معرفه التكتيك المدفوع والمملوك والمكتسب

سألنا سؤال من كام ساعة عن إيه هي المحاور اللى المفروض تحطها فى إعتبارك وانت بتسّوق لأى براند ع السوشيال ميديا؟
عشان متتلغطبش ولا تحس إنك تايه حط فـ إعتبارك الـ 3 Tactics دول:
1- التكتيك المدفوع (Paid):
من إسمه معروف إنك هتدفع فيه فلوس سواء بقى هتدفعها لـ Influencers / مؤثرين ع السوشيال ميديا بحيث يتكلموا عن البراند بتاعك أو يعملوا عليه Review – بس خد بالك لازم وإنت بتختار الانفلونسر ده يكون شبهك،

بمعنى إنه يكون جمهوره شبه جمهورك .. أهدافه شبه أهدافك يعني ميبقاش البراند بتاعك تعليمي بيدي كورسات CELTA و إنجليزي تروح تكلم مدرب في الـ GYM تقوله كلم جمهورك عننا!!
أو التكتيك المدفوع ده هتدفعه فى اعلانات ممولة على أي منصة ع السوشيال ميديا و هكذا المهم انك هتدفع يعني هتدفع!

2- التكتيك المملوك (Owned): و ده زي ما بتقول كده A B C تسويق ع السوشيال ميديا و اللى يعتبر عمودها الأساسي يعني تحط استراتيجي للكونتينت بتاعتك في إن المحتوى ده..
هتوزعه على أى بلاتفورم؟
هينزل الساعة كام؟
هيكون شكل الكونتينت (فيديو ولا تصميم ولا GIF ولا ألبوم)
هيكون الكونتينت تفاعلي ولا تعليمي ولا بيعي؟
التفاعلي: فلنفترش عندك مطعم فا إنت هتعمل ايه؟ تعمل Poll تسألهم اكتر أكلة بتحبها إيه؟ وتستنى من الناس ردود وكومنتات تفاعلية.

التعليمي: هتكتب محتوى تعليمي بيتكلم عن أهم الأكلات اللي بتساعد على تقوية عضلة القلب مثلًا.

البيعي: اللى هي إنك تنزل صور مطعم ع الإنستجرام، تكتب تويتة عن أهم أكلة عندك ف المطعم أو تكتب Caption ع الفيسبوك مع فيديو/ صورة تشجع بيه الناس انهم يجوا و يجربوا أكلك.
المهم إنك هتوجه جهود قصوي فى إنك تغطي كل الـ Channels اللى بتستخدمها للمطعم ده ع السوشيال ميديا!

3- التكتيك المكتسب (Earned): و دي زي ما بتقول حاجة كده عاملة زي أصول الشركة و اللى بتتمثل فى مواردك البشرية (الموظفين / المتدربين / اللي قدموا لوظايف عندك / متطوعين) إنك تجمع كل Stuff المطعم من أول المدير لحد الـ Security و تتكلم معاهم انه لازم كل واحد و هو قاعد بيكلم صاحبه ع السوشيال ميديا او في الحقيقة يجبلوا سيرة المطعم و قد إيه هو جامد جدآآ و إنه أجمد مطعم فيكي يا مجرة .. يعني هتعمل شوية (WordOfMouth) لذاذ كده!

.. لو طبقت الـ 3 محاور دول بحذافيرهم ، البراند بتاعك هيكسر الدنيا ع السوشيال ميديا أكتر من تريند مصطفى أبو تورتة
*قولي إيه هو أكتر براند شايفه بيطبق الـ 3 Tactics دي ع السوشيال ميديا من وجهة نظرك ؟

اقلبها_سوشال

كتب بواسطة : أروي عصام