تحفيزيمحمد المالكيمقالاتمقالات الاعضاءنصائح

القرارات الوهمية…

زمان وانا فى ابتدائى المدرسه اعلنت عن رحله لدريم بارك وصحابى كلهم كانو رايحين واما بيسالونى قولتلهم مش هطلعها عشان اهلى مش هيوافقو انا عارف .. وفضلت مش مبسوط عشان قرار انا اخدته مع نفسى ان اهلى مش هيوافقو لحد ما جه صحبى قالي حاول معاهم عشان خاطرى روحت فعلا ومجرد مقولتلهم عالرحله وافقوا ! فضلت زعلان و”ندمان” اوي عشان طول الفتره اللى كنت مقرر فيها من نفسى ان اهلى مش هيوافقو وكل دا كان قرار “وهمى” بالولا حاجه !

واحد زميلى فى الاعداديه شال ماده على درجه واهله فضلو يتحايلو عليه يتظلم وهو يقولهم لا بياخدو فلوس عالفاضى دول حراميه وناس زمايله اتظلموا وخدو درجات وعدوا من الماده وهو عاد السنه كلها و”ندم”عشان قرار خدو بنفسه واعتقاد “وهمي” بالولا حاجه !!

اتنين صحاب اتخانقو وكل واحد فاكر انه لو راح اعتذر للتانى هيكسفه ويحرجه ومش هيتقبل منه واما اتقابلو بعدها بفتره سلمو وحضنو بعض ونسو كل حاجه ، كانو برضو مش بيتكلمو عشان اعتقاد “وهمي” بالولا حاجه.

اتحكى قدامى عن واحده فضلت تحب جارها اكتر من ٧ سنين تراقبه من البلكونه كل يوم بينزل امتي ويرجع امتي لدرجه كانت حافظه كل هدومه بالتفصيل يوم ما بيتاخر عن ميعاد رجوعه مبتعرفش تنام من كتر القلق عليه ، كل يوم عن التاني حبه بيكبر جواها بترسم امال وامانى كتير وبتحلم تطل بالابيض معاه فكرت كتير تعترفله بحبها بس كانت بتقول انه هيرفض واكيد مش هيبصلى او هيشوفنى بعين وحشه لما اقوله اني بحبه ! لحد فى يوم اخت جارها زارتهم واديتها دعوه فرح .. دعوه فرح الشخص اللي فضلت تحبه سبع سنين !! قررت تبعتله جواب تقوله انها بتحبه وحكيتله حكايتها ومكانتش منتظره منو رد لان خلاص فرحه بعد ايام بس اتفاجئت لما بعتلها هو كمان انه كان بيحبها وبيراقبها من بعيد بس خايف تكون مرتبطه بحد وتحرجه ! بس فات الاوان خلاص الاتنين ضيعو من عمرهم فرصه عشان قرار “وهمى” بالولا حاجه !

عمرنا بيضيع والناس اللى بنحبها بتضيع وفرص دهبيه بتضيع من حياتنا عشان قرارات وهميه خدناها فى عقلنا وفى الاخر هي ولا حاجه !

خد الفرصه جرب وشوف ايه رد الفعل متحكمش ومتقررش من نفسك اتحرك قبل ما الوقت والفرص والناس يضيعوا مفيش حاجه بتستنى احساس الندم وحش ومؤذي لأبعد الحدود ..

مقالات ذات صلة

زر الذهاب إلى الأعلى
إغلاق
إغلاق