الرد على سؤال الراتب المتوقع للفريلانسر

في المقالة دي هنساعدك في الرد على سؤال الراتب المتوقع اللي بسأله الhr
وخصوصاً للفريلانسر
وهنعلمك ازاي تحسبها صح.

الرد على سؤال الراتب المتوقع

الرد على سؤال الراتب المتوقع

عايزك تحسب الحسبة دي
و تتوكل على الله
ركز معايا

لو كنت بتشتغل نفس الوظيفة دي في شركة
المفروض مرتبك يبقى كام ؟

نقول مثلا ٤٠٠٠ جنيه.. تمام؟..
جميل جداً
إقسم الـ ٤٠٠٠ على ٣٠
علشان نعرف يوم العمل بتاعك بيساوي كام

هايطلع بـ ١٣٣ جنيه تقريبا
كده يبقى تمن ساعة العمل الواحدة
بتساوي الـ ١٣٣ جنيه على ٨

و الـ ٨ دول هو عدد ساعات العمل في اليوم
يعني تمن ساعة العمل الواحدة
هو حوالي ١٦ جنيه

2. و لأنك فريلانسر وعندك مصاريف و أعمال بتقوم بيها
غير أي موظف عادي في شركة
فحضرتك تستحق تزيد سعر ساعة العمل بتاعتك
أكتر من الـ ١٦ جنيه

واحد يسألني ليه يعني
هو الفريلانسر بيعمل ايه زيادة عن أي موظف ؟؟

الرد على سؤال الراتب المتوقع

معلش سيبلي انا الطلعة دي،
حضرتك الفريلانسر بيجيب العميل بنفسه
يعني بيشتغل مبيعات
وبيشتغل في وورك سبيس أو كافيه
فبيدفع تمن المكان اللي شغال فيه

وبيدفع تمن صيانة جهازه
و لو اشتغل في البيت بيدفع تمن الكهرباء
و لو قعدت أقولك بيدفع ايه تاني
ممكن انت شخصياً يجيلك اكتئاب 

المهم، نرجع لموضوعنا
هتزود حضرتك الـ ١٦ جنيه تخليهم كام ؟

لو لسة بتبدأ مشوارك
ممكن تضاعف قيمة ال١٦ جنيه

و لو خبرتك أكبر من كده
ضاعف أكتر
و تقدر توصل للسعر العالمي
لو شغلك واصل لجودة الشغل العالمي..
اللي هو من ٣ لـ ٥ دولار في الساعة

أوكي..
خلاص انا هاضرب الـ ١٦ جنيه في ٢
و سعر الساعة عندي
تبقى حوالي ٣٠ جنيه

إزاي بقا أقدر أقول الشغل ده هياخد ١٠ ساعات
مش ٨ مثلاً ؟
و ازاي يكون عدد الساعات مناسب
لا زيادة ولا ناقص ؟

شوف يا صديقي..
ببساطة كل اللي احنا عملناه ده
كان الخطوة الأولى
تعالى نعرف الموضوع الأهم و هو

عدد الساعات والسعر النهائي للخدمة المطلوبة

عدد الساعات والسعر النهائي للخدمة المطلوبة

الرد على سؤال الراتب المتوقع

طبعاً لو حد طلب منك شغل
فمن الطبيعي إنك بتاخد تفاصيل عن الشغل ده
اللي هو البريف

حضرتك هتفهم البريف كويس
و تروح لشركة بتعمل نفس نوعية شغلك
و تطلب منهم تنفيذ الكلام ده و كأنك انت العميل،
تاخد السعر من شركتين أو تلاتة
و تحاول تنزل عن القيمة دي بنسبة من ٢٠٪؜ لـ ٢٥٪؜

يعني لو مثلاً الشركة طلبت ١٠٠٠
يبقى تطلب انت ٧٥٠ جنيه

و خد كمان الوقت المطلوب للتنفيذ
و حاول تقلل منه نفس النسبة
كده تبقى قدرت توصل لسعر مناسب
ووقت تنفيذ مناسب..

كل اللي فاضل انك تحاول تقنع عميلك بالعرض بتاعك

طبعاً الموضوع ده بتقوم بيه مرة أو مرتين
لحد ما تبقى قادر تفهم تفاصيل شغلك
بشكل جيد
و تعرف ازاي تحسب مجهودك
و تعرف تمن إسمك في السوق

لاحظ كمان
انه ممكن ييجي عليك يوم
يبقى سعر الشغل معاك
أكبر من أي شركة 
و ده لمجرد ان اسمك فُلان،
دي اللي اسمها الثقة و السُمعة الجيدة

لكن لحين ما يبقى عندك القدرة على كده

هاتفضل محتاج تحسب تمن ساعتك
بناء على راتب الموظف المماثل لمستواك
و كمان تعرف تمن تنفيذ الشغلانة دي في السوق
و تحاول توصل لرقم معقول
ومُرضي ليك.

كتب بواسطة :محمد عزيز

اقرأ ايضاً:

الصحة النفسية للطفل :ما هى تربية الحماية الخانقة ؟!
مقالات دكتور احمد خالد توفيق: من مقال قوة الضعف
تعلم اللغة الألمانية للمبتدئين من الصفر الى الاحتراف مقدمة من قناة طليق 2020