نصائح لحياة افضل 2020: 10 نصائح لتطوير نفسك وشخصيتك

في المقالة دي هتكلم عن تجارب شخصية اللي استفدت منها و اخدت منها نصائح لحياة افضل 2020 واعتقد انهم ممكن يفدوك.

10 نصائح لحياة افضل 2020

4 نصائح تخص وقتك ورؤيتك للمستقبل

١. متستناش حد يجي يصلحلك حياتك فجاة “محدش غيرك هيلعب دور المنقذ فى حياتك ” فابدأ دلوقتى انقذ نفسك.

٢. حدد وقتك وابدا وتاكد أن الحياة مش سهلة ” لقد خلقنا الانسان فى كبد “.
بالتالي, كل مشكلتك ومشكلتى اننا بنحدد وقت لكل حاجة وفى اغلب الاوقات دى بتكون اوقات تكفى ال task ولكن احنا بندخل ال tasks فى بعضها ..

فمثلا ممكن تكون حاطط ساعتين مذكرة, نص ساعة فيس, خمس ساعات شغل.
تلاقى نفسك وقت الشغل بقي معاه فيس ووقت المذكرة بردوا بقي معاه اكل ووقت الفيس ممكن تفكر ف المذكرة !!.. فبص بقي علشان تنجز وتعيش سعيد
وقت الجد للجد بس وكنسل اى شئ.. ووقت اللعب للعب بس وكنسل الجد لو جالك هتبسط ” عيشها صح “.

نصائح لحياة افضل 2020

٣.اعمل خطة للمستقبل القريب وخطة للمستقبل البعيد.
اعمل كل ما فى وسعك لتحقيقهم ولو محققتهمش او حققت جزء منهم صدقنى مش هيكون اسوء من ان يكون معندكش خطة ولا هدف اصلا بل بالعكس هيبقي نجاح جزئي وعن تجربه ” ما لا يدرك كله لا يترك كله “.

نصائح لحياة افضل 2020

٤. كلنا جوانا طاقة تشغلنا سنين وكلنا لينا عقل يوصل لنتيجة كويسة ولكن باختلاف الطرق. فمش لازم تمشى نفس طريق غيرك.

عشان كده, امشى طريقك بتفكيرك حتى لو موصلتش يبقي تحملت نتيجة تفكيرك انت واتعلمت
“عيش حياتك كسبان هدف او تجربة”

٥. عندنا بقي اكبر شبحين فى عقلنا” الناس والخوف”
شبح الناس قالوا بيقولوا هيقولوا باختصار سيبك هيتكلموا كدا كدا يا صديقى
” دا الناس متفقتش كلها على وجود ربنا هيتفقوا عليك انت يا غلبان ! “.

الخوف بقي دا سلاسل وجنزير وحيطان هتمسك فيك وتتقل وزنك لحد ما تسويك بالارض !
عشان كدا متخفش وجرب فى حكمة بحبها بتقول ” من يهاب صعود الجبال يعش امد الدهر بين الحفر “.
ها ناوى تعيش فين !! ” يا فوق يا تحت مفيش بين البنين اختار مكانك على راي الجوكر”.

نصائح لحياة افضل 2020

3 نصائح لحياة افضل 2020

٦. هبدا منين ..
طيب المشوار طويل كلمة بنقلها كلنا ..
بص يا سيدى اى شئ يستاهل انك تبدء فيه ابدأ ولو بطريقة عشوائية بس المهم ابدأ والتنظيم هيجي بعدين ..
لو مكسل تذاكر وكل ما تيجى تذاكر تضيع ساعتين ترتب الأوضة والمكتب وتتعب تقول المرة الجاية هذاكر ..
يبقي مترتبهمش !!
جرب تقعد ع الارض او على المكتب مش على كرسى المكتب
جرب تمسك الكتاب وانت واقف واعمل نفسك انشتين واقف ادام مكتبته بيطلع اي كان اللى هتقراه فى الوقت دا
وبالحالة دى هيكون افضل من انك متقرأش حاجة خالص وتكسل ولا اية !  ..
ولو حتى هتقرا الفهرس بس صدقنى هتستفاد.

٧.حتة بلاش اسال علشان مبنش غبى او مش فاهم ..
متخفش اسال ولو هتبان غبى !!!
” بان غبى مرة افضل من ان تظل غبى طول الوقت .. دا مثل صينى “

نصائح لحياة افضل 2020

٨. حاجة كمان بقي كنت بعانى منها كتييير لحد فترة قريبة بلاش بلاش بلاش تلعب دور الضحية كتير فى حياتك
وافضل متلعبوش خالص
” اصل محدش بيحس بوجعك وانت بتحط دماغك ع المخدة بليل !! “
و متلعبش بردوا دوى الظالم  ” خد حقك وادى الناس حقوقها “.

اخر نصيحتين تخص الانطباع الاول والثقة في النفس

٩.فى كام مفتاح بقي حلوين اوى يا ريت نخليى بالنا منهم هيفتحوا سكك كتير ومش بيكلفوا حاجة وهما:
“ابتسم لما تقابل حد او تخش مكتب حد” ” أن شالله لو موظف حكومة!”
دا الانطباع الاول

“قول لو سمحت ديما ومن فضلك واختم كلامك بشكرا مع ابتسامة “
جرب كدا خش ع اى شخص مكتب ولو عندك مشكلة قوله من فضلك مع ابتسامة بستاذنك تساعدنى فى كذا… وابقي احكيلى عن تغير ملامح وشه للافضل وهيساعدك اد اية

” قلل من استخدام صيغة الامر فى الكلام ”
قول لأى حد ولو صغير سنا او مستوى او مكانه قوله ” بستاذنك تعمل كذا او لو ممكن بس نعمل كذا ؟ “
هيستجبلك فورا حتى لو مش عاوز يعملها!
“مفاتيح تعامل بسيطة استعملها “

١٠. ثق فى نفسك ثق فى نفسك ثق فى نفسك انت جاى تكمل الدائرة مش زيادة عليها والا مكنتش اتخلقت . من غيرك مش هنكمل

اقرأ ايضاً:

ازاي تبدء ويكون عندك مشروع على الانترنت او E-Business
ملخص كتاب قواعد السطوة للكاتب روبرت غرين
تعلم اللغة الألمانية من الصفر وأهم المعلومات التي يجب عليك معرفتها