احياء الصف الثانى الثانوى 2020 ” باب الاخراج”

– في المقال ده هنتكلم عن احياء الصف الثانى الثانوى 2020 خصوصاً باب الاخراج…. هتعرف عملية من العمليات الحيوية اللي بيتميز بيها الكائن الحي وهي الإخراج ..

وهنعرف هل المادة الإخراجية دي لازم تخرج من الجسم ..هنعرف كمان القاعدة اللي نحكم بيها على المادة علشان نعرف هي مادة إخراجية ولا لأ.

Fe +2HCL> FeCL2 + H2

– بص للمعادلة اللي فوق كده هتلاقي إن الحديد تفاعل مع كلوريد الهيدروجين علشان ينتج كلوريد الحديد ..كلوريد الحديد هو الناتج اللي أنت محتاجه والهيدروجين بيتطاير في الهوا وأنت مش بتستخدمه لأنك مش محتاجه ..

في تفاعلات كيميائية شبه المعادلة دي كده بتحصل جوه جسمك .. جسم أي كائن حي بيقوم بتفاعلات زي كده على طول ..

والنتائج بيبقى في منها الضروري (زي كلوريد الحديد) وغير الضروري زي (الهيدروجين) ..طب في المعادلة اللي فوق الهيدروجين اللي مش محتاجينه طار في الهوا ..

وأكيد فيه مواد وغازات كتير ناتجة عن التفاعلات اللي بتحصل جوه جسمنا ..طب المواد والغازات دي عايزة تخرج ..هتخرج ..تسألني صديقي العزيز

في ” باب الاخراج” احياء الصف الثانى الثانوى 2020 “هي هتخرج ليه وازاي؟”

..عزيزي القارئ المواد والغازات غير الضرورية دي لو فضلت في جسمك هـتعمل على تغيير الأس الهيدروجيني للدم (الحموضه هتزيد) ..

ولما الحموضه تزيد ده هيسبب اختلال للاتزان الداخلي للجسم (جسمك ماشي بنظام دقيق ..الدم رايح هنا وراجع من هنا ..كل حاجة ماشية بنظام) ..

ولمَّا الاتزان يختل، عمليات التمثيل الغذائي (عمليات تكسير الطعام وأخذ الاستفادة منه) العمليات دي هتتعطل ومش هتِّم وبالتالي خلايا جسمك هتتسمم

(وده لأن فيه طعام ممكن يكوم مسموم، فـالعمليات الحيوية اللي اتعطلت مش هتقدر تتخلص من السموم دي فـهتتراكم جوه الجسم وتسبب تسمم والتسمم يجيب الوفاة)..

علشان كده المواد التالفة وغير الضرورية و الزايدة عن حاجه الجسم لازم تخرج .. نيجي بقى لـ سؤال

“المواد غير الضرورية دي هتخرج ازاي”

.. أولاً – قارئي العزيز أنت لازم تعرف إيه هي المواد الإخراجية دي وإيه هي الأعضاء اللي بتساعد المادة غير الضرورية دي على إنها تخرج، بعد كده نعرف هي هتخرج ازاي .تمام ؟ …

= لمَّا بنسلم على حد هل إيدينا بتدخل جوه إيده؟    لأ هي بس بتلمسها بيحصل احتكاك ..طب لو دبوس صغير دخل في صباع إيديك ..

ليه قلنا هنا إن الدبوس دخل في صباعك وإن إيدين الشخص مدخلتش ..صديقي العزيز احنا بنقول إن الدبوس دخل لأنك حسيت بيه أكتر (دخل جوا جسمك مرَّ بين الخلايا و دخل) أثَّر فيك وحسيت بيه أكتر ..

أما إيد الشخص مدخلتش جوا إيدك ده حصل احتكاك خارجي بس ..تمام؟ ركز بقى على كل حاجة بتدخل جوه خلايا جسمك لأننا هنحتاجها ..

*تعريف الحويصلة الهوائية:

عزيزي القارئ بيقول إنها عبارة عن جزء من الجهاز التنفسي، تجرى فيه جميع عمليات تبادل الغازات (أكسجين داخل وثاني أكسيد الكربون خارج) في الرئتين ..

ثاني أكسيد الكربون وهو خارج بيمر بخلايا الحويصلة الهوائية (يعني دخل في جسم الحويصلة نفسها) مرَّ بالخلايا وهو خارج برا الجسم ..

تعالى ناخد قاعدة مهمة لأنها هتعرفنا هل المادة (أيًا كانت) تعتبر مادة إخراجية ولا لأ ..القاعدة بتقول”المادة الإخراجية هي مادة تعبر الأغشية البلازميه وبقائها في الجسم ضار.

يلا نطبق القاعدة دي على شوية مواد ..

المثال الاول في احياء الصف الثانى الثانوى 2020 : “ثاني أكسيد الكربون”

بيعبر الحويصله الهوائية. (اللي هي جزء من الجهاز التنفسي تبع الرئتين يعني) و هو ييعبرها كان بيعدي من خلالها (دخل أغشيتها البلازمية) ..

و ثاني أكسيد الكربون لو فضل في الجسم كتير هيضر الجسم ..

إذن فهو (co2) حقق القاعدة كلها لأنه بيعبر الأغشية البلازمية وضارّْ ..إذن فـ (co2) تعتبر مادة إخراجية .

المثال التاني في احياء الصف الثانى الثانوى 2020 : “الماء “

عزيزي القارئ الماء الزايد في الجسم بيضر علشان كده لازم يخرج من الجسم ..

و الحمد لله هو مش بيلاقي طريقة واحدة بس يخرج منها لأنه بيخرج من ٣ أعضاء ..

أول واحد “الكلية” بيخرج في صورة بول ..تاني عضو “الجلد” بيخرج في صورة عرق ..تالت عضو “الرئة” بيخرج في صورة بخار ماء ..

عزيزي القارئ “الماء” يعتبر مادة إخراجية لأن وجوده بنسبة زيادة في الجسم هيضر بصحة الجسم و هو بيمر بالأغشية البلازمية في الـ ٣ اعضاء اللي بيخرج منهم

..(هيتشرح بالتفصيل في المقال الجاي بعون الله) .

المثال التالت:”هي عبارة عن مجموعة من الفضلات”

(حاجات فايضة الجسم مش محتاجها) المجموعه دي فيها نسبة نيتروجين عاليه علشان كده سموها “الفضلات النيتروجينية”.

من أهمها(الكرياتينين – النشادر – اليوريا – حمض البوليك)

المجموعة دي ناتجة من تكسير البروتونات وبتخرج من الجسم لأن بقائها لفترة طويلة بيضر الجسم ..

الفضلات النيتروجينية دي بتخرج من خلال الكلية والجلد وفي كلتيهما بتمر بالأغشية البلازمية سواء في الكلية أو في الجلد.

(هيتشرح بالتفصيل في المقال الجاي بإذن الله)

رابع مثال :

طبعًا عزيزي القارئ كلنا قلبنا علي بطننا لو جعانين ناكل مش جعانين ناكل بردو ..

علشان كده جسمنا بيستقبل كمية كبيرة من الطعام فـ بيقوم واخد اللي محتاجه والباقي يخرجه برا الجسم لأنه مش محتاجه ..

الطعام غير المهضوم ده واللي بيُسمى بـ “البراز” لو فضل في الجسم هيضره بس بردو مش مادة إخراجية.

لأنه كان جوه تجويف الأمعاء الغليظة بس مدخلش في أغشيتها البلازمية علشان كده لا يعتبر إخراج..

(حقق نص القاعدة والنص التاني لأ).

المثال الخامس في احياء الصف الثانى الثانوى 2020 : ” لبن الأم”

لبن الأم عزيزي القارئ بيمر بالأغشية البلازمية وهو خارج ..تمام؟

بس لبن الأم ده مفيد للطفل الرضيع مش ضار لأنه بيغذيه … إذن لبن الأم ليس مادة إخراجية ..(حقق نص القاعدة والنص التاني لأ)

المثال السادس في احياء الصف الثانى الثانوى 2020 : الدموع

دموع الإنسان بتمر فعلاً بالأغشية البلازمية بس هي مفيدة للعين لأنها بتنظفها وبترطبها .. إذن فـ دموع الإنسان ليست مادة إخراجية ..

تسألني عزيزي القارئ “اشمعنا حددت هنا يعني وقلت دموع الإنسان”.

لأن في دموع تعتبر من المواد الإخراجية زي دموع التمساح مثلاً ..

ليه بقى؟!؛ لأن دموع التمساح بتنزل لمَّا يفترس الفريسة ..

الفريسة اللي كَلْها دي كان في جسدها أملاح و حاليًا الأملاح دي في جسم التمساح ..

ووجود الأملاح دي في جسم التمساح هتضره علشان كده بيدور على طريقه يخرج بيها الأملاح دي ألا وهي “الدموع”

طبعًا الدموع كده كده بتعبر الأغشية البلازمية + دموع التماسيح لو فضلت في جسم التمساح هتضره لأنها عبارة عن أملاح ..

وبكده نقدر نقول إن دموع التماسيح مادة إخراجية..

خلينا نكتفي كده بأمثلة على المواد الإخراجية لأنك عارف القاعدة اللي هتقيس عليها كل المواد بعد كده .

لينك الدرس من هنا .

كتب بواسطه | إسراء محمد

اقرأ ايضاً:

أحياء الصف الثاني الثانوي “باب الإخراج” الجزء الثاني

” باب الإخراج ” الصف الثاني الثانوي الجزء الثالث