صوره عالمك المثالي

بعد ما اتكلّمنا الأسبوع إللي فات عن صورة البروفايل، يبقى لازم النهاردة نتكلّم عن صورة الـ cover بقى 
تفتكر لازم تكون صورة شخصية ليك بردو؟ ولا ممكن نحط إيه فيها؟
بص يا سيدي، أنا دلوقتي شفت صورتك واسمك، عايز أعرف عنك أكتر، إيه أحلامك.. اهتماماتك.. أفكارك.. شخصيتك.. وهو ده إللي بتوضّحه لي من خلال صورة الكوفر.
ممكن تحط مقولة بتصدّق فيها أو مبدأ عايش بيه، بس طبعاً مش زي الصورة إللي مع البوست، مقولة مفيدة 
صورة جماعية ليك مع المتطوعين في النشاط الطلابي إللي أنت فيه أو الشركة إللي اتدرّبت فيها في الصيف أو فريق العمل في الشركة إللي أنت شغال فيها… انتمائك لكيان أنت فخور بوجودك فيه
صورة لحلمك، هدفك السفر حول العالم فـ تحط صورة فيها معالم من أكتر من بلد أو تحط مقولة أو صورة معبّرة عن السفر، هدفك تغيّر العالم لمكان أفضل فـ تورينا صورة عالمك المثالي، حلمك في أولادك فـ ممكن تحط صورة ليك معاهم، بتحب عيلتك فـ تحط صورة عائلية…
صورة من شغلك، لو أنت مهندس فـ تحط صورة من موقع الشغل، أو مبرمج فـ تحط صورة وأنت بتشد في شعرك أدام اللابتوب، مدرب فـ تحط صورة ليك في مسرح أو قاعة تدريب أو صورة مع المتدربين وهم شغالين في نشاط معين أثناء التدريب، طيار فـ تحط صورتك في الكابينة أو على الموتوسيكل…
المجال مفتوح في الكوفر، شوف حابب تعرّف الناس إيه عن نفسك وشخصيتك.
هنعرف في كل مقال مع بعض tip أو نصيحة صغيرة هتساعد في تكوين الصورة الذهنية عننا عند الناس وهتساعدنا في مجالنا بشكل كبير جداً إن شاء الله، تقدر تتابع البوستات إللي فاتت والجاية على هاشتاج #personal_branding_101

رائد_أعمال_على_أد_الحال

Personal_Branding أبيع نفسى التسويق الشخصي

كتبه | محمد ابو العنين