تلخيص كورس learning how to learn

هالّو فرينداتي الأعزاء
فكرت إني أكتب لكم تلخيص الكورسات، ولو عجبتكم الفكرة كل ما أخلص كورس هنزله.
نبدأ بأول واحد وأعتقد معظمكم سمع عنه وهو كورس learning how to learn

أول جزء وهو خاص بالتذكر:-

✔في اليوم لو هنذاكر هيكون حاجتين مختلفتين

ليه بقى؟ لأنه لو هذاكر مادة واحدة هيبقى فيه تضارب في المعلومات وبكده هزهق وهنسي بسرعة، ودي أنا جربتها وفعلاً جابت نتيجة.

✔تغيير مكان المذاكرة

مفيش مانع أبدًا إني مرة أذاكر في البيت ومرة أذاكر في النادي ومرة أذاكر في المكتبة عادي جدًّا بس دي أعتقد ليها عامل شخصي أكتر؛ ولكن لو حسيتوا إنكم قفلتوا ومش عارفين تستقبلوا ولا معلومة جربوا تغيروا المكان، بس مش اللي هو كنت في الصالة فهذاكر في أوضة تانية لأ اطلعوا من البيت خالص.

✔المراجعة على فترات متباعدة

يعني مقعدش طول اليوم بحفظ في نفس الصفحات لأ كفاية جدًّا إني أقراهم وأفهمهم وبعدها بيوم ولا اتنين أرجع أقراهم تاني وهكذا، وبكده أنا بخزن المعلومات دي في الذاكرة طويلة المدى.

✔الاستقبال بعدودة طرق

يعني مرة أذاكر الكلام نظري ومره أعمل رسومات ومرة خرائط والطريقة دي فعالة جدًّا جداًّ؛ لأنك بتعتمد على أكتر من مكان وأكتر من حاسة استقبال ويُفضل طبعًا مذاكرتك تبقى بالعين والسمع والكلام.

✔اختبر نفسك

يعني لما أقرا الدرس وأكون مستعد هدخل على مرحلة تانية وهي إني أجيب أسئلة وأحلها مع نفسي كأني في امتحان بالظبط وبعدين أصحح لنفسي وبلاش غش.

✔المعلومة اللي كنت أنا بعملها وفكراها صح

وهي إني أخطط الكتاب كله بالhighlighter وده طبعا غلط؛ لأنك بتفهِّم نفسك إنك كده مفيش منك اتنين وإنك شربت المنهج شرب لكن الحقيقة غير كده فيُفضل كل قطعة متزدش عن سطر أو جملة معينة.

✔ اختصارات

يعني هنكتب الكلمات الرئيسية بس ونخططها بحيث إننا ممكن نلم شابتر من ٢٠ صفحة في ورقتين.

ده أول جزء من الكورس لو عجبتكم الفكرة قولولي في الكومنتس عشان أكمل باقي الكورس بإذن الله.
ده لينك الكورس للي حابب ياخده:-

من هنا
(متاح له الدعم المالي)

دمتم بخير

كتبه | علياء السيد