كيفية تنظيم الوقت: افضل طرق لتنظيم الوقت
في المقالة دي هنتكلم عن كيفية تنظيم الوقت كلنا عندنا نفس ال 24 ساعة .. الفرق
إن فى ناس بتعرف تستغلهم صح ودول مش مهم يكملو البوست
وفى ناس مش فارقه معاهم وماشية بالبركه ودول ملناش دعوة بيهم
وفى نوع تالت عايز يستغل وقته ويخلص اللى مخططله بس مش عارف والكلام هنا موجه ليهم
بص يا صديق .. حتة إنك تعرف تتظم وقتك مش محتاج منك تمشى ب 4 اقلام ملونين ولا شايل اجندة فى إيدك
فى رأيي أنا المتواضع جدا .. الشخص الناجح فى تنظيم وقته هو اللى بيعمل اللى مخططله فى خلال اليوم
بصرف النظر هو عبارة عن ايه !!
بمعنى مش لازم اكون تنين فى نفسى واخلص مجلدات وكورسات كل يوم .. مهما كانت حاجات بسيطة بتقدر تحققها فى انت كده ناجح فى تنظيم وقتك
كيفية تنظيم الوقت
طيب نيجى للنقطة الأهم .. إزاى أقدر اعمل دا
الكلام دا خلاصة حاجات إتعلمتها وتجارب وفيديوهات على اليوتيوب ونصايح ناس .. ودى أفضل أفكار بجد ومجربها قبلك وجابت معايا نتيجة كويسة جدا
نزل برنامج نوته على موبايلك عشان هنحتاجه فى خلال كل يوم
ال app دا هنستخدمه مرتين
مرة عشان نكتب فيه كل الحاجات اللى هنعملها خلال اليوم ويفضل تكون عددها مناسب واختيارات معقولة وقابلة للتنفيذ
بمعنى متجيش تقولى إنت هتختم القرآن النهاردة وتخلص 3 كورسات على يودمي وتتعلم 1000 كلمه جديدة فى أى لغة وإنت أساسا مقضى ايامك كلها بتلعب PUBG
لازم إختياراتك تكون واعى بيها ومدرك إنك تقدر تحققها وقابلة للتتفيذ
طيب تانى إستخدام للبرنامج دا هو انك فى خلال اليوم هتفتكر حاجات كنت ناسيها وهيظهر ليك أفكار ممكن تعملها وهتلاقى مشتتات بتعترض طريقك .. الحل هنا عشان تقدر تنجز المطلوب إن اى فكرة تيجى فى عقلك وانت مش مخططلها انها تخلص النهاره .. سجلها ف النوت وفى أخر اليوم ابقى إرجع بص عليها وشوف هى أولى إنها تاخد من وقتك ولا لأ
اختيار الصحيح لمهام اليوم
Guess what ?!
– معظم إختياراتنا بتكون فى المربع الأخير دا
حاجات مش مهمه أصلة وممكن تتأجل عادى ومع ذلك بتاخد الجزء الأكبر من وقتنا
ف حاول على قد ما تقدر تبقى واعى انت مختار تعمل ايه وياترى يتحط فى أي مربع ؟!!
نيجى لأخر خطوة
فى نهاية كل يوم قبل ما تنام كده شوف إنت عملت ايه من اللى كان مطلوب تنفذه النهارده .. وعايز أققولك كمان إنك لو حققت 50٪ بس من اللى عايزه ف دا إنجاز كبير متستهينش بيه .. عشان مش كل الناس بتقدر توصله
المهم إنك تحاول دايما تزود لحد ما توصل ل 100٪
خلينا نختم بالكلمتين دول
صدقنى انت مش محتاج عصايا سحريه ولا تعويذة أبرا كادبرا عشان تبقى بيل جيتس ولا مارك زوكربيرغ فى نفسك .. انت اصلا مش مطلوب منك تبقى زيهم .. قد ما مطلوب منك إنك متضيعش عمرك فى حاجات لا تسمن ولا تغنى من جوع
“لا تزولُ قَدَمَا عبدٍ يومَ القيامةِ حتَّى يُسألَ عن أربعٍ عَن عُمُرِه فيما أفناهُ وعن جسدِهِ فيما أبلاهُ وعن عِلمِهِ ماذا عَمِلَ فيهِ وعن مالِهِ مِنْ أَيْنَ اكْتَسَبَهُ وفيما أنفقَهُ “
لو فى افكار تانية عندك إكتبها يمكن تفيد غيرك
كتب بواسطة | أحمد رشاد
اقرأ ايضاً:
ماركتينج من الاخر: تايهين ومش عارفين نتعلمه ازاي وفين!
تلخيص كتاب قوة العادات “تشارلز دويج”
الدولة الفرعونية القديمة: الملك زوسر احد ملوك الاسرة الثالثة