أميرة حسينملخصات كتب

الجزء التاني من تخليص كتاب :- فن التعامل مع الناس للكاتب دايل كارنيجي

تلخيص كتاب :- فن التعامل مع الناس

للكاتب :- دايل كارنيجي.

زي ما قولنا المرة اللي فاتت إن الكتاب دا من أكثر الكتب القيمة واللي بتحتوي فعلا على نصائح مفيدة؛ ولأن مش كل الناس عندها الوقت الكافي إنها تقرأ كتاب كامل فإحنا دورنا نسهل عليكم دا ونوفرلكم ملخصات لبعض الكتب اللي إحنا شايفينها مؤثرة وذات قيمة فعلية.

وده لينك مقالة الجزء الأول من تلخيص الكتاب من هنا  .

الجزء_ الثاني :-

طرق لجذب الناس إلى طريقة تفكيرك:

_احترم آراء الآخرين حتى لو معارضة لأفكارك و متقولش لحد إنه غلط بطريقة مباشرة لأنه حتى لو أنت الصح وهو عارف كدا مش هيتنازل عن رأيه لأنك وجّهت ضربة مباشرة لذكائه وقدرته على التفكير.

_لو أنت بقى عايز تكسب حد في صفّك وتخليه يؤمن بوجهة نظرك لازم تعمل كدا باللين والرفق والقول الحسن بعيدًا عن الغضب والعنف لأنك كدا بتجبره على الرفض حتى لو وجهة نظرك هي اللي صح.. وخليك فاكر أن لكل فعل رد فعل مساوي ليه؛ اتعاملت بعنف هتقابل عنف اتعاملت برفق ولين هتقابل مودّة.


فيه حاجة اسمها طريقة سقراط في الحوار.. يعني إيه؟
يعني تبدأ الحوار بذكر الأمور الإيجابية و ذكر النقاط المشتركة بينك و بين الطرف الآخر في الحوار، مثلا:
يا فلان الفلاني أنا مبسوط جدا بالكلام معاك و معجب بوجهات نظرك و طريقة تفكيرك دة غير أننا متفقين في جوانب كتير و لكن من غير الجيد كذا و كذا.

لو ركزت في المثال دا هتلاقي إنك المفروض تكسب الطرف التاني الأول و تحسسه باحترامك ليه و بعدين نبدأ بسرد المشاكل فهتلاقي فيه تفاهم واستجابة أكتر من الطرف التاني.

لو الشخص اللي قدامك على خطأ أو فيه بعض الخصال السيئة وأنت عايز تلفت نظره ليها، هتعمل إيه؟

من الغلط طبعًا إنك تكلم الآخرين عن خصالهم السيئة بطريقة مباشرة كدا إلا لو كان شخص قريب جدًا منك
لكن مع الناس العاديين اللي في حياتنا من المفترض إنك تكلمهم عن الأخطاء بطريقة غير مباشرة عشان متجرحهمش ومتتكلمش معاهم على أساس إنك ملاك لا يخطئ وإنك موجود عشان تحاسبهم .. لا
ابدأ الكلام بإنك تفهمهم إن كلنا بنغلط وإنك نفسك بتغلط كتير وهكذا عشان الشخص التاني يطمئن ويقدر يتكلم في موضوع حساس زي دا و توصلوا لنتيجة إيجابية. واحذر طبعًا من إنك تنتقد الشخص دا أو تتكلم عن خصاله السيئة علنًا قدام الناس لأنك كدا بتجرح مشاعره وكبرياءه.

لو عندك أمر ما عايز تقوله للشخص التاني و لكن خايف من رفضه (عايز تأمره يعمل حاجة يعني)
هتقولهاله ازاي؟.. يا فلان أنا بأمرك تعمل كذا وكذا !؟
أكيد طبعًا كلامك هيتقابل بالرفض لو استخدمت الأسلوب دا.. لكن لو قدمت طلبك على أساس إنه اقتراح زي مثلًا :
إيه رأيك يا فلان إنك لو تعمل كذا دا مجرد اقتراح مني لكن رأيك في الآخر هو المهم
” كُل بعقله حلاوة “

خمسة طرق لجلب الحليب و رد الزبيب
.. الباب الأخير في الكتاب فعلًا كان بعنوان ” خمسة طرق لجلب السعادة و الطمأنينة لحياتك ”
هو أكيد الموضوع مش سحري و هتلاقي كل الكلام دا إحنا عارفينه لكن مدربي التنمية البشرية عادةً بيحبوا يستخدموا جمل ضخمة كدا عشان يجذبوا الناس .. خلاص من غير كلام كتير يلا نعرف إيه هما الخمسة دول :

أولًا: اعرف نفسك وكُن نفسك
شوف اللي أنت بتحبه و بتقدر تعمله والمنطقة اللي أنت تقدر تبدع فيها واشتغل عليها متبقاش عارف قدراتك وتسيبها وتروح لحاجة متقدرش عليها لمجرد إنك عايز تكون شبه حد أو لمجرد إن فيه ناس عايزين منك كدا.

ثانيًا :- توقف عن التذمر و الشكوى
بدل ما تركز في الجوانب الضلمة اللي في حياتك و تركز على اللي ناقصك و عمرك يضيع في قلة راحة وقلة قناعة
ركّز على كل الحاجات الحلوة اللي عندك و كون شاكر لوجودها ساعتها مش هتتأثر كتير باللي ناقصك.

ثالثًا :- بقدر أهميتك يكون النقد الموجّه إليك كبيرًا
هو أنا مش مقتنعة أوي بالنقطة دي لكن هو بيقولك أن وجود النقد في حياتك يدل على إنك شخص مميز وقدرت تلفت الأنظار فمتزعلش من النقد اللي بيتوجهلك.

رابعًا :- اللي قلبك يحس أنه صح اعمله بغض النظر عن آراء الأشخاص المحيطين بك أو حتى اللوم الموجه ليك.

خامسًا :- عشان تبعد عن الملل و الإرهاق

ابدأ بالأهم فالأهم وخلّصه ولو عندك مهام تنفع توكلها لحد؛ يعني تخلي حد غيرك يقوم بيها فمتترددش.

لينك الكتاب من هنا .

كتبه | أميرة حسين

مقالات ذات صلة

زر الذهاب إلى الأعلى
إغلاق
إغلاق