ليه بيتزا هَت و دومينوز بيتزا بدأوا يعملوا (شو) بخطوات تحضير البيتزا قدام الناس و بيصوروها فيديو كمان ؟
Domino’s Pizza
Pizza Hut

ليه المطاعم بدأت تعلن عن نفسها باستخدام فيديوهات تحضير الأكلات الشهيرة بتاعتهم ؟

ليه مراكز التدريب بدأت تستخدم المُحاضرين في تسجيل فيديوهات للترويج لدوراتهم التدريبية ؟

ليه شركات الطيران بدأت تستعرض شكل و هيئة المضيفات و الطيارين و تتكلم عنهم ؟

من الوهلة الأولى هانقول لأنهم عنصر من عناصر التميُز عندهم و ده عادي انه يحصل
لكن لو دققنا النظر هانلاقي إن ده مكانش منتشر بالشكل ده زمان

قبل كده كنت تشوف كلام عن جودة مكونات (البيتزا)و فخامة (الطيارة) و شياكة (المطعم)
و حالياً معظم الكلام على العامل (البشري) لدرجة انك بترتبط بالشخص أكتر من المكان في أوقات كتير.

نطلع من البوست ده بإيه ؟

أولاً
السوشيال ميديا ماتعملتش في الأساس علشان نتكلم عن المحلات و الشركات، و ده اللي بدأت المنصات تاخد بالها منه و تحاول تخلي الحسابات الشخصية أكثر وصولاً للجمهور من الصفحات، و كمان الجروبات أصبحت أكثر رواجاً من الصفحات.

ثانياً
تكرار الكلام عن جودة المنتجات بتخلي الناس تزهق و بسرعة تفقد الثقة في كلام الإعلانات

ثالثاً
السوق بيلف يلف و يرجع يعتمد على
الـ word- of-mouth
يعني بنرجع تاني بطبيعتنا نثق في كلام الأفراد أكتر من الجُمل الدعائية و كذلك إثبات الجودة بشكل عملي عن طريق الفيديو بيزيد الثقة بشكل كبير.

رابعاً
حاول تعمل لنفسك و للعاملين
معاك Personal Branding سليم
مش مجرد واجهة شيك بدون قيمة حقيقية وراها

خامساً
البوست ده غير مدفوع عادي

جملة_مفيدة

بدون_تعقيد

MarketerAziz

كتبه | محمد عزيز