يارا فتحي

انا مش كئيب انا مكتئب !

1) ” *أنا مش كئيب أنا مكتئب* ”
بنسمعها كتير و اغلبنا بيقولها إفيه بس تيجي نحللها من منظور سيكلوجي بحت ؟!
*الفرق بين الاضطراب الشخصي و النفسي*

• لو *كئيب* فأنت يا معلم عندك نوع من اضطرابات الشخصية زي انك بتميل للعزلة و الانطوائية و الحجات الحزينه بشكل عام سواء أغاني او أفلام او روايات و دي بتبقي سمات شخصيتك اصلا من و انت طفل و عمرك مبتاخد بالك منها انت بتعتبرها شئ عادي جدا زي life style كدة و بتشوف الي بيعترض عليها ده بيتبلي عليك او معترض علي شخصيتك الي هي جزء منك و دة لازم يتفق علي وجودها فيك أشخاص كتير بيتعاملوا معاك و بتبدي تظهر علي الشخص جدا لدرجة ملحوظة في مرحلة المراهقة و مبتتعالجش بأدويه خالص زي الشخص الاعتمادي و الهستيري و الشكاك

• طب لو انت *مكتئب* انتو كلكم حافظين أعراض الاكتئاب فمش هرغي فيه كتير و هي هي الي ذكرتها ف الكئيب بس الفرق ان ده اصلا دي مش طبيعته هو كان حد مرح و فرفوش و حصله حاجه خليته اكتئب و ده ممكن يكون اضطراب نفسي او مرض نفسي او مشكله نفسيه عاديه جدا و بالمناسبة : المشكلة النفسيه دي أعراضها بتنتهي بعد 21 يوم كحد أقصي بس و مبتحتاجش لدكتور و لا تشخيص و لا اي حاجه ممكن تتحل مثلا بإن صحبتك تجيلك البيت و تجيبلك سندوتش شاورمه سوري و بيبسي و تفضلو تغنوا و خلاص هي كده فكت و معندهاش اي مشاكل
****************
2) • عايز تعرف طبعا الفرق بين المرض و الاضطراب اساسا بقي ؟!
أولا المريض النفسي بيبقي واخد باله انه مش كويس و ان مش دي طبيعته و ان فيه حاجه مغيراه “أنا مكنتش كدة ، انا بقيت كدة ازاي ؟! ” و بيحاول يعرف السبب و يروح لدكتور و دي مرحلة اسمها “الاسبصار بالمرض”

أما الاضطراب الشخصي : الشخص مبيكونش معترف اساسا ان عنده اي مشكله لان دي صفات شخصيته اصلا و المبادئ الي اتربي عليها و واثق انها صح لان دي قناعاته و نمط حياته..

_ طب ثانيا بقي و دة الأهم : انت ممكن تكون مريض نفسي بس مرضك مبيأثرش علي حياتك المهنية و شغلك و علاقاتك بالناس لانك بتبقي عارف تظهر ايه و تخبي ايه.. لكن الاضطراب لما بيحصل سواء كان نفسي او شخصي بيأثر علي حياتك كلها و مبتقدرش تمارس حياتك بشكل طبيعي بتخسر اغلب علاقاتك و مبتقدرش تنفذ شغلك زي ماهو مطلوب ..

• مثال بسيط : لو حد عندة قلق مفرط Anxiety هيبقي مرض لو كان الشخص مثلا قاعد في شغله و عمال يفكر يا تري انا قفلت باب الشقه قبل منزل و لا لا ؟! و كل يوم بيسأل نفسه نفس السؤال و بيرجع بيته بعد الشغل يلاقيه مقفول و انه منسيش و لا حاجه!!

• هيبقي اضطراب لو ساب شغله و راح اتأكد ان الباب مقفول و لما رجع الشغل تاني شك تاني و يفضل بقي رايح جي فكدة طبعا قلقه ده هيمنعه يمارس حياته بشكل طبيعي
*******************
3) الفرق بين المرض النفسي و العقلي ؟!!

• أولا : المرض العقلي علاجه الاول و الاهم بيبقي أدوية و بنسبه كبيرة بيبقي وراثه و المريض مبيعرفش يفرق بين الواقع و الخيال لان مرضة بيشتغل علي حواسه ” الرؤية و السمع و الشم و اللمس و التذوق ” بيبقي حاسس ان حد دايما بيراقبه و حد بيكلمه و بيشتمه او بيعظم فيه حد بيضربه بيشم ريحه حجات مش موجودة او حد بيضربه (كل أنواع الهلاوس تقريباً) ده في الغالب بيبقي مريض “فصام” و مبيبقاش معترف انه مريض او انه مش طبيعي..

• ثانيا : المرض النفسي علاجه بيحتمل الادويه و العلاج النفسي مش حاجه واحدة و بيبقي عارف انه مريض و بيفرق بين الواقع و الحيال و بيروح لدكتور عشان يعرف اسباب تغيره و يتعالج..
******************
4) و بعدين يا جماعه هو ايه ” الانفصام ” ده معلش مين هبد المصطلح ده قولولي ؟!!

• هو فيه “فصام” الي هو الهلاوس بكل انواعها
• و فيه “انفصال” و ده بيكون متعدد الشخصيات جواه كذا شخصية ..
*مفيس بقي مكس “الانفصام” ده خالص ربنا يستركم

***********************
_ كنت عايزه افرق بين المريض المدمن و المدمن المريض و المرض النفسي وراثه و لا مكتسب بس مش عايزة اطول عليكم اكتر من كدة

_ هتلاقوها بقيت الموضوعات الي كتبتها في أخر البوست للي حابب يقرأهم

_ الي حابب يعرف الفرق بين حاجتين او مصطلح شائع او يقترح الموضوع الجي يكتب ف الكومنتس و قولولي استفدتم و لا لا ؟!

بواسطة | يارا فتحي

مقالات ذات صلة

زر الذهاب إلى الأعلى
إغلاق
إغلاق