نور جديد من الامل

قوة الأنتكاسة
كلنا حابين نتغير للأفضل سواء ب أننا نكتسب عادة جديدة ومفيدة أو اننا نتخلص من عادة سيئة بتأثر ف حياتنا بالسلب!
بنبدأ نأخد الخطوات الجادة ف الحاجه اللي حابين نتغير ليها وليكن عاوز أتخلص من عادة ” اني أجيب في سيرة الناس “
طبعا ف الأول بتحدد نيتك واهدافك من الحاجه دي اي !
وطبقا للمثال اللي هنا ف انا نيتي أني ” أبقي عبد مطيع لله وأسمع كلام ربنا وانا هبطل أجيب سيرة الناس عشان ربنا نهانا عن كده ” وعدد بقي ف النوايا والاهداف براحتك
تاني خطوة بتبدا تعملها أنك تحدد لنفسك مدة معينة ومكأفاة ب الحاجه اللي بتحبها يعني ” انا هقعد أسبوع مش هجيب سيرة حد خالص ف كلامي مع اصحابي وهكأفئ نفسي ب أني أشتري كتاب جديد ” 
الكلام اللي فوق ده حلو ، وده ابسط تخطيط ل اي حاجه عاوز تعملها ” اهداف + وقت + مكأفاة = حاجه جديدة ف حياتك “
بس للأسف الحلو مبيكملش بتلاقي نفسك فجأة بعد م مشيت يوم واتنين وتلاتة كويس ف التخلص من عادة سيئة عندك بتلاقي نفسك بكل إرادتك بترجع لعاداتك تاني وتنسي التخطيط والمكأفاة وكل حاجه حلوة” دي الانتكاسة للي ميعرفهاش “
وبعدين ترجع تحبط نفسك أنا فاشل مش هعرف أعمل حاجه مفيدة وهفضل طول عمري وحش وتقطع نفسك تأنيب وبعدين ترجع تعمل تاني نفس التخطيط والوقت والمكأفاة وترجع تنتكس تاني..
طيب اي بقي قوة الانتكاسة دي عشان انا رغيت كتير
هي انك تبدأ تحدي مع نفسك من وقت انتكاستك ، يعني اي ؟!
نرجع للمثال تاني .. انا ف اول خطتي كنت حاطة لنفسي وقت أسبوع متكلمش فيه عن حد وبعد م قعدت يوم واتنين وتلاتة انتكست!
هنا بقي لما اجي اعمل خطة تاني مرة مكتبش أفضل اسبوع معملش نميمة لاء ، هتقول لنفسك انا قدرت أقعد 3 أيام مجبش سيرة حد والتحدي المرة دي انا اقعد اكتر من 3 ايام وهكذا !!
انتكست بعد 10 أيام من المحاولة ، يبقي التحدي اني أعدي اكتر من 10 أيام وانا بحاول وليكن الضعف يعني 20 يوم بمارس عادة جديدة.
انتكست بعد 70 يوم من المحاولة يبقي أكافئ نفسي واشكرها علي الفترة دي كلها واعمل تحدي جديد أني المرة دي لازم أعدي اكتر من ال 70 يوم اللي فاتوا واخليهم الضعف وهكذا ب استمرار
وأن شاء الله مع كل مرة هتلاقي نفسك بتتشجع اكتر لانك بتبقي وصلت لمرحلة كويسة انك بتقدر تسيب عادة سيئة فيك لفترة معينة ولما بتنتكس بتقدر ترجع أقوي من المرة اللي قبلها لانك عندك مخزون أيام بيشجعك وبيتحداك وبيقولك لازم تعدي الرقم القديم اللي عملته ف التعافي من اي شئ بيضرك اواكتساب اي عادة تزيدك 

لمتابعه باقى المقالات من هنا

نور_جديد

الساعة_2

كتب بواسطة: نوران يحي