أسماك شيطان البحر او Manta rays
أسماك شيطان البحر أو أسماك المانتا “Manta Rays” كل دي أسماء لكائن عملاق هو الأكبر في فصيلته حاليا, تخيل إن عرض السمكة بيوصل أحيانا لـ 7 متر.
وده تقريا نفس طول الزرافة وطبعا الفرق واضح جدا بين طول إنسان عادي
أسماك شيطان البحر
في نوعين من أسماك شيطان البحر :
اول واحد أسماك شيطان البحر المرجاني وده بيتواجد المياه الساحلية في الاماكن الاستوائية او الشبه استوائية
تاني نوع هو أسماك شيطان البحر المحيطة العملاقة وده بينتمي له اكبر اسماك شيطان البحر والنوع ده دايماً بيهاجر في المياه المفتوحه.
علي عكس المتوقع من اسمها, أسماك شيطان البحر هي تعتبر من الكائنات مسالمة جدا وده لإنها بتتغذي علي كائنات ميكروسكوبية بتعيش في المحيط زي الطحالب أو البلانكتون “Plankton”.
وده عن طريق تصفية المياه من الكائنات الدقيقة دي اللي هي بتتغذي عليها, ولكن علي غير العادة العلماء اكتشفوا إنها تقدر تتغذي لأكثر من 10 دقائق كاملة
وفمها مفتوح من غير ما تضطر إنها تكح علشان تطرد أي إنسداد أثناء التغذية كما الحال في الكائنات اللي بتستخدم نفس الطريقة في التغذية
وده أكد علي إن الأسماك دي عندها نموذج فريد من نوعه في تنقية المياه من المغذيات الصلبة اللي فيها بدون حدوث أي إنسداد !
بعيد عن السمك في 3 طرق لفصل المواد الصلبة عن المواد السائلة أشهرهم استخدام الغربال “Sieve”.
ودي عن طريق إننا بنمرر السائل في مصفاة فتحاتها أصغر من حجم الأجزاء الصلبة اللي فيها
وبالتالي الأجزاء الصلبة تفضل علي الغربال في حين السائل بيمر
الطريقة التانية اسمها “Cross-flow”
ودي نفس فكرة الغربلة ولكن بدل من امرار السائل بشكل عمودي بيمرر بشكل أفقي بحبث إنه مايقللش معدل جريان السائل
الطريقة الثالثة اسمها “Hydrosal” ودي طريقة بيستخدم فيها مادة لزجة بتلتصق بالمواد الصلبة اللي موجودة في السائل.
ازاي أسماك دي بتقوم بتصفية المياه من الغذيات الصلبة منغير حدوث انسداد
نرجع بقي لشياطين البحر هنلاقي إن الطريقة اللي بيستخدمها فريدة جدا من نوعها
وبتجمع بين مميزات كل الطرق المعروفة وفي نفس الوقت بتقلل عيوبها.
الطريقة اسمها “ricochet separation” أو الفصل عن طريق الإرتداد.
ودي عن طريق الشكل المميز للخياشيم اللي بتستخدم في فصل المواد الصلبة أو الغذاء عن مياه البحر بفاعلية كبيرة جدا.
لدرجة إنهم لقوا بعض الكائنات الميكروسكوبية اللي بيتغذي عليها السمك أصغر من الفتحات اللي موجودة في الفلتر اللي موجود في خياشيم السمكة وده اللي واضح في الصورة التانية.
اكتشاف نظام زي ده هيفيد جدا في مجالات كتير في الصناعة.
من خلال توفير الوقت والتكلفة الناتجة عن انسداد الفلاتر والتنظيف والصيانة.
ده غير إنه بدراسة الطريقة اللي بتتغذي بيها الأسماك دي هتساعد علماء البيئة في معرفة الظروف المناسبة ليها وتوفيرها.
لأنها للأسف بقت من الحيوانات المهددة بخطر الإنقراض بسبب الصيد الجائر.
علي الرغم من إن لحمها غير محبب لكن الأسيويين زي ما احنا عارفين بيصطادوها علشان خياشيمها.
اللي بيعتقدوا إنها ليها خصائص علاجية نفس السبب اللي هيعرض كائنات كتير تنقرض.
بسبب اعتقاد أكتر من مليار شخص بإنهم ممكن يتعالجوا بعظم حيوان مفيش منه غير العشرات بس علي مستوي العالم !
من الاسباب اللي بتشكل خطر عيلي الاسماك دي هو تغير المناخ و الاحتباس الحراري اللي اتسبب في رفع درجة حرارة مياه البحار والمحيطات.
ال الاثر بشكل كبير في اخلال دورة حياة العوالق وال هي مصدر غذائي رئيسي لأسماك شيطان البحر.
وللأسف الاسماك دي بتتكاثر ببطء ولكن بتعيش لفترة طويلة.
كتب بواسطة | أحمد عباس
اقرأ ايضاً:
كيفية تنظيم الوقت: افضل طرق لتنظيم الوقت
تلخيص كتاب قوة العادات “تشارلز دويج”
الدولة الفرعونية القديمة: الملك زوسر احد ملوك الاسرة الثالثة