منح daad : رحلتي وحلمي السفر إلي المانيا ..
هنتكلم النهاردة عن حلمي للسفر الي المانيا وازاي قدرت احققه من خلال منح daad.
لما كنت في الجامعه كان نفسي اسافر المانيا جدا.. فاكر كويس اوي لما بابا جالي في يوم و قالي انا اتعرفت علي دكتور عندك في كليه الالسن ممكن يساعدك انك تسافر.. معرفتش ساعدتها انام الليل و روحت للدكتور تاني يوم علي طول..
اتكلمت معاه و كان كلي حلم انه يديلي منحة.. بس كنت ساذج جدا لما فكرت كده و لقيت الدكتور بيقولي روح للسفاره و هما ممكن يدوك المعلومات..
منح daad
روحت السفاره الالمانيه و اتفاجأت بالمقابله السيئه و قالولي روح ال DAAD. .
كنت اسمع عن ال DAAD ومنح daad كتير و انه بيساعد في السفر لالمانيا..
حضرت كل الاسئله و روحت هناك و استقبلتني دكتورة صفاء و قالتلي لي منح كتيره بس لقيت الموضوع معقد و الشروط مش متوافقه عليا.. زعلت كتير و بدا حلم السف يتلاشي..
فاكر كويس حالتي النفسيه كانت ازاي في البيت.. فتحت الفيسبوك و فضلت اتفرج علي صور لالمانيا..
بعدها بسنه دخل دكتور الترجمه و قال اللي هايجيب امتياز في الترم الاول و التاني في الترجمه هايسافر المانيا..
حلم السفر بدا تاني و فرحت.. روحت البيت و فضلت اذاكر ترجمه.. بدات اعمل ترجمه فوريه مع نفسي و انا قاعد مع اصحابي في القهوة..
اي حد يقول اي حاجه انرجمها في سري.. دخلت الامتحان و كلي امل.. يوم النتيجه كنت خايف ليروح الامل تاني، و قد كان..
جبت امتياز من عربي لالماني و مقبول من الماني لعربي.. زعلت و كان اول مرة اعيط علي شئ راح مني.. عيطت جامد و انتهي حلم السفر!
شلت الموضوع من دماغي لحد ما قابلت دكتور في الجامعه بالصدفه في الدقي..
اتكلمت معاه بحزن و قولتله كله بيسافر المانيا و انا الوحيد اللي عمري ما هسافر.. قالي اللي عايز يسافر بيسافر، الفرص كتير..
الكلمه اثرت فيا جدا و قولت و الله لاسافر.. روحت البيت و بدات ادور علي منح.. لقيت منحتين، قدمت عليهم و انتظرت سنه كامله علي امل القبول و اترفضت.. ٤ سنين من المحاوله، حزن شديد!!
الشغل في ال DAAD
بعد كده لقيت شغل في ال DAAD.. قدمت و الحمدلله اتقبلت..
فضلت اشتغل كتير لحد ما لقيت المدير بيقولي جهز نفسك في منحة ٣ اسابيع في المانيا قدم عليها!! بعت الورق بسرعه و كتبت كل اللي اقدر عليه.. بعدها باسبوع بعتولي كالعاده، انت مرفوض في المنحه..
رجعلي الحزن تاني و اتاكدت ان الموضوع عمره ماهينفع.. تاني يوم حصلت المعجزة، اتبعتلي ايميل باني اترفضت غلط و اني مقبول في المنحة.. كنت لاخر يوم متاكد اني مش هسافر، لازم يحصل حاجه!
بس الحمدلله الموضوع عدي و سافرت.. حلم من احلامي اتحقق و زرت البلد اللي كان نفسي اروحها اتعرفت علي دكتور في الجامعه تبع المنحة و قالتلي اني مستوايا حلو جدا و لازم اقدم في الجامعه.. قولتلها صعب قالتلي هساعدك..
ابلت الدكتوره و قالتلي لازم تيجي تدرس عندنا في الجامعه.. قولتلها صعب اوي يا دكتور.. انا جيت المانيا علشان المنحه و معيش اي ورق من اللي مطلوب.. قالتلي وريني طيب معاك ورق اي حتي لو علي الميل.. وريتها الورق اللي معايا و قالتلي مفيش مشكله بس المشكله انك معكش ما يثبت انك بتتكلم الماني..
قولتلها بس انا دارس في الالسن الماني.. قالتلي مش كفايه..
قالتلي الحل الوحيد انك تروح لرئيسة القسم تاخود منها استثناء.. روحت لدكتورة القسم بعد توصيه دكتور يسري الله يكرمه و كلمتها.. حاولت اقنعها بس للاسف رفضت..
رحلة اثبات اني بتكلم الماني
بعدها باسبوع اتعقد مؤتمر في حضور رئيسة الجامعه و ناس مسؤولين.. استنيت كلمه رئيسة القسم و رفعت ايدي.. بصيت لكل الحضور و قولتلهم انا قدامكم اهو بتكلم الماني و رئيسة القسم طالبه مني شهادة اني بتكلم الماني..
هل يعقل انك تطلب من حد عايش شهاده انه عايش؟؟ لقيت الكل بص بنظرة غريبه و راحت رئيسة الجامعه قالتلي تعالي مكتبي بعد المؤتمر..
روحتلها و لقيت رئيسة القسم هناك اللي اعتذرت و قبلت ورقي في الجامعه!!! فرحت كتير بس لقيت اني مش معايا فلوس!!
كلمت دكتورة المنحه قولتلها انا محتاج فلوس علشان الدراسه في المانيا.. قالتلي اقعد احكيلي عملت ايه في حياتك.. حكيتلها قالتلي خلاص هساعدك انك تكتب خطاب توصيه نقدم بيه في المنحه.. بعتنا ورق المنحه و اترفضت لاني كنت فوت المعاد.. بعدها بيوم بعتولي ايميل اني اتقبلت! هو ايه الموضوع، هو لازم اترفض الاول و لا ايه.. بدات مرحلة الدراسه اللي كانت فيها اصعب ايام حياتي وواجهتني مشاكل مايتحملهاش جبل..تابع
كتب بواسطة.علي منصور
قرأ ايضاً:
الصحة النفسية للطفل :ما هى تربية الحماية الخانقة ؟!
أختين تؤام .. قصة نجاح قصيرة بدأت من التنسيق
تعلم اللغة الألمانية للمبتدئين من الصفر الى الاحتراف مقدمة من قناة طليق 2020