تسنيم محمدكورسات مجانيةمقالاتملخصات كتب

الذكاء العاطفي

الذكاء الاجتماعي

في أحد الماتشات كان فيه لاعب بشرته سمرا، وكنوع من أنواع العنصرية والتنمر راح بعض الناس من الجماهير رموا عليه موز وبعض الحاجات اللي معاهم كنوع من الإهانة، فاللاعب خرج من الملعب ورفض يكمل الماتش، في حين إن في موقف مشابه للموقف ده بالظبط بس مع لاعب تاني، اللاعب التاني أول ما اترمى عليه موز قشر الموزة وأكلها وكمل الماتش عادي جدًا، طب إيه اللي خلى الأول يتعصب كدا إنما التاني لأ؟!

اللي خلى اللاعب الأول يتعصب والتاني لأ إن الأول معندهوش ذكاء عاطفي إنما التاني عنده، فتعالى نشوف إيه هو الذكاء العاطفي ده

الذكاء العاطفي Emotional Intelligence:

هو ذكاء عن طريقه بتقدر تفهم وتدير مشاعرك وتفهم وتدير مشاعر غيرك، وكمان إنك تقدر تحفز نفسك وتحفز غيرك

والذكاء العاطفي وعلى حسب نموذج دانييال جولمان فهو بيتكون من 5 نقط مهمة لو أتقنتهم كلهم يبقى أنت كده عندك ال EQ عالي وهما:

1- الوعي بالذات
2- التحكم بالذات
3- تحفيز الذات
4- التعاطف
5- المهارات الاجتماعية

*وفيه ناس بتقول عليه ذكاء اجتماعي لأنه ببساطة بيساعدك تفهم مشاعر غيرك وتوجهها لصالحك، مش بس كده أنت بيبقى عندك فضول تجاه الناس ومشاعرهم وده نتيجة لتعاطفك معاهم، ولأنك بتهتم بيهم وباللي بيمروا بيه.

الوعي بالذات: هو إنك تعرف نفسك وتعرف احتياجاتها وتفهم نفسك بشكل أفضل تعرف أهدافك وطموحك وكل حاجة عايز تعملها ومش بس نفسك، أنت كمان هتعرف احتياجات اللي قدامك وإيه أفضل طريقة للتعامل مع كل واحد، لأن أغلب الخلافات بين أي زوجين وأي اتنين أصحاب بتبقى ناتجة عن عدم فهمهم لاحتياجات بعض قبل أي حاجة تانية.

التحكم بالذات: وده بقى أهمهم واللي أصلاً بداية الكلام كانت عليه، أغلبنا بيعاني من الانفعال والعصبية الشديدة بسبب الضغوطات اللي بنتعرضلها بشكل يومي وخاصة إن مفيش حاجة نفرغ فيها طاقتنا السلبية، فالتحكم بالذات هيعرفك متنفعلش على أي حاجة سواء بالفرح أو الحزن وتعرف تتحكم في نفسك وفي مشاعرك.

النقطة التالتة بقى أغلبنا للأسف مش واخد باله منها أو مش عارفها وهي تحفيز الذات: غالباً لو أنت مبتعرفش تحفز نفسك فتلقائي هتحبط وتحس إنك مبتعملش حاجة، وتحفيز الذات بيكون عن طريق حاجة أنت بتحبها، فمثلاً لو بتحب الأكل ومطلوب منك تذاكر عدد معين من الصفحات أو تخلص كم معين من الشغل أو لو حتى عايز تحفز نفسك على كورس أو تحفظ قرآن أو إنجاز شخصي حفز نفسك بإنك بعد ما تخلص المطلوب منك تاكل أكلة بتحبها، أوتشتري لنفسك شيكولاتة أو تخرج تتمشى أو تتكلم مع واحد صاحبك، المهم تعرف إيه بيسعدك وتربط وجوده بكل إنجاز في حياتك حتى لو الإنجاز بسيط، ده هيساعدك في إنك تنجز حاجات كتير مقابل المكافأة اللي في النهاية.

التعاطف والمهارات الاجتماعية: ودول بتحتاجهم بشكل يومي، بتحتاج إنك تتفاعل مع الناس، تعرف لغة الجسد كويس بحيث وأنت بتتحرك أو بتتكلم اللي قدامك يبقى متفاعل معاك مش عايزك تخلص، تعرف تتعاطف مع الناس لو حد متضايق أو عنده مشكلة، تكون شخص بيعرف امتى يسمع وامتى يتكلم بحيث تبقى شخص اجتماعي وعارف يتعامل مع كل الناس ومع أي موقف يقابله.

وعلشان تعرف أكتر عن الذكاء العاطفي تقدر تشوف الكورس من هنا .

وكمان تقرأ كتاب الذكاء العاطفي لدانييال جولمان.

 

كتب بواسطة| تسنيم محمد علي

مقالات ذات صلة

زر الذهاب إلى الأعلى
إغلاق
إغلاق