متنوعمحمد المالكيمقالاتمقالات الاعضاءملخصات كتب

رُعب العلاقة العميقة ..

فكرة العلاقات العميقة فكرة في غاية الرعب .. تخيل أنك بتوصل لمستوي عنيف من التواصل و الحميمة مع شخص ما كان في السابق غريب عنك ،، لكن لسبب ما قررت انك تقيم نوع مميز من الإلتحام النفسي و الفكري مع الشخص ده …
رُعب العلاقة العميقة مش بس في انك بتعري نفسك و روحك قدام الكيان المختلف ده قد ما انت في لحظات كتير بتحس انك مدفوع بقوة مصدرها لا يمكن يكون عقلك او منطقك .. قوة ما بتخليك تقول كلام مينفعش يتقال و سلوك مينفعش يتعمل ، بتحس ان اه هي ديه طبيعتك بس ازاي طلعت بالشكل الغير محكوم ده ؟! و ياتري ايه تاني ممكن يتكشف او يظهر ؟!! … فالرعب في القوة الغير متعقلة ديه و ايه التبعيات اللي ممكن توصلها لها ..

خلينا نقول ان الحكمة في الحب هو إيجاد التوازن بين التحكم في القوة ديه و بين إطلاقها .. أكيد محدش حيكون سعيد خلاص في حب مشلول او مربوط سواء بقيد تقاليد و اجتماعيات او قيد خجل و بلاهة .. بس برضة محدش حيحس براحة طول و هو قدام شخص مش عارف يسيطر علي طبيعة جواه لسه بيعيد اكتشافها … و هنا بقي يجي دور الانسان اللي بيحبك..
.
الحب في وجهة نظري نوع راقي من انواع تهذيب الذات ، مش معناه ان اللي يحبك يقعد يربيك ! إنما اللي بيحبك بيخوض معاك رحلتك الشخصية في اعادة البحث عن حقيقتك زي اطفال بتطلعوا سلالمكوا الأولي سوا .. عمق الحب مش في الخروجات او اللحظات السعيدة قد ما عمقها قد ايه هو أثر في فكرك و غير في إدراكك.. قد ايه مليت نفسك بشريكك ده فبقي هو موجود في حلمك و لصيق لمستقبلك .. قد ايه انتا نضجت فيه و هو نضج فيك ..
فأجمل حب هو أعمقه .. بالرغم من انه مرعب و مخيف و ان كل ما كان عميق كل ما كان فكرة اقتلاعه من جواك شرسه و مؤلمة .. بس للأسف الحب مينفعش يبقي سطحي او سهل … و عشان كدة مينفعش يتقال علي إي علاقة لفظ “حب” غير لما نتاكد الأول انها تستحق كل الرعب و المخاطرة ديه .. ان فعلا الشخص اللي معايا حيكون أمين عليا في تهذيبي لنفسي و ذاتي .. ان الشخص ده صادق كفاية انه يدفعني للأفضل و الأعلي … و إلا يبقي بنهين نفسنا قبل اي حد تاني ..
من كتاب الرفيق سيكو سيكو

مقالات ذات صلة

اترك تعليقاً

زر الذهاب إلى الأعلى
إغلاق
إغلاق