سماح هشامقصص نجاحمقالاتمقالات الاعضاء

سماح هشام..

كاتبة وروائية وكتابي التالت خلاص في السكة ادعوله
الكتابة هي علاج نفسي بالنسبة لي، بطلع فيها اللي جوايا وبشاور للناس على المناطق اللي المفروض يعالجوها..
من غير مباشرة ولا حلول سطحية، فلو قريت لي حاجة قبل كده هتحس إنك فتحت جرح قديم أو لمست حاجة كنت بتتجاهلها بدل ما تعالجها، وبشوف ده دور الكاتب والفنان عموماً مش إنه بس يمتع الناس بحاجة ليها قيمة فنية، لكن كمان ينور له مناطق الجرح جواه ويسيبه يتعامل معاها
مشواري طويل وقصتي مش قصة نجاح لإني لسة موصلتش.. ومش هطول عليكم وأقولكم إني عملت وسويت وبدأت من الصفر ووصلت وقوموا واجروا ورا حلمكم لإن الكلام ده مبيأكلش عيش.. 
ولإني كسماح كنت عايشة فترة طويلة في مية البطيخ وكلام التنمية البشرية اللي مش بيأكل عيش وفضلت عايشة في وهم إن أي حاجة أنا عايزاها هتحصل لو قررت ده ورددت ده، وأي حاجة وحشة هي بسببي وأقدر أغيرها أو عالأقل أغير تأثيرها عليا.. ومع الصدمات واحدة ورا التانية عرفت إن فيه حاجات كتير جداً عايزاها ومش هتحصل لإني بسعى لها غلط أو لإني من جوايا مش عايزاها فعلا (هنتكلم عن النقطتين دول بعدين) 
وفي حاجات كتير أوي هنفقد السيطرة عليها and it’s okay!! 
فخلينا نتفق اتفاق في كل البوستات اللي هكتبها..
1. لا نبقى متفائلين جدا لدرجة غير واقعية واحساس بالمكان اللي احنا عايشين فيه ولا نبقى سلبيين ونضيع الفرص .. خلينا في النص. ⁦
2. مية البطيخ هي المكان اللي بنرتاح فيه وبنقرر منعملش أي حاجة، فاحنا هنتكلم سوا مرتين في الاسبوع.. مرة عن الكتابة والقراءة وتريكات لو انت نفسك تدوس في المجال ده .. ومرة تانية عن مبدأ معين في حياتنا أو مشكلة بتقابلنا بشكل عام وبتعيشنا في مية البطيخ. 
3. عشان متسيفش البوست وتنساه كل بوست هيبقى في آخره سؤال مهم يخص الموضوع، وأحسن إجابة عليه هياخد نسخة من كتبي هدية مني عشان ركزت⁦ في البوست
اتفقنا؟!
كتب .بواسطه سماح هاشم

مقالات ذات صلة

زر الذهاب إلى الأعلى
إغلاق
إغلاق