انواع الدهانات للحوائط : الفرق بين الدهانات البلاستيك والزيت

هنكلم في المقالة دي عن انواع الدهانات للحوائط وايه هو الفرق بين الدهانات البلاستيك و دهانات الزيت في التشطيب.

بند الدهانات

بند الدهانات يعتبر من أهم البنود في التشطيب لأنه بيدي جمال وروح للشقه
مبدأيا الدهانات زي المزيكا ، ممكن تبقي مزيكا هاديه وتفصلك عن العالم وممكن تقلب شعبي ومهرجانات.

– التجهيز لبند الدهانات:

قبل ما نتكلم في البند ده ، لازم نقولكم على مرحلة مهمه جدا قبل ما نشتغل ف الدهانات، خلصنا سباكه وكهربا ؟ هنجيب حد يشتغل في “مرمات المحاره” والمرمات دي اماكن التكسير في المحاره مكان السباك والكهربائي .. المرمات دي فيه ناس بيستسهلوا وبيجيبوا اي مبيض محاره ويشتغل فيها بدون ما يراقبوه او يركزوا ف الفنيات اللى لازم تتم في المرمات.

فحضرتك بتجيب مبيض محاره كويس وبتجيبله: أسمنت ورمل وبتوفرله المياه، وجركن من مادة ” أديبوند ” ودا بيعلي خواص المونه اللى بيشتغل بيها مبيض المحارة بحيث إنها تمسك في المحاره القديمة كويس وبتجيب الجركن ده من اي شركة زي #سيكا أو #كيماوياتالبناءالحديث CMP. بتجيب كمان سلك شبك، ودة بيتحط على وش أي مجموعة خراطيم بحيث المكان دة بيكون عرضه إن المحاره تفصل فيه بعد كدة وتشرخ .. فاحنا بنحطه ف الأماكن دي عشان متفصلش وتتسبب لينا مشاكل بعد كدا احنا في غني عنها.

انواع الدهانات للحوائط

انواع الدهانات للحوائط

انواع الدهانات للحوائط: الفرق بين الدهانات البلاستيك ودهانات الزيت:

هنوضح الفرق بين الدهانات البلاستيك والزيت لان في ناس كتير مبتكونش عارفه ايه الفرق بينهم.
1- الدهانات الزيت : دي دهانات أساسها زيتي، ودي دهانات قابله للغسيل عادي، عشان كدا زمان كانوا بيستعملوها بكثره.
2- الدهانات البلاستيك : دي دهانات أساسها مائي وغير قابله للغسيل عشان كدا الناس كانت متخوفه منها ومبتتجهش ليها لحد ما عملوا دهانات بلاستيك قابلة للغسيل انتهت الدهانات الزيت، يعني قليل أوي لما تلاقي حد عامل شقته دهانات زيت، كله بلاستيك دلوقتي.

انواع الدهانات للحوائط : ماركات الدهانات البلاستيكية

عندي ماركات كتير طبعا في السوق ولكن الماركات المضمونه والمستعملة بكثره هي ( جوتن – سكيب – سايبس – الجزيره – ناشيونال ).
فكل اللي عليك إنك بتشتري معجون جاهز وبويه، المعجون ده بنسميه معجون التأسيس، والبويه بلاستيك بتتباع جوه #بستله او #جازله .. البستله بيكون مقاسها كبير، والجازله بيكون مقاسها صغير.

وانا رايح اشتري لازم أخد بالي من شوية حاجات في انواع الدهانات للحوائط

1- درجة اللون: ودي بتختارها من كارتلة الألوان وبتكون دهانات كمبيوتر يعني بتختار الدرجه تطلع هيا اللي اختارتها مش حاجه قريبه منها.
2- درجة اللمعان: فيه عندي 3 درجات ..#مط ودا تحس ان الدهان مطفي كدا ومش حلو بصراحه، #لامع ودا تحس ان الدهان بيبرق أوي ومش حلو برضو، #نص_لمعه وده حاجه وسط بين الإثنين اللي فاتوا وده أحلى واشيك.
3- القابلية للغسيل : هتلاقيه بيقولك في حاجات قابله للغسيل وفيه حاجات غير قابله للغسيل ، الأحسن طبعا زي ما قولنا القابل للغسيل.

انواع الدهانات للحوائط

الخامات التانيه اللي هتحتاجها :

  • سيلر مائى (أحسن سيلر من شركة جوتن).
  • معجون للحوائط والأسقف (GLC أو جوتن او سكيب).
  • صنفره.
  • تيب.
  • بلاستيك للبطانه (بلاستيك أبيض رخيص).
  • علب ألوان مركزة (من سكيب).

ازاي ابدأ في تنفيذ بند الدهانات

1- هتجيب النقاش يبص على الموقع، بعد كدا هيكتبلك الخامات اللي هيحتاجها هتروح تشتريها، وهيقولك أنا هنزلك يوم كذا نبدأ الشغل.

2- أول خطوه النقاش بيعملها لما ينزل الموقع حاجه اسمها (مراشمة الحوائط) يعني بينضف الحوائط من الأتربة وبواقي الجبس، إما بسنفره أو حجر جلخ أو سكينة معجون.

3- وش سِلر : بندي للحيطه وش من مادة السلر عشان تقفلي المسام بتاعت الحيطه، عشان متشربش ماية المعجون.

3- مرحلة التأسيس : ويقصد بها مرحلة #المعجون.
طيب ليه أنا بحط المعجون أصلا ما ممكن أدهن علي المحاره وأخلص نفسي ؟
انا مش عايز ملمس المحاره الخشن انا عايز لما اجي أحط ايدي علي الحيطة تديني ملمس ناعم، المعتاد إننا مينفعش نعمل أقل من 2 سكينه معجون، ولو المحاره #مخدومه يكفي سكنتين، إنما لو المحاره تعبانه فهنحط من 3-4 سكاكين، وبعد كدا #اصنفر الحيطه عشان أنعمها، ودي أول مرحلة استلام بتأكد فيها ان مفيش دبابيس في الحيطه ( حته كدا بتكون زي راس الدبوس ).

انواع الدهانات للحوائط

4- التلقيط ( مرحلة تابعة للمعجون ): ودي بنلجأ ليها لو في أماكن معينه فيها #ريجه فبجيب المعجون وبلقط الحته اللي فيها عيوب.

بكدة يبقي انتهيت من مرحلة تأسيس الدهانات لأنه النقاش هيقف فترة لتركيب السيراميك وبعد كدة هيرجع يكمل في تشطيب الدهانات.
بعد مالسيراميك ينتهي، هينزل النقاش يكمل شغله.
ويبدأ يشوف حالة الحوائط ويظبط أي خبطات حصلت من صنايعية السيراميك بالمعجون
ويصنفرها كويس وينضف الحوائط من الاتربه ويبدأ في مراحل الدهانات الاخيره وهيا التشطيب.

5- مرحلة ال Finish : ودي بعملها علي مرحلتين:

  • #بطانة_الدهانات : بتكون وش مخفف من البويه اللي انا هدهن بيها عشان أكتم المعجون بحيث مياخدش رطوبه من الجو.
  • #النهايات : بتكون بوية شحمه وأدهنها إما 2 وش أو 3.

6- لو عملت جيبسم بورد، بياخد نفس المراحل بس نوع السيلر العازل بيختلف عن السيلرالعادي، بتجيبه ” باتريك سيلر ” والصنايعي هيقولك عليه باترننج سيلر.

عندنا التنفيذ بيمر بشوية مراحل بسيطه اوي:

استلام الدهانات

1- قبل ما اطلع استلم اتاكد اني غاسل ايدي كويس عشان متبصمش علي الدهان.
2- العيوب اللي ممكن الاقيها ان الحيطه متكونش ساتره بمعني “مش شحمه” فتيجي تبص علي الحيطه تلاقيها مكشفه، وحلها اننا نعمل وش كمان.
3- مابين سحبة الرولا والتانيه ساعات بنلاقي خط، يبقي النقاش محتاج يلقط الكلام ده.
4- ساعات تلاقي الدهانات مسيله بنسميها #دمعه نتيجة ان الرولا متعصرتش كويس فلازم يظبط الكلام ده برضو.
5- نستلم اهم حاجه طبعا درجة اللون.
6- عشان اضمن ان النقاش مبيشتغلنيش في عدد السكاكين لازم اخلي كل سكينة معجون بلون مختلف ( ابيض و بيج واطلع استلم كل واحده فيهم.
7- استلم منه علي الاضاءه النهاريه واستلم منه بالليل لما تنور الشقه ، حطله في كل مخرج اناره لمبة، لان الإضاءة لما بتضرب على الحوائط والاسقف بتكشف أي عيوب في الحوائط.
8- لازم تستلم من النقاش أول بأول، ومتستهونش أبدا بالبند دة لأن دة خلاص الشكل النهائي للشقه عندك.

انواع الدهانات للحوائط

شويه نصائح كدا

  1. اتاكد قبل الدهان انك مغطي كل مخارج الكهرباء والحلق بتاع الباب والاكره والوزره السيراميك والأرضيه كمان.
  2. اتاكد ان النقاش عمل عدد سكاكين المعجون اللي انتوا متفيقين عليها 2 او 3 وخليه يعمل كل سكينه بلون واحد مثلا ابيض والتاني بيج مثلا بحيث وانت طالع تشوف تعرف هو عمل كام سكينه معجون.
  3. النقاش لازم ينتهي من دهانات السقف قبل دهانات الحيطه.
  4. لو عايز اعمل شوية ديكورات في الدهانات ( رسومات) بنعمله علي ورق اسمه #استنسل وبيكون مرسوم عليه الرسمه اللي انا عاوزها.
  5. الالوميتال يفضل تركبه بعد اول وش لون مع الابواب.
    ومعاهم شاسيهات ولقم الكهربا وأي ديكورات خشبية تركب، ولو هتركب كرانيش جاهزة، تركبها لأن النقاش هيحتاج يقفل عليهم.
  6. خلي بالك ان أي مخرج اضاءه لازم تركب فيه دواية ولمبة على الأقل ولو فيه سبوتات تركب قبل مالنقاش يخلص عشان متتفاجئش بالعيوب اللى بتظهر بعد الاضاءه ما تركب.
  7. هتجيب عينات من كل لون، كيلو من كل لون ومتجيبش كميات الألوان كامله لأن اللون ساعات بيختلف>
    غالبا بيختلف على الحيطة بدرجه اغمق، والالوان مبترجعش.
    هتخلي النقاش يعملك عينات علي الحوائط وتتأكد ان الالوان مظبوطة ..
    وترجع تشتري الالوان بتاعتك بالكميات المطلوبة وتحتفظ بأكواد الدهانات لانك غالبا هتحتاجها في يوم من الايام لو حصل اي مرمه في حيطه.

انواع الدهانات للحوائط بسبب تعدده

  1. فيه عندي كذا نوع من الدهان ادخل اتفرج عليهم علي النت:
  • دهانات ترخيم.
  • دهانات اسبونج بس دي لازم تكون زيت.
  • دهانات تعتيق.
  • دهانات سواحيلي.
  • دهانات البيرل.
  • دهانات الفيلفيد.
  • دهانات القطيفة.
    بس خلي بالك ان اي دهانات غير البلاستيك بيكون ليها حساب تاني مع الصنايعي.
    فيه موجود في السوق ورق حائط 3D وبيكون شكله تحفه، بس لو هتعمل ورق حائط هتعمله بس علي الحيطه الرئيسية او عمود مثلا.

– لو فايتك أي بوست من سلسلة التشطيبات والديكور، أو مقال كتبته قبل كدا علي الجروب، هتلاقيهم هنا بشكل مرتب علي موقع الجروب ..
من هنا

بند_الدهانات

شطب_صح_تعيش_مرتاح

كتب بواسطة : احمد طه عطوه

اقرأ ايضاً:

افضل 5 كورسات تعلم adobe lightroom للمبتدئين من الصفر حتي الاحتراف
أهم خطوات النجاح وكيفية السعي والوصول للنجاح
النصائح العشر للحصول علي الرضا الوظيفي