تحفيزيمحمود غزلانمقالاتمقالات الاعضاء

من الانطوائيه الى شبح الكلام !!

رحلتى من الانطوائيه الى شبح الكلام الجميل بس فى المفيد او زى ما بيسمونى وزير الPR ..

الى الان معرفش مين سمانى باللقب ده الحقيقه بس انا ممتن له واتمنى اكون قد الثقه دى..انا النهارده مش هتكلم عن الفقره بتاعتى..=======================انا حابب احكى لكم قصة صغيره.. (هو ممكن مكونش بعمل حاجه ضخمه لسه بس انا فخور باللى بعمله وبمدى تاثيره فى الغير)معلش بقا استحملونى

😀 .. ويشرفنى ان كل واحد يوصل ل هنا انه يقرأ للاخر ^^ ..
انا حابب اعرفكم بنفسي انا محمود غزلان (وزير ال PR)
وبتجربتى البسيطه جدا اللى حاليا انا فيها 21 سنه…
حاليا انا فين ؟!= انا Public relations Specialist فى شركة من الشركات الجميله جدا وكمان شغال استشارى علاقات عامه وتسويق فريلانسرينج وانا لسه فى رابعه كلية (وللعلم انا كلية علوم) -جامعة الازهر- يعنى انا بعيد جدا عن مجالى انا شفت كارير زى ما بيقولوا
لازم فى حياة اى انسان تلاقى نقطة تحول (يوم معين تاريخ محدد وقت ما اتغير فيه) .. من الافضل للاسواء او من الاسواء للافضل .. على حسب الشخص .. ف انا نقطة التحول بتاعتى كانت ثانوى .. فى فترة ثانوى كان والدى عنده محل عطور .. كنت بروح اشتغل فيه واتعامل مع زباين وغيره ومن هنا بدأت اترتبط بالعملاء.. الكلام ده كان فى 1 و 2 ثانوى .. طبعا كان اسلوبى وحش شوية مع الزباين (كنت اوقات مش بعرف اتعامل واتكلم من مناخيرى ومفيش زوق خالص).. بس اكتسبت شوية مهارات فى ال Sales منه .. مكنتش بحب اروح المحل كنت مزهق والدى شوية معايا
المهم جت فترة تالته ثانوى وبداية الدروس والايام بتمر بتمر وياتى يوم كان فاصل مهم فى حياتى يوم 30-7-2015 ..
اليوم اللى جالى فيه خبر وفات والدى .. (نقطة التحول)لسه فاكر لحد دلوقتى التفاصيل بتاعت اليوم ده كله…
بتمر الايام ضغط الثانوية بيزيد عليا ضغط نفسي زياده يزيد عليا بسبب الوفاه .. بس مستسلمتش ولا نخيت ولا قولت لا انا هاجل احسن السنه دى عشان اعرف اركز السنه الجايه ..
لا دخلت وبقلب جامد وكنت بطلع مطمن انى مش هنزل عن 94% وهدخل اسنان ان شاء الله .. (الكلية اللى بحبها) -ثانويه ازهريه-عدت الايام وجت فترة النتيجه .. كام يا محمود .. 87.3% .. يا نهار ابيض.. علوم زي اخواتك!! (ملحوظه اخواتى الاتنين خريجى علوم برضه) .. بعد التعب ده كله تجيب علوم!!
عدت الايام .. التنسيق جاب لى علوم ازهر القاهره .. قسم ايه ؟! قسم فيزياء ورياضه..كمان…. يعنى مش هدخل حتى القسم اللى اثبت فيه نفسي .. قولت لنفسي لا انا هعمل التماس .. على كام درجة يا محمود ؟! على 6 درجات ..
*الشؤون* لا الالتماس بتاعك مش هيتقبل حول اسيوط افضل لك..(كان ملازمنى حاجه واحده بس هى جملة -الحمد لله-) .. خير خير .. احول اسيوط الكترونى.. *الشؤون* التحويل الالكترونى اتقفل .. متاح لك تاخد ملفك وتحول ورقى بنفسك .. يعنى هسافر اسيوط .. ربنا كان بيختبر الواحد تقريبا وبيختبر مدى صبره.. سافرت اسيوط وكان معايا اخويا..
قدمت الورق .. الدراسة هتبدأ امتى ؟! .. تبدأ ايه يا ابنى الدراسة بتدأ من اسبوعين وصحابك بدأو فى الاقسام واخدوا سكاشن اجرى على مدرجك… فلاش سريييع كده .. من الجرى على المدرجات والسكاشن والبهدله.. بعد شهر ونص شوفت اعلان عن تيم تطوعى اسمه MOIC .. عجبنى اوي الاسم وعجبنى اكتر افهم اي التطوع ده (اول مره اجرب ادخل حاجه مشابهة) .. حبيت اخوض التجربه (لازم من وقت للتانى تخوض التجارب وتجرب كل حاجه غريبه عليك) .. روحت عملت الانترفيو .. واتقبلت (الجزء ده اخويا الى الان ميعرفهوش

رغم انه كان معايا طول السنه لكنى كنت متحفظ بيه لنفسي عشان كان بيقولى متضيعش وقتك فى حاجات زى دى انا بدأت مسيرة التطوع فى اولى كليه ولو قريت الكلام ده يا محمد ف اعرف ان اخوك كان اسد وكان واخدها جد


التطوع بتاعى كان فى لجنة ال HR (امال ايه حببنى فى ال PR ؟!).. عمرى ما كنت افهم لا يعنى ايه تطوع ولا بحب اتعامل مع الناس (فاكرين معاملتى مع الزباين) .. ولا اجتماعى .. كنت انطوائى لابعد الحدود .. كنت ببقا متكتف على نفسي
بدأت فى التيم اتعامل مع الناس واشوف الطبيعه بتاعتهم ورغم انى كنت لسه فى اولى كليه يعنى المفروض جى سخن على الكليه الا انى كنت مختار انى لازم اغير من نفسي للاحسن واخد خطوه صح فى حياتى .. يعنى الكليه لو راحت انا الاقى نفسي..
وفعلا غيرت وبدأت اركز اكتر على تنمية مهاراتى الشخصيه .. روحت حضرت ندوى كانت بتتكلم عن كتابة السيرة الذاتيه CV
مع اول اجازة ليا بعد وجودى شهرين فى اسيوط نزلت البيت اخدت ال CV بتاع اخويا الكبير وقلدته بالظبط وعملت واحد مشابه له بالظبط .. كان فاضي بس كان انجاز عظيم ليا .. اول شهادة فى التطوع اخدتها كانت انجاز عظيم بالنسبه لتغيري ..
عدت اولى كلية وجبت فيها 84% (كان فاضلى 1%) و اجيب امتياز (كنت دحيح اوى ماشاء الله) وكمان اتطوعت وخرجت بره حيز الانطوائيه وبقيت اعرف اتعامل واكون علاقات وبقيت احسن وافضل .. بقيت احب اتنطط ..
جه وقت التحويل للقاهره بقا .. حولت القاهره ودخلت القسم اللى انا عايزه .. (كلية علوم جامعة الازهر القاهره) .. وفى القاهره بقا تزايد التنطيط فى الاعمال التطوعيه .. ما بين تيمات فى الجامعه عندى (اتطوعت فى عدد لا يحصى من التيمات) وايفنتات بره الجامعه تيمات بره الجامعه ورسالة وزيارات لجمعية رساله.. وزيارات لمستشفى 57357…
وهوب جت فرصه صغيره.. حضرت مؤتمر دولى للتحاليل الطبيه وتشخص الامراض .. حبيت مجال التنظيم فى المؤتمرات والكلام ده.. قولت لازم اقدم مع التيم اللى نظم المؤتمر ده السنه الجايه…
وفعلا حصل وقدمت معاهم وكنت ماسك بوزيشن هايل Head of organisation committee in Cairo (كنت انا اللى ماسك محافظة القاهره كلها تنظيم وتخطيط واداره للمؤتمر) .. وبعده طبعا اثبت شغل والاكاديمية دى كانت عايزانى اشتغل معاهم بس انا محبيتش اشتغل انا حبيت ابقا حر واتحرك واساعد الناس اكتر بالترينينج اللى كنت بنزلها وادرب تيمات وغيره
كنت بحب التنطيط اوى مشاوير من مدينة نصر لعين شمس وتجارب وتعاملات وادخل جامعات كتير واتعرف على دكاتره محترمين ناس عظيمه فى مجالاتهم
تدريجى تدريجى فى نهاية تانيه كلية بدأ صحابى يتكلموا معايا عن التطوع وازاى نستفيد منه وانا احكى لهم فوايده وازاى بيساعدنا نتاهل للسوق وافهمهم واربطه بالمجال بتاعنا بعد التخرج (الميديكل ريب) اللى كان بسمع لشخص ممتاز جدا جدا فى المجال ده وهو دكتور ابراهيم عبد الواحد اللى بعد فتره قررت ارد له الجميل
توالى بعد كده التطوعات فى تيمات كتيررررررر اوى اوى فى الازهر وبره الازهر انا نفسى مش متذكر كم التيمات التطوعيه اللى كنت فيها.. كنت بتنطط وعينك ما تشوف الا النور Head لجنة على Vice Head على Member على Delegate .. وغيره وغيره كتير.. كنت بشرح للناس اللى فى اللجان واعلمهما كتر واتعمق اكتر فى المجالات وادور على اليوتيوب واعلم نفسى…
عدت الفترة دى لقيت صحابى بيجوا يسالونى على التطوع ونعمل ايه ونجهز للدنيا ازاى وامور مشابهة لكده ودردشه مع ناس صحابى فى امور مختلفه وبيقولوا لى غزلان احنا عايزين نعمل تيم تطوعى نساعد بيه الشباب الصغير .. يالا نحط الخطه ونشوف الدنيا هتمشى ازاى وكلنا مع بعض ..
بدانا انا وصحابى نخطط ونقرر وفى اجازة تالته عملنا التيم على الواتس وبعدها عملنا بيدج وبعدها عملنا (Recruitment) كان حصل شوية سقطات وعقبات بس ده طبيعى جدا يحصل .. بس بدات الدنيا تتحسن تانى وبدات الدنيا تمشي افضل وبتخطيط افضل ..
التيم اتعمل والناس موجوده .. حطينا خطة تدريب والدنيا تمام التيم كله اتدرب .. يوم 29-11-2018 .. كان اول ايفنت للتيم وكسر الدنيا فى الجامعه عندنا وفيه رديت الجميل لناس غالين عليا زى دكتور ابراهيم عبد الواحد و دكتورتى فاتن الفقى وكانوا اسبيكرز فى الايفنت..
عدت الايام وتتابع نجاحات التيم وعملنا اول سلسلة ورش عمل لمدة شهر متواصل لتعليم الطلبه سوق العمل بسعر رمزى متناهى الصغر .. (غطي اجر القاعه والاسبيكرز)..
تمر الايام واستمر فى تحقيق هدفى اللى دايما كنت بسعى له ..
*محو مصطلح السبوبه من حياتنا*.. كنت بدرس فى الوقت ده بالكورسات الاونلاين وغيرها من الايفنتات اللى بحضرها مجال ال PR العلاقات العامه
بدأت اركز اكتر على المجال ومدى انه مجال مهدور حقه ومحدش بيقدره ولا يقدر فايدته ..
بدات اقرر انى انمى نفسي بنفسي (ذاتى من النت اخدت كمية كورسات اونلاين لا تعد ولا تحصي وكنت بلف حولين الكورسات اللى بفلوس عشان اخدها ب اى طريقة مجانا او الاقى لها كوبون ولو ملقيتش بشتريه عشان اخده) ..
نزلت ترينر للمجال فى التيم عندى ضمن الورش اللى كانت معموله لمدة شهر وعلمت فوق ال40 شخص عن المجال ده كل حاجه انا اتعلمتها وفهمتها ..
جت الاجازة بدات ازود نفسى واعمل جروبات واتس واعلم ناس جديده البى ار وعملت السنه دى اكبر جروب بى ار على الفيس ضامم حاليا 800 فرد ..
اتعلموا كلهم بى ار بصوره ممتازه .. وعملت 5 راوند واتس اب تعليم برضه مجال ال بى ار .. كل راوند 50 فرد .. وصل العدد الى الان اكتر من 1000 شخص اتعلموا بى ار وفهموا مدى ارتباط المجال بحياتهم وانه مش كلام مرسل وانه مش سبوبه يتعمل منها كورس ب 1500 او 3000 او غيره زى ما كنت بقرأ الاسعار وبتصعقد لما اقرأ المحتوى والاقيه اللى انا بقدمه مجانى هو هو اللى بيتقدم ب فلوس..
انا قررت امحى فكرة ان الانسان ميقدرش يعلم نفسه بنفسه محيت فكرة التسويف .. محيت فكرة السبوبه وان كل حاجه لازم لها مقابل .. انا المقابل عندى دعوه صادقه لوجه الله ..
عدت الايام واشتغلت فى المجال بجد (مش تطوع بقا) .. مسكت مشروع لشركة طلبوا منى ترتيب خطه ممنهجه للتدريب فى الشركه .. وتمت الحمد لله ..
طلبونى فى ايفنتات كتير خلال الفتره الاخيره ك Speaker وناس عرضوا افكار مشاريع عليا لكن للاسف اغلبهم كنت بعتذر لهم لان المواعيد مش متناسبه معايا فيهم واخرهم كان ايفنت فى اسوان وكان كل شيئ مجهز الحجز وكل حاجه لكن اعتذرت قبلها بفترة بسبب التزاماتى لكن انا عند وعدى بكل حاجه انا مقرر اساعد اكبر عدد ممكن بشرط انى امحى مصطلح السبوبه من حياتنا.. وهعمل كده بإذن الله
حاليا انا مسؤول علاقات عامه فى شركة وانا لسه طالب فى رابعه كليه…
وقريب ان شاء الله هيكون فيه شغل تانى مع العزيز عليا (وزير الشغل) زى ما اتفقنا وان شاء الله نقدر نمحى مفهوم السبوبه فعلا من حياتنا عموما ونوصل لمرحله اننا نكون ذى اثر فى حياة الناس حولينا ..
وحاليا انا مقرر اكمل الافاده دى واعلم و افهم واعرف الناس ان مفيش حاجه اسمها فشل انا طالب لسه فى رابعه كلية وشغال حاليا فى تلات حاجات .. ما بين فريلانسرينج وشركة وكمان ماسك2 تيم تطوعي.. ده غير الاماكن اللى بتتعرض عليا لكن للاسف الضغط بيفرض عليا انى ادى كل مكان حقه فقط
اى حد عايز يكون اى حاجه يقدر يكون اى حاجه .. وعمرى ما انسا الكلمتين اللى حسام هيكل قالهم فى ايفنت من الايفنتات اللى حضرتهم له (الكورسات والايفنتات والكلام ده كله جميل بس مفيش اجمل من انك تنزل كده فى الشغل تاخد لك قلمين على كام شلوت تتعلم منهم صح الصنعه)
وانا قررت انى اعلم وافيد وانا فى مكانى و اكمل الهدف بتاعى من تعليمى لغيرى وانى افهمهم يعنى ايه سعى ..
بعتذر على الاطاله .. طبعا قصتى بسيطه جدا وسط الشخصيات العظيمه فى الجروب لكنى كنت حابب احكيها .. وهختم بالهاشتاج بتاعى اللى مصاحبنى فى حياتى كلها القصيره دى ( السعي حلو ) ..
نفسك انت اللى بتختار عايزها تكون عامله ازاى. ومكمل بإذن الله فى مسارى وناوى اعلم الناس يعنى ايه تعليم ذاتى ويعنى ايه اصلا تطور نفسك وتاهل نفسك وناوى اكتر ارجع حق العلاقات العامه ومدى اهميتها.. وناوى فى الفقره بتاعتى انى اخليها مرحله فاصله لكل واحد فى حياته
اختار انت عايز تكون ايه فى حياتك .. قيمه ولا بلا قيمه …
ولكل واحد بيقول عليا (وزير الPR) صدقا انا نفسى اكون عند ثقتك فيا دى جدا .. واخد ب ايدكم واساعدكم فى كل حاجه وانا حطيت نفسي فى الريسك ده عشان يوم ما دخلت الكليه ملقيتش حد يقولى الخطوط العريضه دى
عايز اشكر كل الناس اللى بتقدر بجد .. انا بشكركم جميعا وبإذن الله ناوى اكون قد الثقه العاليه دى
عذرا على الاطاله رغم ان الافعال اللى عملتها مش كبيره اوووى بس اللى واثق منه ان فيا طاقة اساعد بيها مصر كلها ان شاء الله (بس كده هو ده انجازاتى فى الحياه الى الان والحقيقه مش بحب اذكر شهادات اخدتها او كده لان مفيش اكتر من الورق عندى .. لكن انا مؤمن ب ان التعليم مش ب ورقة الشهاده .. التعليم بالممارسه والفهم)

مقالات ذات صلة

زر الذهاب إلى الأعلى
إغلاق
إغلاق