اسرار طباعة الكتب :الكشف عن خرافة الطباعة الخشرومية !!

في المقالة دي هنتكلم عن اسرار طباعة الكتب خرافة الطبعة الخشرومية!!
مشكلة الكاتب والمؤلف اليومين دول إنه يبقى “مشهور” لإن للأسف نجاحنا مرتبط برأي الناس والفيدباك بتاعهم ودي حاجة مينفعش نكتفي فيها بنفسنا وخلاص لأ انت مقياسك من الناس.

اسرار طباعة الكتب

في عصر أحمد مراد ومحمد صادق «مع كامل احترامي للأشخاص» لكن للأسف هما مجرد هاويين وفاهمين الموضوع غلط ..

وبعيداً عن الانتقادات حبة أوصل صورة معينة هي خرافة الطبعة الخشرومية.

خرافة الطبعة الخشرومية هي نظرية بيمشي بيها 99,9% من دور النشر في مصر عشان يزودوا المبيعات.
الخرافة دي بتظهر للقارئ إن الكتاب الفلاني اتطبع منه 50 طبعة! أو 100 طبعة أو مبالغات أزيد بكتير..

معقول في حد يتطبع له عدد الطبعات دي كلها وميبقاش مشهور عالمياً؟ معقول حد يكون محتوى كتابه (تافه) وتبص عالغلاف تلاقي الطبعة ال32؟! معقول فعلاً كل الناس دي اشترته؟! طب هل هو مشهور فعلاً؟!
ولكن السؤال الأهم هو .. إزاي؟ باع كل ده إزاي؟!!
هبسطهالك..

رينج الطبعة الواحدة للكتاب في المعدل الطبيعي يتراوح ما بين 500 لـ 3000 نسخة من الكتاب..
حسب رغبة الكاتب وقدرته المادية على طباعة العدد ده
500 نسخة ده عدد كبير جداً على إن حد يشتريه ..
كبير فوق ما تتخيلوا لإن الناس بطلت تقرا.. خاصة لو الشخص مش معروف!

أمال إيه اللي بيحصل؟!

اسرار طباعة الكتب

الطباعة

طباعة الغلاف بتتم من خلال تجميع حاجة اسمها “زنكات” وهي 4 طبقات للغلاف ..
الديزاينرز هيفهموا إن الألوان الأساسية للطباعة 4 ألوان (أحمر ـ أزرق – أصفر – أسود)
درجات الأربع ألوان دي باختلافها بيختلف ألوان الغلاف وده يمكن بنشوفه في اي ابليكشن للايديت على الصور..
لكن في الطباعة الأمر بيختلف..

بتتم طباعة الغلاف على 4 طبقات كل طبقة بلون.
يعني لو انت شغال في مطبعة وبتشوف غلافك وهو بيتطبع هتشوفه كل مرة بلون مختلف على لوحة كبيرة وبماكينات معينة بيتم دمجهم عشان يطلع الغلاف الأساسي اللي انت مختاره!

اسرار طباعة الكتب

تمام كده؟! لحد هنا مفيش مشكلة

المشكلة بتظهر إن كلمة (الطبعة الأولى) بتتكتب بلون موحد (مبتبقاش مزخرفة أو ملونة بألوان كتير) ..
يعني أبيض مثلاً.. الأبيض تبع اللاير اللي لونه أسود..
عارفين ده معناه إيه؟!
يعني لما الغلاف يتطبع على 4 مراحل زي ما قولنا مرحلة منهم هتكون هي اللي شايلة الكلمة (الطبعة الأولى)

ساعتها من السهل جداً طباعة 100 غلاف كل غلاف منهم شايل رقم طبعة مختلف! ليه؟
لإن الموضوع مش مكلف مطلقاً هو مش بيطبع من الأول (لإن ده مكلف جداً)
هو مجرد بيشيل لاير وبيطبع لاير جديد على نفس الغلاف .. بتقريباً نفس التكلفة!

وصلتك كده نص الصورة ..

اسرار طباعة الكتب

طب هو ليه هيعمل كده؟

وحتى لو عمل كده عشان يبيع ويفرقع طب ما الطبعة 500 نسخة! هيبيع ازاي 30 طبعة؟!!!

حبيبي هو مش مضطر يبيع أصلاً..
الطبعة ممكن توصل ل100 نسخة أو 50 بس!
ده غير إن في حاجات بتتطبع بعدد الطبعات علطول ..
يعني بسم الله الرحمن الرحيم الكتاب ده هينزل منه 50 طبعة.. يلا 10 مكتوب عليهم الطبعة الأولى و10 التانية و10 التالتة وهكذا!!

معرض القاهرة السنة اللي فاتت شوفت بعيني واحد بيسأل حد في جناح دار نشر وبيقوله محتاج الطبعة الأولى من الكتاب ده.. قاله هتفرق إيه ما تاخد دي..
قاله لا غالباً بتبقى منقحة ومتعدلة.. قاله لا متخافش احنا طابعين كله زي بعضه قبل المعرض عشان الوقت مقضاش واتزنقنا..

الولد قعد مصمم ان الكتاب ممكن يكون متعدل وهو عايز اول طبعة وهو يقوله لا والله احنا فعلا طبعنا كل الطبعات مع بعض!!!!!

الكتاب كان مكتوب عليه الطبعة التالتة تقريباً

اسرار طباعة الكتب

ولإن الـ halo effect بيشتغل عند الناس كلها.. فجأة بتسمع عن الكتاب ذو الطبعة الخشرومية.. تقراه تلاقيه تافه.. فهيحصل حاجة من الاتنين :

1- يا إما هتفتكر إن المؤلف ده معروف عالفاضي وهو مش كاتب ولا يمت للكتابة بصلة ..
وهتحبط ومش هتكتب حاجة.
2- يا إما هتفتكر إن هي دي نوعية الكتب اللي الناس بتحبها.. فهتحبط ومش هتكتب حاجة برضه!
ده غير تأثير السوشيال ميديا وشغل الماركتنج الغير قيم عند بعض دور النشر..
عشان الكتاب يبيع.. والكتاب حقيقي مبيقدمش حاجة غير هري..
لكنه بيبيع فعلاً..
وبيوصل لعدد طبعات مهول جداً.
والناس بتضرب كف بكف ومش عارفة إيه اللي بيحصل.

#سماح_هشام

كتبه | سماح هشام

اقرأ ايضاً:

تحميل كتاب جرعة نيكوتين مجانا pdf

كيفية تأدية صلاة التراويح في البيت خلال شهر رمضان

رجاء الجداوي اخر هوانم السينما المصرية : كيف بدأت مسيرتها الفنية