الفرق بين الرخام والجرانيت لتشطيب شقتك صح
إيه الفرق بين الرخام والجرانيت ؟
ناس كتير بيجي في دماغها السؤال ده، ومبتكونش عارفه الفرق الجوهري بينهم، في المقالة دي هنوضح بشكل مبسط جدا ايه الفرق بينهم.
الفرق بين الرخام والجرانيت
الرخام :
- ده حجر رسوبي.
- بيمتص ومنفذ للماء.
- العجينه بتاعته أضعف من الجرانيت.
- الرخام أغلب ألوانه فواتح ومش منقط ولكن هتلاقيه فيه عروق او تشابيح (زي السحاب كدا ).
الجرانيت :
- حجر ناري.
- أكثر صلاده وغير منفذ وغير مسامي ولا يمتص الألوان.
- العجينه بتاعته اقوي من الرخام.
- كل الجرانيت ألوانه غوامق وتلاقيه منقط كدا.
مصدر وصناعة الرخام والجرانيت:
مصر من الدول الكبيرة في صناعة الرخام والجرانيت لأن سلاسل جبال الأحمر كلها رخام وجرانيت.
طيب مين دول تانيه عندها رخام وجرانيت؟
(ايطاليا – الصين – الهند – باكستان – ماليزيا – اندونيسيا).
وبالنسبة للمسميات بتاعت الرخام دايما بتكون بناءا علي حاجتين ( لونه – مكانه ).
يعني مثلا فيه رخام اسمه ( أحمر أسواني – أسود أفريقي – جلاله – أخضر هندي – كراراه ايطالي).
والمنطقة المشهوره بالرخام في مصر هي منطقة #شق_التعبان
طيب ازاي الرخام بيوصلنا بالشكل اللي بنشوفه ده ؟
طبعا الرخام بيتقطع من الجبال علي هيئة بلوكات والبلوكات دي لسه هتتقطع شرايح وتتباع بالمتر.
والبلوك ده بعد كدا يروح مصنع الرخام عشان يتقطع شرايح بمكنه اسمها واترجيت.
وبعد ما تتقطع شرايح بيكون اسمها طاولات سمكها 2 أو 4 سم، بعد ما يقطعوه طاولات يلمعوه بمكن جلي الرخام.
وبعد الطاولات نقطعه ترابيع ودي اللي بنركبها بقي، وممكن نقطعه درج للسلم.
ومهم جدا لما نيجي نقطع الرخام نشوف هنقطعها ازاي والعروق تطلع معاك مظبوطه.
الفرق بين الرخام والجرانيت في التركيب
إيه الأفضل الرخام والجرانيت ولا السيراميك والبورسلين ..
بص فيه قاعده في الديكور بتقول إنك كل ما استخدمت خامات طبيعية في المكان كل ما يبقي مريح نفسيا ف أكيد الرخام والجرانيت مفيش افضل منهم ولكن مشكلته انه غالي.
الرخام والجرانيت بيتركب بالظبط بنفس طريقة تركيب السيراميك والبورسلين لكن فيه فروق بسيطه اللي هيا:
- إننا بنزود المحتوي الأسمنتي شويه في حالة الرخام والجرانيت.
- لما أجي أركب الرخام قبل ما أركبه أفرزه الأول وننقي اللي شبه بعضه ونحطه جمب بعض، حتي الصنايعية بيعملوا ساعات تجميعه للعروق عشان الرسمه تبقي مكمله، وفيه حاجه اسمها رخام open book ادخل ابحث عنه وشوف صوره واستمتع.
لما أركب الرخاام أحرص ان اللحامات بتاعته متبانش.
طيب فيه حاجتين بعملهم عشان افنش الرخام ولحاماته متبانش :
- بسقي اللحامات بماده اسمها زملكه
دي عباره عن معجون في الاصل عباره عن كُوله وعليها الوان معينه + بودرة الرخام
وساعات بيكون معاهم اسمنت ابيض وبنحطها في أماكن الكسر وأماكن الخدوش وفي اللحامات. - بعد الزملكه بجيب الجلايه
ودي عباره عن مكنه بيركب عليها من تحت حجر جلخ وده حجر بيصنفر
فبنرش المايه علي الارض وبعدين بحجر الجلخ يصنفرها
وبنجلي الرخام من 3 – 5 وشوش لحد ما الرخام يكون بيلمع تماما
بالنسبة للجرانيت مبيكونش لمعته سوبر زي الرخام لان الجرانيت حجر قاسي مهما لمعت فيه ميتلمعش.
فعشان تعمل جرانيت لمعه سوبر لازم يكون جايلك مجلي من المصنع.
لو عندي رخام سلم او رخام حائط او عمود لازم يكون جااي متلمع من المصنع، لأن الجلايه مش هتعرف تمشي عليه .
طيب احنا امته بنركب الرخام علي الحيطه ؟
1- مدخل عماره.
2- واجهة محل.
3- مسجد.
4- حوالين المبني من بره ودا بنسميه رخام السفل أو السليكو وارتفاعها بيكون من 30 سم – 1 متر، وفايدته غير انه منظر جمالي إلا انه بيحمي جدران المبني من اسفل من الرطوبة.
ازاي بنركبه حول المبني ؟
بيركب الرخام بحيث انه يبقي رأسي تماما وبيثبتوه بشكل مؤقت ببؤج جبس وبيكون ورا الرخام مسافه من 2-3 سم.
ومن تحتها بردم برمله بحيث اقفل من تحت، وبروح اجيب بستله ويحط فيها مايه وأسمنت صافي.
ويكون محتوي الأسمنت عالي ويقلب ويعمل لباني أسمنت وبالبستله يدلق في الفراغ ويسيبه كدا يوم وبعدين يفك البؤج ف هتلاقي الرخام أصبح جزء من الحيطه.
بس فيه عندي مشكله، إن الرخام لما بيجي بيكون ظهره شبه ناعم، فتماسكه مع المونه كويس عشان حجر طبيعي لكن وحش عشان ظهره ناعم، فبنخشن الرخام من ظهره بفضل حديد التسليح او كسر الرخام او السيراميك ويلزقها بالكوله في ظهر البلاطه وبعدين نلزق الرخامه.
تركيب الرخام في وجهات المباني :
لو عندي مبني وعايز أعمل كل واجهته رخام، ف الطريقه البلدي دي مش هتنفع في الارتفاعات الكبيره، الطريقه اللي تنفع في الحاله دي هيا الطريقة #الميكانيكة، ودي عباره انه بيفتح فتحه في الرخام اسمها #تخويش يعني يقطع في السمك بتاعها وبعد كدا تتركب بمسامير.
بس فيه عندي ملحوظتين :
1- لازم لو بتعمل رخام لواجهة كبيره تعزل وراها عزل رطوبه، لأن الرخام بيكون وراه فاضي ولو دخل شويه مايه في الفراغ ده هيبوظ الدنيا عند الناس والحيطه هتلاقيها بتنشع عندهم ، وطول الوقت فيه مسافه فاضيه بين الرخامه وبين الحيطه ف المسافه الفاضيه دي بيدخل فيها حشرات وفئران، ف البيتومين ده ماده سامه ولما بيتدهن مستحيل الحشرات تمشي عليه.
2- يفضل املي في الجزء السفلي من المبني مونه، لأن الجزء السفلي ده معرض للكسر لو كان وراه فاضي.
رخام السلم
طبعا كلنا عارفين ان السلم مكون من نايمه وقايمه وكل مجموعة درج اسمها قلبه واللي بين القلبتين اسمه فانوس السلم والجنب بتاع السلم اسمه فخدة السلم.
الجزء البارز من النايمه بيسموه انف الدرجة وتخانة الانف اسمه باستونالدرج وعادة الباستون ده لازم يجي بدوران عشان يديني شكل جمالي والدوران ده بيسموه حليه، وبيعملوا كدا حاجه في النايمه عباره عن 3 خطوط غائره في الرخام اسمهم فرمله ، وبتتعمل عشان وانت طالع متتزحلقش ، وعادة بتتعمل في المباني اللي عليها حركه كتيره (مستشفي – جامعه ).
دلوقتي الدرج ده عشان اركبه لازم اظبط المنسوب بتاعه ، طيب ازاي انا هظبط الدرج بتاعي في الرخام ، لازم تكون معايا شوية داتا عشان اعرف اشتغل رخام السلم:
1- تكون عارف منسوب تشطيب الدور اللي تحت ومنسوب تشطيب الدور اللي فوق لان ممكن الادوار متكونش لسه متشطبه ومنسوب التشطيب ده انا بعرفه من الشرب ، لو مثلا المسافه بين الشربين 3 متر يبقي المسافه بيت التشطيبين 3 متر برضو ، فهنعمل حاجه اسمها #تقسيط_الدرج يعني دلوقتي انا عارف ان الارتفاع الراسي بين المنسوبين 3 متر فبروح افتح اللوحه المعمارية واطلع منها عدد الدرج ف طلع مثلا 20 درجه فهقول 3 متر / 20 درجه هيطلع 15 سم ، يبقي ال 15 سم دول هما ارتفاع النايمه الواحده.
2- لو ميل السلم في الخرسانه مش مظبوط ببني طوب علي الدرج عشان استعدل ميل السلم.
3- ارتفاع رخامة النايمه بتكون 11 سم (15 – 4 سم ) لان سمك النايمه 4 سم ، وسمك القايمه بتكون 2 سم، والدرج بيتباع وبيتركب بالمتر الطولي.
4- وزرة الرخام اللي راكبه علي حيطة السلم اسمها تلابيس
الفرق بين الرخام والجرانيت في الاستلام
1- لو ارضيات او حوائط نفس طريقة استلام السيراميك ولكن في الرخام لازم نتأكد من سلامة الرخامه ولو فيه عيب في الرخام يستبعد ، اما لو كان العيب بسيط فيتزملك.
2- بالنسبه للسم اتأكد من عدد الدرج وارتفاع القوايم وعرض النوايم والدرج كله لو شديت عليه خيط يكون كله واحد ، والخيط بشده علي انوف الدرج.
3- لو درجة البادي ودرجة الناهي القايمه والنايمه بتاعتهم مظبوطين وشديت خيط علي الانوف وطلعت مظبوطه فانا مش محتاج اقيش عرض كل نايمه وارتفاع كل قايمه .
4- زاوية التقاء القايمه مع النايمه لازم تكون زاويه قائمة وأتأكد من افقية النايمه .
5- الدرجه لو كانت فيها سنه ميل لبره استلمها ، بس لو مايله لجوه 1مم ارفضها ،عشان ماية المسح بتاعت السلم.
6- لازم استلم التلابيس واحط عليها اده والمفروض الاده دي تسلمني كل التلابيس مظبوطه واتاكد من راسيتها.
7- لازم التلبيسه تكون بنفس ارتفاع الدرجة.
كُتب بواسطة/أحمد طه عطوه
اقرأ ايضاً:
ما هو الادمان السلوكي و علاج الادمان السلوكي