تلخيص كتاب قوة العادات “تشارلز دويج”
في المقالة دي هنلخص كتاب قوة العادات ” The Power Of Habit ” للمؤلف “تشارلز دويج” و يعتبر الكتاب ده من أكثر الكتب مبيعا و إنتشارا ألا و هو ” قوة العادات “
-ف البدايه الكتاب ده لمؤلف إسمه
” تشارلز دويج ” و اتنشر سنة 2012
تلخيص كتاب قوة العادات
الكتاب بيناقش 4 أفكار رئيسيه :
(1) إيه هي العاده و إيه أهميتها
(2) أسباب تكون العاده و مكوناتها
(3) مهارة إكتساب العادات
(4) كيفية التخلص من العادات السيئه
« هنناقش النهارده أول فكرتين »
– مبدأيا كل شخص مننا عنده حصيله لا بأس بها من العادات اللي معظمها إتكون بوعي أو بدون وعي و اللي منها عادات إيجابيه أو سلبيه و حوالي 40 ٪ أو أكتر من أفعالنا اليوميه بتتم نتيجة العادات و اللي غالبية الأشخاص اذا مكنش كلهم من الناجحين علميا أو عمليا بيكونوا معتمدين بشكل أساسي علي برمجة عاداتهم اليوميه و بالتالي بيصنعوا إنجازات عظيمه و مش بنكون عارفين السر ورا ده..و الحقيقه إن العاده فكرتها بتقوم علي تحويل السلوك اللي إنت محتاج قوة إراده علشان تعمله لسلوك معتاد بتنفذه بشكل تلقائي كل مره و كل يوم
✓تعالوا نعرف الأول يعني إيه ” عاده “
• مفهوم العاده •
– هي عباره عن فعل أو سلوك بيعمله الإنسان بإنتظام و من غير تفكير تقريبا
✓طيب إيه أسباب تكوين العادات..؟
– ف الواقع مخ الانسان جهاز شديد الكفاءه و دايما بيحاول يوفر إستهلاك الطاقه قدر الامكان فلما بيشوفك بتكرر سلوك معين بيحولهولك لعاده عشان متفكرش فيه كل مره و الحقيقه إن دي خاصيه مهمه جدا و من غيرها مكنش الإنسان قدر يكتسب أي مهاره أو خبره
• مثال بسيط •
– لما الطفل بيبدأ يتعلم المشي بيفضل يفكر ف كل خطوه زي إنه هيحرك رجله إزاي و إتجاه حركة الجسم و هكذا
لكن بمجرد م يتعلم المشي نتيجة التكرار المخ بيبطل يفكر ف التفاصيل و بنلاقي الطفل عمال يجري و يلعب و هو بيفكر ف حاجه تانيه خالص غير المشي
✓طيب إيه هي مكونات العاده..؟
-أي عاده ف الدنيا سواء إيجابيه أو سلبيه بتتكون من 3 مكونات
« المحفز Trigger »
و بيكون عباره عن شئ بيحفزك تبدأ ف السلوك اللي بيكونلك ف النهايه العاده
ممكن يكون حاجه بتسمعها أو بتشوفها أو بتحس بيها
• مثال •
في عادة التدخين مثلا المحفز ممكن يكون الشعور بالزهق أو الملل أو رغبة الجسم ف الحصول علي النيكوتين
« سلوك العاده Routine »
في عادة التدخين الروتين بيكون إنك تطلع السيجاره و تولعها و تدخنها
« المكافاه Reward »
و ده عباره عن العائد المستحب اللي بتحصل عليه من سلوك العاده
زي مثلا ف عادة التدخين بيكون العائد هو إشباع رغبة الجسم في النيكوتين و ما يترتب عليه من راحه مؤقته
✓طيب حد عنده فكره إيه اللي بيخلي كتير من العادات الإيجابيه إكتسابها صعب و كتير من العادات السلبيه إكتسابها سهل..؟
-الحقيقه إن المكون التالت للعاده اللي بيسميه المؤلف المكافأه هو السر وراء ده،،طيب إزاي!!
– العادات السيئه العائد المستحب منها بتحصل عليه بسرعه زي الطعم اللذيذ لما بناكل ال” junk food “..لأنك بمجرد م تبتدأ ف سلوك العاده بتحصل علي عائد مع أول قطمه ف الساندوتش و أول نفس من السيجاره..!
-بينما العائد المستحب من العادات الإيجابيه عادة بيكون مؤجل
زي مثلا الصحه الجسديه اللي بتحصل عليها بعد المحافظه علي الأكل الصحي و الرياضه لفتره طويله
– و للأسف الشديد بنلاقي إن أضرار العادات السيئه بتكون مؤجله و بعيدة المدي
علي سبيل المثال المدخن مش بيحس بالمرض مباشرة بعض تدخين السيجاره
– و المشكله إن الإستعجال طبع ف الإنسان بدليل إن ربنا قال
في سورة ” الأنبياء “
” خلق الإنسان من عجل “
و في سورة ” الإسراء “
” و كان الإنسان عجولا “
– ف ده سبب كافي يخلي إكتساب العادات السيئه أسهل بالرغم من إنها بتخلي الحياه أصعب علي المدي البعيد
– و بيخلي إكتساب العادات الحسنه أصعب بالرغم من إنها بتخلي الحياه أسهل علي المدي البعيد
– بس في ملحوظه مهمه بتقول إن العادات الحسنه ليها عائد سريع بالإضافه إلي العائد البعيد
• مثال •
ممارسة الرياضه مثلا بتدينا عائد سريع ف نفس اليوم و هو حالة النشاط و الصفاء الذهني خلال اليوم
بالإضافه للقوه و الصحه الجسديه اللي بنحصل عليها علي المدي البعيد
– بس المشكله إن المبتدئيين بيكون تركيزهم ف البدايه علي التعب الجسدي اللي بتسببه الرياضه لأن الانسان بطبعه بيركز علي السلبيات أكتر من الإيجابيات
– و الإنسان مش بيبدأ يحس بالنشاط و الصفاء الذهني خلال اليوم غير بعد م يكون جسمه فعليا إتعود علي التعب
– و نفس الشئ بالنسبه للأكل الصحي
الإنسان ف البدايه بيركز علي شعور الحرمان من الأكل اللذيذ و مش بينتبه لحالة النشاط البدني بدل من حالة الخمول اللي كان بيسببها الأكل الغير صحي
– و بكده نقدر نقول إنه عشان نحس بالعائد القريب و البعيد لأي عاده إيجابيه محتاجين نصبر شويه لحد م مخنا يحول السلوك الإيجابي ده لعاده و هنا بييجي دور قوة الإراده اللي بنحتاجها في بداية إكتساب أي عاده جديده.
و أخيرا حابه أختم فقرتنا بمقوله معبره
« قليل دائم خير من كثير منقطع »
كتبه: فاطمة حمدى
اقرأ ايضاً:
افضل كورسات تعلم مجموعة ادوبي في شهر مجانا للمبتدئين
المخ البشرى The human brain
السبب في الكتابة باليد اليسرى وكتابة الاغلبية باليد اليمني