إزاي تأسس نفسك في ال android development ؟

ازاى تأسس نفسك صح فى ال android development ؟ في المقالة دي هنعلمكم ازاي تبدأوا في تتعلموه واي الخطوات اللي لازم تعملوها.

android development

الأول كده عشان تقدر تبدأ تدرس android development ﻻزم تكون درست لغة برمجة java ومؤخراً Kotlin.
دول اللغات الرسمية اللي بيتم بيهم إنشاء تطبيقات الأندرويد.

في المقالة دا اتكلمت فيه عن ازاى تأسس نفسك في المجال حتى لو كنت ﻻ تفقه شيء عن ال Computer science.
فلو ما عندكش خلفية ﻻزم تقرأه اﻻول:- من هنا .

فرضاً إنك عندك خلفية وفاهم Java لحد ال OOP، إيه هي الخطوات اللي تمشي عليها عشان تقدر تكون مطور أندرويد؟

أهم حاجة ال Basics وإنك تفهم كويس جداً وما تستعجلش لإن دي أهم مرحلة واللي بيتبني عليها كل حاجة بعد كده نفسك تطلع أول App ليك.
أكبر غلط، ادرس الأساسيات بهدوء ومن كورس معتمد مش من أى حتة، مش من كورسات تعلم الأندرويد في ساعة ونص وأسبوع على أول تطبيق ليك.
ده أشبه بإن أينشتاين كان بيدي دروس خصوصية للثانوية العامة، تجاهل الفيديوهات دي تماماً.

طيب أﻻقى فين كورسات محتواها كويس ومعتمدة؟

شهادات Udacity, EDX

أفضل الكورسات المعتمدة وشهادتها معترف بيها في أي مكان، هى شهادات Udacity, EDX.
لكن الشهادات دي مش مجانية إﻻ لو كانت من منحة.

بالنسبة لباقي المواقع زى Udemy و Coursera فشهادتهم زي قرطاس الترمس كده أو ورق البطاطا ملمهش أى تلاتين لازمة وﻻ معترف بيهم من الأساس.


لو حد دخل أى Interview بيهم هيتأكد من كلاميي فركز على المحتوى وما تدورش على الشهادات.

هبدأ منين وازاى؟

هتبدأ بكورس محترم يعلمك الأساسيات صح من Udacity أو EDX من وجهة نظرى هما الأفضل.
لكن خد بالك الكورس مش هيشرح كل حاجة بالتفصيل في مواضيع هتلاقيه بيتكلم عن قشور.
أنت هتاخد ال title اللي بيتكلم عنه وتدور على أي فديو بيشرح الموضوع ده بالتفصيل الممل لحد لما تفهم.

ولتاني مرة بقولك ما تستعجلش أبداً في المرحلة دي، ﻻزم تفهم كل حاجة وتديها وقتها.
غير كده هتبقى بتضحك على نفسك، أنت بتدرس لنفسك مش ﻻمتحان في كلية! “لينكات الكورسات في آخر المقالة”.

دلوقتي أنت خلصت الأساسيات وفهمت الدنيا ماشية ازاي، هتخلص الكورس من هنا هتلاقي نفسك مش عارف تعمل app كامل.
ما تقلقش ده طبيعى جداً، عامل زي ما بتكون لسه مخلص مادة وما حلتش عليها امتحانات.
بتقعد 6 ساعات في أول امتحان لحد رابع امتحان بتحله فى 30 دقيقة، هو ده بالظبط اللي بيحصل معاك في المرحلة دي.
أنت خلصت المنهج لكن ما ادربتش على اﻻمتحان.

ازاي هتعمل أول app ليك؟

android development

أول app ليك يفضل إن يكون على ازاي تجيب ال data من app وتتعامل مع الموضوع وتعمل connect بال app دي.
حاجات هتقابلها في أيى app ممكن تشتغل عليه بعد كده، وتحاول تتعمق في الموضوع وتألف من دماغك.
كل ما هتتعمق هتزيد خبرتك وثقتك هتزيد في نفسك بسرعة. “طبعا أنت مش فاهم حاجة دلوقتي لكن لما تبدأ الكورسات هتفهم الكلام ده “.

أي تطبيق هتشتغل عليه حاول إنك تظبط ال design بتاعه وتكمله للآخر.
ما تجيش في النص وتقف وترميه وتبدأ حاجة جديدة.
هتبقى خسرت وقت ومجهود على الفاضي، ﻻزم تنهي أي تطبيق تشتغل عليه عشان هو ده اللي هيكون ال CV بتاعك.
ومش هينفع تخلص نص التطبيق وتيجى تعرضه لشركة في ال interview ويسألك التطبيق مش كامل ليه.
تقوله من حلاوته كل نفسه، هيديك بالفون فى وشك!

android development

أهم نقطة من وجهة نظري، بعد لما تخلص الأساسيات وتعمل كام تطبيق صغير تكون طبقت عليه معظم ال topic فى ال android،.
ابدأ فكر في فكرة كبيرة واشتغل عليها حتى لو هتقعد على التطبيق ده 6 شهور، دي هتكون نقطة تحول ليك، ليه نقطة تحول؟

لإن سواء فكرتك نجحت أو فشلت أنت الكسبان في الحالتين.

في حالة إن التطبيق ناجح، فأنت هيكون معاك تطبيق ناجح تقدر تحوله ل startup بسهولة ومش محتاج إنك تدور على شغل.

في حالة إن التطبيق فشل فأنت هيكون معاك تطبيق كبير غير الخبرة اللي كسبتها وأنت بتطوره، وبسهولة جداً هتقدر تشتغل في أي شركة وبمرتب محترم جداً.

android development

الكلام اللي في المقالة ده عن تجارب حقيقية ناجحة، أهم حاجة إنك تكون شغوف وتصبر، لإن زي ما قولت في الأول المجال رخم.
لكن ده فى مرحلة التأسيس لكن بعد كده هو واحد من أمتع المجاﻻت اللي ممكن تتخصص فيها من وجهة نظري الشخصية.

المقالة القادمة هتكلم عن ال Topics الأساسية في ال Android

بالنسبة للكورسات اللي تبدأ بيها:

كتبه | حسام جمال

اقرأ ايضاً:

فرصة تعلم البرمجة علي منصة free code camp