في الـ CV ورش العمل والكورسات إللي حضرتها في مجال الـ TEFL عشان توضّح إنك مهتم بالـ professional development لنفسك.

Phone Interview
لو الـ CV بتاعك كان مناسب للي بيدوّروا عليه، غالباً مش هيبعتوا لك للانترفيو على طول، بيحصل الأول phone interview عشان يسمعوا نطقك للإنجليزي، دي مهارة أساسية بالنسبة لمدرس الإنجليزي، فـ بدل ما يدعيك للانترفيو وبعدين يلاقي مستوى اللغة مش مناسب، بيتأكّد من النقطة دي في التليفون الأول.

Offline Interview
بعد ما تعدي من الـ phone interview بيتم تحديد ميعاد للانترفيو، وده في أغلب الأوقات بيكون انترفيو عادي ممكن يسألك في حاجات ليها علاقة بالكورسات إللي أخدتها وخبراتك في الأماكن إللي اشتغلت فيها قبل كده، ومواقف ليها علاقة بالـ teaching methodologies والـ classroom management.

Written Exam
بعد الانترفيو أحياناً بيكون في امتحان، بس ده مش بيحصل في كل الأماكن، امتحان على مهارات التدريس، وطبعاً بيكون بالإنجليزي عشان يقيس مستوى اللغة بالمرة.

Demo
الخطوة دي هي أهم خطوة في الـ hiring process كلها، بتحضّر درس صغير بين 10 دقايق وربع ساعة وبتشرحه أدام مجموعة من المدرسين في المدرسة والـ department supervisor. بتمثّل إنك بتشرح لهم وهم بيمثّلوا إنهم طلبة طبعاً بيتعمّدوا يعملوا مواقف مختلفة معاك عشان يعرفوا رد فعلك وتعاملك هيكون إزاي، نطق غلط، مقاطعة في وسط الكلام، النوم أثناء الشرح، الاعتراض على حاجة بتقولها، الإجابة غلط على سؤال أنت طرحته… حاجات مختلفة ممكن تلاقيها في الـ demo.

لو عديت من الـ demo يبقى مبارك عليك يا بطل هتشتغل في المكان ده إن شاء الله. في أغلب الأماكن مش بتمضي عقد تعيين على طول، بيكون في فترة ملاحظة under probation لمدة كام شهر للتأكّد من مهاراتك وتعاملك مع الطلبة والـ feedback عليك، بعد ما تعدي الفترة دي بيتم التعيين الرسمي.

لو عندك أي استفسار في مجال تدريس الإنجليزي اكتب لي في التعليقات.