ما هي الشخصية النرجسية: الاعراض وكيفية التعامل معها

( انت مغرور )

أضطراب الشخصية النرجسية

السلام عليكم …. في المقالة دي هنتكلم عن اضطراب الشخصية النرجسية واعراضها واسبابها و ازاي نقدر نعالجها.

 الموضوع ده بيتلخص في أغنيه “مغرور” بتاعت عمرو دياب و بيجسدها مهرجان اكرم حسني الي بيتقال فيه
” جرا ايه يا طاووس يا نافش ريشك قدام المراية ! “
و أغلب مهرجانات محمد رمضان بقي الملك و نمبر وان

مفيش حد فينا معداش عليه في حياته شخصية نرجسية و خصوصاً الرجاله نسبك النرجسية عندهم ضعف الي عند البنات.

فلو كانت الشخصية دي علي هامش حياتك كدة تحمد ربنا لكن لو حد قريب منك و علاقتك بيه قوية يبقي لازم تتأكد انك مش مريض نفسي.
لأن أغلب الي بيتعاملوا مع أشخاص نرجسيين او مضطربين بشكل عام بيتحولو لمرضي نفسيين و لو هم جامدين أوي ع الاقل بيعانوا من قلة الثقة في نفسهم.. 

الشخصية النرجسية

ايه هي الشخصية النرجسية

 طب مين أصلا الشخص النرجسي ده عشان نتجنبه و نشوفه نقوم جاريين علي طول ؟!

الشخص النرجسي ده حاجه شبه الطاووس كدة الي بيبقي نافش ريشه ع خلق الله كأن مجابتهوش ولادة.
اللي هو يا أرض اتهدي ما عليكي أدي و إنه محور الكون ، حد مغرور جدا و سطحي اوي بس بيحب يظهر عكس كدة.

الشخصية النرجسية

كأنه خارق و بيطلع نار من بوقه و مش اي حد يفهمه لازم تبقي عبقري او ذكائك عالي اوي عشان تعرف تتعامل معاه او تبقي حتي جزء من حياته.

و بيعظم قدراته جدا الي هو لو كتب قصه قصيرة بيتباهي بيها كأنها روايه خدت أوسكار في الأدب الانجليزي.
و لو فتح بس غطا الإزازة بيعتبره عمل قومي و لازم تسقفلوا و تنبهر بيه و بيكره جدا ان حد ينتقده لأنه هو دايما صح و مبيغلطش و انت الي دايما غلط.
و عندهم جو قلب الترابيزة دة بقي هواية يعني لو هو غلط في حقك عنده قدرة إقناع فظيعه يحسسك انت بالذنب.

و مع ذلك مبيعرفش يمتن لأي حد علي حاجه عملها له و لا حتي يندم علي فعل غلط في حق حد و قليل الذوق جدا. بيقدر يأذي الي قدامه بأبسط كلمه و كمان بيبقي قاصد.
عمره ما بيقدر يحط نفسه مكان الي قدامه او يتعاطف مع حد و أناني لاقصي درجه ممكن تتخيلها.

اللي هو أنا و بعدي الطوفان ، عامل فيها ابو العوريف عارف في كل العلوم و كل الثقافات و كل البني ادمين و جماعه أنتو مبتسفادوش من علمي خبرتي المعدومه ليه؟!

السؤال هنا : طب ما فيه ناس كتير كدة يبقي كلهم كدة مضطربين و محتاجين يتعالجوا ؟! 

الشخصية النرجسية

فرق بين الشخصية النرجسية و أضطراب الشخصية النرجسية

و هنا أحب أقولك ان فيه فرق بين الشخصية النرجسية و أضطراب الشخصية النرجسية NPD.
إنك ممكن تكون شخصية نرجسية جواك بأفكارك تجاه نفسك انك مفيش زيك و تجاه الناس انهم أقل منك لكن ده مبيخرجش براك.

لكن الاضطراب ده بتأذي بيه نفسك انك بتخسر اقرب ناس ليك و مبتعرفش تعمل علاقات أصلا و بتأذي الناس بكلامك و قلة ذوقك و معاملتك الزفت و محتاج تتعالج. 

طب ماهو عادي يعني هو كدة كل واحد عنده ثقة في نفسه حبتين يبقي نرجسي ؟!
لا طبعا لأن الي عنده ثقة في نفسه عنده قدرات أصلا وعارف قدرها كويس فبيثق في نفسه.
يعني لو انت بتقول علي نفسك كاتب فظيع و فعلا انت كاتب كذا كتاب و فيه إجماع انك ناجح يبقي دي ثقة بالنفس.
ودي بالمناسبه اسمها “نرجسية صحية ” لأنها بتفيد صاحبها و بتحمسه يبقي احسن عكس النرجسي الي بيضخم كل إنجازاته و قدراته كأنه سوبر مان! 

و بالمناسبة كمان النرجسية بتبقي طبيعيه في فترة في حياتنا قبل البلوغ والمراهقة عشان بنحتاج نحب نفسنا و نقدر نفسنا اكتر.
لكن بتبقي اضطراب لو الواحد متجاوزهاش و فضل فيها لحد ما يكبر و ينضج فللأسف بتبقي جزء من شخصيته 

الشخصية النرجسية

شخصيات عامة نرجسية

الشخصية النرجسية

من كلامي عن الشخصية النرجسية طبعا انت حسيت انهم ناس مقرفه اوي و متكبرين و ربنا يعافينا.
بس أحب أقولك أن فيه دراسه بتقول أن أغلب القادة و الرؤساء و حتي العلماء الناجحين ذو فاعلية و إنجازات كانوا شخصيات نرجسية.

زي ” هتلر ، نابيلون بونبارت ، الأسكندر الأكبر ، ستيف جوبز ، بيل جيتس ، مادونا حتي دونالد ترامب رئيس أمريكا كان نرجسي.
لأن ببساطة هم بيبقي عندهم إصرار رهيب انهم أحسن من الناس و عندهم قدرات خارقه فالي بيستغل إصراره صح منهم هو الي بيقدر ينجح و بيتميز كمان.

فيه دراسة عملوها علي 300 طفل في إيطاليا أدوا الأطفال فيها أمتحانات و كان نتيجه الأطفال النرجسيين أعلي من الاطفال الي مستوي ذكائهم أعلي من النرجسيين.
و ده بسبب إصرارهم و تحديهم دايما للي حواليهم ” ليه يارب مخلقتنيش نرجسي “. 

الأسطورة


الكلام خدنا و نسيت بقي احكيلك أسطورة ” نرجس ،نركسوس ، نرسيس ” و الي جه منها أسم النرجسية و تعريفها اصلا.

نرجس ده يا سيدي كان أبن الإله كيفيسيا و الحورية ليريوبي.
وكان فخور بقي بنفسه و شايف ان محدش زيه و لا في جماله
وكان بيقع في حبه كل البنات و كلام في سرك الولاد كمان.
و في مرة وقعت في حبه حورية الغابة ” ايكو ” تخيل كدة تحبك حورية وانت تتغر عليها و تتجاهلها.

طبعا جرح كرامتها جدا و كسرها و احنا صنف لو اتكسر لازم يعورك بفتافيته.
فراحت لألهه الإنتقام و عملتله زي سحر كدة او لعنة انه يحب نفسه بس مش الهري الي بيتحكي ده لا يعني هو مش عارف شكله!!.

هو في يوم كان بيشرب من البحيرة و شاف إنعكاس صورته في البحيرة بس اللعنه كانت في انه يفتكر ان صورته دي جنية تحت المياه و فعلا حبها.

وفضل قاعد جنبها ليل و نهار لحد ما مات مطرحه و كما يقال نبتت مكان موته زهرة النرجس المعروفه.
 كيدهن عظيم فخد بالك 

الاسباب اللي بتخلي الشخص نرجسي

طب ايه الي بيخلي النرجسي ده كدة و فيه الصفات الي بتخلي اي حد يكرهة كدة ؟!

 أولا : كالعادة بتبقي وراثة لو الأب مثلا او الام نرجسيين و دول العيشة معاهم بتبقي مرااار و احمدوا ربنا
ثانيا : العوامل الكيميائيه بقي في الجسم و الهرمونات و كدة
ثالثا : العوامل الثقافية في دراسه أثبتت ان المجتمعات الفرديه زي أمريكا نسب النرجسيين فيها أعلي بكتييررر من من المجتمعات الجماعية زي الشرق الأوسط 
رابعا : و دة الأهم بقي التربية يا جماااعهه يعني ما يبقوش بتربوا عيال متعرفش معني الادب و تف علي عمو يا حبيبي و كمان يبقوا مرضي نفسيين مش ناقصين قرف بقي.

في أسرات بيربوا عيالهم علي أنهم مينفعش يغلطوا لازم يعملوا كل حاجه علي أكمل وجه.
و كمان بعد كل ده بيوبخوهم و مش بيقدورا مجهودهم.
أما بقي العامل الاساسي في التربيه النرجسية بيبقي “المدح” أمدح عيالك يا سيدي بس متفسدهمش.

 و العلماء قسموه نوعين :


1) مدح شخص الطفل” person praise “:

وده زي إنك تفضل تقوله أنت عظيم انت محصلتش انت ازاي كدة او تسقفله انه غسل ايده بدل ما يمسحها بالمناديل مثلا.
و ده المدح الي بيفسد و بيخليه ينهزم و يحبط بسهولة و لو فشل بيحس بالعار.


2) مدح اداء الطفل ” process praise ” :

وده انك تمدح الاشياء الي بيعملها و طريقته في ادائها
زي انت عملتها حلو اوي انت عملتها بسرعه انت حليت بذكاء.
وده المدح المفيد الي يخلي الطفل عنده ثقة في نفسه من غير ما يحسسه أنه لازم يبقي أحسن من الي حواليه و يكون ده هدفه اصلا 

ازاي نتعامل مع الاشخاص دي

الأشخاص دي نتعامل معاهم ازاي ؟!

بص هي الناس دي منظر منفوخ بس لكن هم من جواهم اصلا بيعانوا من ضعف الثقة في نفسهم جامد.
وفعلا بيواجهوا مشاكل نفسيه كتير و لو حد منهم راح للدكتور النفسي بيكون رايح يتعالج من الاكتئاب او القلق المفرط.
او قله ثقته بنفسه و إحساسه بالدونية بس ده جواه هو بس و لو أعترف بوجوده يبقي دي أول خطواته في التخلص من نرجسيته 

 لكن هقولك تتعامل معاهم ازاي ع حسب درجه قربهم منك .. 

 يعني لو مديرك مثلا نرجسي و محتاج مجاملات و فخامتك و مولانا

ده تمشي معاه بمبدأ ” إن كان ليك عند الكلب حاجه قوله يا سيدي ”
بدل متترفد و تفضل تعيط و إحنا مش ناقصين بطالة

لكن لو زميلك في الشغل او حد علاقتك بيه سطحيه و مش محتاج علاقته اصلا ولا وجوده مهم

فيا سيدي اعتبرها ثواب و امدحه و خلاص زي ما قولت هما بيعانوا فعلا من ضعف ثقتهم في نفسهم.
لكن أول ما يبدأ ياخد عليك و تحس انه هيركبك او يشوف نفسه عليك
أديه بقي علي عينه و عرفه حدوده كويس

 لو بقي مامتك او باباك او أخواتك او صاحبك الأنتيم او الأنيل من كدة مراتك او جوزك

فخد فيهم ثواب بس متاخدش رأيهم في أهدافك او إنجازاتك عشان هيقللوا منها و هيفضلوا يقللوا من ثقتك في نفسك
فحط دايما حدود بين أحلامك و بينهم و ابني سور بين ثقتك ف نفسك و أنتقادهم ليك و عن تجربة

و نروح لأهم حاجه خطيبك او خطيبتك او فيه اي علاقه اصلا

مش هقدر أقول غير “أجري يا مجدددييي ” قبل متلبسوا لأنهم في الأول هيغرقوكوا حب و إهتمام أوفر بقي
لحد متقعوا في الفخ و بعدين هيسحبوه مره واحدة
و هيحسسك إنك دايما الي مقصرة و هو ملاك و هاتيلي واحد بس ف المجرة بيعاملك أحسن مني و هيخليكي تفقدي ثقتك في نفسك قبل الي حواليكي علي أساس ان محدش بيحبك و عارف مصلحتك اكتر منه و من نفسك انتي شخصياً.

ده غير إنه مش مسموحلك تكسبي اي نقاش حتي لو بيدور حول سعر الخيار النهاردة.
لأن هو الي عارف و فاهم كل حاجه و طبعا أستاذ في قلب الترابيزة عليكي و عمره ما بيعترف بغلطه.
حتي لو حصل و أعترف لازم يطلعله ما لا يقل عن خمستلاف مبرر
وبيحسسك انك ناجحه بس بدعمه و تشجيعه ووجوده ف حياتك.

مش عشان مجهودك و لا حاجه كأنك صفر ع الشمال و بيخليكي مع الوقت تقتنعي بكلامه و وجهات نظره.
حتي ف نفسك و ف شخصيتك و بيعرف يستنزفك عاطفيا و إنك متستغنيش عنه في ابسط قرارات حياتك.
و ده بينفع معاه اووي الشخصية الاعتمادية الي أصلا عايزه حد يقودها و تبقى تابع دايما

لكن في علاقتك بالنرجسي أختصري دورك ف العلاقة كلها علي إنك طبله ليه و لإنجازاته و مصدر لإشباع نرجسيته
مش اكتر فانسي أنك تندميه او يحس بقيمتك و الجو ده
لأنه أصلا مش هيعترف ان ليكي تأثير في حياته و زي ما الهضبة بيقول
” البعد أوقات بيريح و تعبت من القرب يا ساتر لا مش معقول “.
#هسحقكم_بنرجسيتي 

_ طلعت نرجسي!! إني أسف 

#A_B_Pschology
#يارا_فتحي

يارا فتحي

اقرأ ايضاً:

ما هو الوسواس القهري وعلاجه واعراضه

ما هو الادمان السلوكي و علاج الادمان السلوكي

5 حقائق عن لغة الجسد يجب أن تعرفها وأهم كتب لغة الجسد pdf