بسمة عبدالحميدمتنوعمقالاتمقالات الاعضاءنصائح

واحد من الاسئلة اللي ممكن تقابلك في الانترفيو ان ميبقاش فى سؤال..!!!

عشان تشتغل مدرس إنجليزي إنهم يكونوا عايزين يتأكّدوا إنك بتقدر تتعامل مع الطلبة اللي مستوياتها مختلفة. مينفعش تقول لهم لأ أنتم لازم تحطوا لي الطلبة المبتدئين لوحدهم والمتوسطين لوحدهم واللي مستواهم مُتقدِّم لوحدهم. ما هو لو كان عندهم الإمكانية دي مكنش ده هيبقى تحدي هم بيعانوا منه وعايزين حد يتعامل معاه كويس

طبعاً مفيش مشكلة إنك تقول لهم إنك ممكن تعمل امتحان تحديد مستوى ماشي على الـ CEFR،
اللي هو مرجع بنقدر نحدد على أساسه أهداف كل مستوى وهتلاقيه متقسّم لـ
A1
A2
B1
B2
C1
C2

كل واحد من دول بيمثّل مستوى إيه بقى؟

طبعاً بعد ما فهّمتهم إنك فاهم إن فيه حاجة اسمها CEFR
وإن احنا مش ماشيين سبهللة زي اللي بيحصل في بعض المراكز اللي بترزع أي حاجة والسلام… تبتدي تقول لهم عن أول طريقة ممكن تستخدمها تحل بيها المشكلة دي من غير ما تهمل طلبة عشان طلبة تانية.

أولاً أنت هتعمل امتحان كده يديك فكرة مين مستواه إيه، و مش لازم تشارك الدرجة مع الطلبة في الحالة دي في البداية عشان خاطر بس محدش يبوّخ على حد، خصوصاً الأعمار الصغيرة. الهدف إنك لما تعرف مستواهم هنبتدي نقعّدهم في مجموعات بحيث المستويات المتشابهة مع بعض Homogeneous Groups.

وبعدها هنديهم نفس الماتيريال بس هنغيّر نوع النشاط على حسب مستوى كل جروب.

مثلاً لو هنِدّي كل المجموعات نفس قطعة القراءة / القصة:
1- الجروب المبتدىء هيكون مسئول عن إنه يجاوب الأسئلة البسيطة بتاعة الفهم
2- الجروب المتوسط هيطلّع كل الكلمات ومضادتها من القطعة
3- الفريق اللي مستواه مُتقدِّم هيغيّر مثلاً جزء من الأحداث أو هيعمل presentation يلخّص بيها الجزء ده

دي واحدة من الطرق اللي ممكن نحل بيها المشكلة دي مع حفظ ماء وجه البطابيط بتوعنا بدون ما حد يحس إنه أقل من زميله، نكمّل باقي الحلول للتحدي ده والتحديات التانية اللي ممكن نقابلها في باقي المقالات القصيرة الجاية إن شاء الله.

كتب بواسطة بسمه عبدالحميد

مقالات ذات صلة

زر الذهاب إلى الأعلى
إغلاق
إغلاق