أروى عصاممقالاتمقالات الاعضاءنصائح

هو إيه الماركتنج بلان دي؟

ده السؤال اللي سأله سليم للحاج فاروق السمسار لما لقاه واقف بيقول لواحد:
“أصل يا باشا عشان اجبلك شقة مناسبة الموضوع محتاج سيرش عميق للمنطقة وللبلد.. دي فيها ماركتنج بلان دي”

عم فاروق لما لقى سليم منتبه أوي كده قاله طيب تعالى لما نقعد احكيلك بقى.. ودار بينهم الحوار ده!

الحاج فاروق: قولي بقى يابني عايز تعرف إيه؟
سليم: إنت ازاي بتجيب شقة دايمًا مناسبة للراجل اللي بيقولك محتاج شقة؟
وازاي بتعمل ماركتنج بلان زي ما قولتله؟

الحاج فاروق: ي أستاذ سليم عميلي مينفعش يقولي عايز حاجة ومنفذهاش أو اجبله حاجة تانية غير اللي هو عايزها ، فا لازم ادرس واحط بلان للطلب بتاعه عشان اوصله بسرعة واقدمهوله.

سليم: ايوووووة بتعمل ايه بالظبط عشان تحط خطة وبلان للتسويق زي ما قولت؟
الحاج فاروق: مفيش ده الموضوع ممتع يا أستاذنا أنا نا عشان محتاسش مقسمهم لـ ٧ خطوات لما بعملهم برضي عميلي وبترضي أنا كمان.

١. لازم أكون عارف أنا بقدم إيه
(know your business)
يعني إنت ي سعة الأستاذ سليم عارف إني سمسار شقق، بس أنا عارف إني سمسار شقق مش أكتر ولا أقل يعني مليش علاقة بالفلل ولا الأراضي ولا الشاليهات وبشتغل ع مناطق معينة وبوفر شقق تمليك بس.
فا محدش هيعرف أنا بعمل إيه قدي

٢.لازم أكون دارس دماغ عميلي
(Determine target market)
وهنا ي سليم بيه بحاول أدرس عميلي، يعني لما حد يجيلي ويقولي عايز شقة بفهم منه هو سنجل ولا متجوز في مقدرته يدفع كام.. بيحب الدوشة ولا الهدوء.. بيحب مكان جنبه كافيهات ولا ملوش في الكلام ده.. عنده أولاد فا هعوز اسكنه فـ دور مش عالي.. تعبان فا اشوفله شقة ف عمارة بأسانسير وهكذا.
ف لازم ادرس عميلي جامد عشان اقدر اوفرله طلبه متظبط ع مقاسه

٣. لازم أكون محلل منافسيني كويس
(analyze the competitors)
والخطوة دي بالنسبة لي أكتر خطوة مسلية 

سليم: اشمعنا 
الحاج فاروق: هو فيه ي بيه أمتع من إنك تراقب منافسينك.. دنا أسعد اوقاتي لما بركز مع عم سعيد و الحاج صلاح والواد جمعة وهما بيشتغلوا وبيدورا ع شقق وبيختاروا مناطق ومين بيرشحهم وبنشكح لما بيجيلي حد بيشتكي من طريقتهم في التعامل و التأخير وبعرف اسلوبهم وكله ساعتها بعرف اتجنب أخطائهم دي وبحاول اطور من نفسي او عملوا حاجة حلوة.

بس وربنا أنا وراهم لحد ما يسيبوا السمسرة
ويروحوا يبيعوا ترمس

٤. وبعدين بحط أهداف معينة
(Set goals)
هنا بقي بقعد مع نفسي واجيب ورقة وقلم واحط أهدافي
*يعني هحط أسعار مختلفة لكل نوع عميل أو buyer persona
—> اعرف أكتر عن الـ buyer persona في لينك الحلقة في أول كومنت

*عايز يبقي معايا كام بعد كل ١٠ بيعات
*هل هوسع نطاق البحث على مناطق إضافية ولا خلاص كده 
وهكذا…

٥. وبعد ما احط أهدافي احطلها خطة أو استراتيجي لتنفيذها
(Outline Strategies)
وبعدين هنا بعمل خطة تنفيذية محكمة عشان احقق الأهداف دي،
فا مثلا لو مسكنا آخر هدف واللي هو عبارة اني اتوسع فا احط في الخطة إني اشغل حد تحت ايدي واظبطله عمولة لوحده أو شهرية وهكذا.

٦. بحط ميزانية بقي لكل ده
(Set a budget)
وهنا بقي الجزء اللي بيوجع بطني:
لو عايز معلومة عن شقة يا تري هكرمش كام للبواب عشان أخد المعلومة
مصاريف مواصلات وشاي -الله منا مش هكيف دماغي غير بالشاي

بس أنا بقلب الرقم ده اضعافه من العميل بعد كده امااال هصرف عليه من جيبي؟ ولا إنت شايف إيه يا سعة البشمهندس سليم؟

سليم: اكيد طبعا يا حاج إنت صح.
الحاج فاروق: الله ينور عليييك، المهم اخر خطوة هي

٧. وبعدين ببتدي اشتغل بقى 
(Go to work!)
بقوم انفذ كل اللي حضرته ده، وشوف والله يا استاذ ومليك عليا حلفان مفيش في تاريخي حد اشتكي من شقة مكنتش زي ما طلبها ولا اتأخرت عليه في طلب وأنا أهو شغال بقالي عشرين سنة سمعتي زي البريلانت واسأل عليا في كل مكان إنت بس جرب تسأل ع الحاج فاروق سمسار التحرير

سليم: صادق والله يا حاج صادق 

الحاج فاروق: الله يفتحها في وشك، تشرب شاي؟
سليم: لأ تسلم هقوم امشي اتأخرت جامد
الحاج فاروق: اشرب شاااي! ي عم متخافش ده ع حساب العميييل
بقولك بقلبهم من العميل امااال ده انا بقدمله خدمة فايف ستاااار طيب وربنا لو دور ١٠ سنين ما هيلاقي طلبه شوف انا بقولك ١٠ سنين وانا عارف إن ممكن يكونوا اكتر…….
دنا عااامل جروب ع فيسبوك مجمع فيه شقق يامااا واي حد عنده شقه بخليه يرفع صورها و مواصفاتها ع الجروب..

سليم: ي ما شاء الله دا انت عامل شغل أونلاين ع السوشال ميديا كمان؟

“الحاج فاروق: بقوووولك خبرة ٢٠ سنة يا جدددع!

الحاج فاروق مبيفصلش المهم تكون انت مفصلتش وفهمت مراحل الماركتنج بلان..
ولو عايز تعرف الحاج فاروق عامل ازاي خطة ع السوشال ميديا استنوا الفقرة الاسبوع الجاي

كتب بواسطة | أروى عصام

مقالات ذات صلة

زر الذهاب إلى الأعلى
إغلاق
إغلاق