اضطراب الشخصية الهستيرية وسماتها وعلاجها
(انتحرت بسبب الهستريا)
في المقالة دي هنتكلم عن اضطراب الشخصية الهستيرية وايه صفاتها وازاي نقدر نعالجها وكل حاجه محتاجين نعرفها عن الشخصية دي.
الشخصية الهستيرية
ازاي يبقي شخصية حد سبب في انتحاره ؟!!!
طبعا كلنا عارفين ممثلة الإغراء المشهورة “مارلين مونرو” الي انتحرت بسبب جرعة مهدئات زيادة سبب الإنتحار .. لو كنت ذكي كفاية هتستنتجه لوحدك بعد لما تخلص البوست
لو جينا نبص لحياة مارلين هنلاقيها شخصية هستيرية من الدرجة الأولي
أتجوزت مرتين مرة لاعب بيسبول و مرة الكاتب المسرحي و المثقف العالمي “أرثر ميلر” ده غير علاقاتها الجنسية الي عدت ال56..!!
اصل الكلمة
كلمة “هيستريا” أصلا كلمة يونانية مشتقة من كلمه “هسترو”.
وهو الرحم و كان بيعتقد اليونانيين زمان ان الرحم عضو جوة المرأة ممكن يتهز و يتحرك جوة عادي فبيسبب ظهور أعراض الهيستريا
الأول محتاجين نفهم ايه هي أساساً صفات الشخصية الهستيرية دي ؟!!
صفات الشخصية الهستيرية
مبدأيا هي بتبقي شبه شخصية الاطفال بالظبط يعني لو تأملت شخصية حد هستيري هتلاقيه كأنه طفل كبير
1) لازم يلفت انتباه كل الي حواليه و هو الي يكون دايما محور الانتباه او زي ما بيتقال” واكل الجو “.
و طبعا الستات الي من النوع ده نادرا مهتلاقي عندها أصحاب بجد
و بتعيش دايما ف دور ” أصلهم بيغيروا مني عشان انا أحلى منهم ” و بلا بلااا بلاااا
لأن مفيش بنات كتير هتستحمل صحبتها تبقي كدة..
2) درامايين لأقصي درجة
ممكن تتخيلها عندهم حدة انفعال رهيبة دايما بيكبروا الموضوع او اي مشكلة بتحصلهم عشان يعيشوا في دور الضحية عشان يستعطفوا الي حواليهم من باب ” انا طيب و مظلوم و كله جي عليا ”
و دايما تحس سلكوهم مفتعل و مصطنع fake كدة مش تلقائي و عفوي
3) أنانيين جدا و عندهم مرض حب الظهور و بيحبوا يعتمدوا ع الي حواليهم و في نفس الوقت يكونوا هم الي مسيطرين ع الموقف دايما ..
4) أكتر ناس بتعمل عمليا تجميل و اسرع ناس بتتجوز بسبب حلاوتها و (مياصتها) و برضو أسرع ناس بتطلق
5)بيحبوا يبقي دايما شكلهم perfect مس مجرد حلوين لا لازم تظهر أحلى واحدة ف الفرح
او أحلى واحدة ف اصحابها أحلى واحدة في اي حتة و في اي مكان
عشان كدة أسلوبها بيبقي ناعم أوفر كدة تحسها مش تمام
وعندها دايما خطة ان لازم الي قدامها يقع في حبها عشان كدة في الغالب بتبقي متعددة العلاقات
يعني ممكن ترتبط باتنين او تلاته و يمكن اربعه في نفس الوقت فلو واحد متجوز ست هستيرية ياريت ندعيله..
6) حساسين جدا تجاه النقد الي هو يأما تمدحني يأما مسمعش نفسك و بيتأثروا بأراء الي حواليهم بسرعة ، مزاجهم دايما متقلب و معندهم صبر و مبيعرفوش يحافظوا علي وجود العلاقات في حياتهم لفترة طويله
7) بيهددوا كتير بالانتحار و معندهمش نضج انفعالي و لا جنسي و في الغالب بيبقوا باردين جنسيا زي “مارلين مونرو” برضو
➖➖➖➖➖➖
= طب ماهو أغلبنا فينا الصفات دي كلنا عايزين نبقي أحلي حد و دايما يبقي شكل جميل ؟!!
– اصلا الصفات الهستيرية دي هي الي بتخلينا مؤنثين بس لازم نعرف نستخدمها أمتي و فين و مع مين مش يكون ده العادي يعني و لو الصفات دي مش موجودة فينا هنبقي بنعاني من شخصية الست المسترجلة ظاهرة ال”Tom Boy”
= و بكدة نقدر نستنتج حاجتين :
– “الحاجة الاولي”
و الي هتفرح فينا الجنس الذكوري ان الغالبية العظمى من الشخصيات الهستيرية *ستات*
بس خلينا نبص للجانب الإيجابي
و نحمد ربنا علي انها من الستات اصل الست مهما دخلت في كذا علاقة مع بعض هتقرف من نفسها و هتحاول تتغير لأنها هتحس إنها متاحة للجميع و دة عكس فطرتها،
أما لو كانت الغالبية للرجالة فهيعتبرها انه دنجوان زمانه و الستات هتقطع نفسها عليه ده غير ان اهتمامه الأوفر بنفسه و كلامه و طريقته هيخلوه راجل لا مؤاخذة يعني اكيد فاهمين تقصد ايه
“الحاجة التانية” إن الشخصية دي غذاها و أهم حاجه عندها ف الكون *الإهتتماااممم* و بتفضل تدور عليه بكل الوسائل المتاحة و المش متاحة و الصح و الغلط و كل حاجه تيجي في بالك بقي
طب لو محصلتش ع الاهتمام ده بتعمل ايه ؟!!
مرض اضطراب الشخصية الهستيرية
– هنا بقي انا هكلمك عن مرض “الهيسرتيا” او “الاضطرابات التحولية”
و دي بيلجألها جسم الهيستيري بلا وعي كوسيلة دفاع عنه او هروب من الواقع الي ملقتش فيه الاهتمام الي عايزاه او بسبب صراع او ضغوط جواها .. و بتبقي نوعين..
1) جسدية :
* “العمي الهستيري”و فيه المريض مبيشوفش برغم ان مفيش اي تلف عضوي او سبب حقيقي
* “الشلل الهستيري” و فيه الشخص بيفقد قدرته علي تحريك جزء معين في جسمه او شلل نصفي كامل
* “الحمل الكاذب ” و بتكون فيه أعراض الحمل كلها لدرجة ان بطنها بتبقي منفوخه زي الحوامل بالظبط و ده ييبقي بسبب رغبتها في انها تبقي ام و خوفها من ان حد يقول عليها عقيمة
* “فقد الأحساس” الشخص. مبيحسش بأي ألم حتي لو حرقته او عورته بسكينة و ده بيكون مع الشلل الهستيري
= و طبعا غلط ندخلهم مستشفي عشان كدة هنثبت الأعراض دي عليهم و هنوهمهم اكتر انهم مرضي..
2) إنشقاقية :
زي نوبات الإغماء و الصرع و الإنفصال
” تقمص شخصيات كتير غير شخصيته” عشان كدة دي بتبقي أمهر ناس ف التمثيل و فقدان الذاكرة جزئي أو كلي او نسيان موقف كامل ..
➖➖➖➖➖➖➖➖
سبب مرض الشخصية الهستيرية
طب ايه أصلا بيخلي الشخصيات دي هستيرية ؟
– الوراثه لو كانت مامتها او جدتها شخصية هستيرية البنت او الحفيدة شخصيتها زيها
– نقص الثقة في النفس
– الضغوط العصبية و النفسية زي الصدمات القويه او العلاقات العاطفية الفاشلة
– الصراع بين غرايزها انها تكون محور اهتمام اي حد بكل الطرق الي ممكن تكون مش مقبولة و بين معايير المجتمع و العرف و التقاليد
– الانانية و بتكون سبب كتر الدلع في الطفولة
– ورم في المخ او ضعف قشرة المخ و دول الي بتبقي رفيعه لدرجة النخافة و ده كان رأي ” بافلوف “
– إدمان الكحول و نوبات الهوس و إضطراب ثنائي القطب
➖➖➖➖➖➖➖➖➖
علاج المرض ده
* طب ايه علاجهم ؟!
ماهو لازم يتعالجوا لأنهم هيكونوا مكروهين و منبوذين من الناس و من اقرب الناس ليهم كلها و هيطلقوا و هيتعقدوا و هينهاروا تماما..
1) المواجهة لازم نواجههم بصفاتهم المش مقبوله دي عشان يبقي مستبصر بمرضة و نساعده علي فهم نفسه و مشكلاته بدل الهروب من الواقع
2) العلاج النفسي : التنويم بالإيحاء عشان تقدر تقنعوا انه مش اعمي و لا مشلول و لا حامل و لا نيلة
3) العلاج التدعيمي : زيادة الثقة بنفسه و نعلمه طرق يقدر يتكيف بيها مع الواقع و ازاي يخلي الناس تحبه لشخصه
4) العلاج الطبي او باالكهربا في حالات الصرع او العلاج الوهمي “البلاسيتو”
5) تحسين البيئة الاجتماعية الي حواليه و تقليل الضغوط الي حواليه.. نفهمو يعني من الاخر و نحاول نعالج الاسباب الي وصلتوا للشخصية دي
6) و أخيرا بقي ” التمثيل ” مفاجأة مش كدة!!
➖➖➖➖➖
ازاي نتعامل مع الشخصيات دي
طب لو في حياتنا شخصية هستيرية نتعامل معاها ازااي ؟!!
1) تجنب النقد السلبي يعني يا تمدحهم يا بلاش عشان كدة هتدمر ثقتهم في نفسهم الي هي اصلا شبه منعدمة و هيكرهوك و ممكن يقطعوا علاقتهم بيك أصلا
2) أظهر إهتمامك بيهم جدا و بأدق تفاصيلهم ده بيفرحهم جدا و هتحافظ علي علاقتك بيهم و هتقوي ثقتهم في نفسهم و ألفت انتباههم للحجات التانيه الي ممكن يتميزوا بيها غير الشكل و اللبس زي الثقافه و العلم و النشاطات المفيدة
3) قوي علاقتك بيهم و متزمهمش و لا تبعد عنهم هم مختاروش يكونوا كدة كل واحد ليه وسائل بيلفت بيها نظر الناس و فيه مبيحبش حد يلاحظة اساسا و برضو كل واحد ليه وسائل هروبه و تكيفه مع الواقع.. هم مش ناس وحشة بس ناس اختارو وسائل تكيف غلط و ” من كان منكم بلا خطيئة فليرجمها بحجر “
اقرأ ايضاً:
الدولة الفرعونية القديمة: الملك سنفرو
اسرار طباعة الكتب :الكشف عن خرافة الطباعة الخشرومية !!
الكتابة هي افضل طريقة للتخلص من الاكتئاب !!