كتبنصائح

الكتب أم الروايات أفضل لتحقيق الاستفادة من القراءة

مساء الفل،دي الحلقة التانية من فقرة الريفيوهانجي اللي بنتكلم فيها عن القراءة والكتب، الحلقة اللي فاتت إتكلمنا عن ليه لازم نقرأ، وعرفنا أهمية القراءة وخلاص قررنا إننا هنبدأ نقرأ، بس أكيد سألت نفسك
سؤال: أقرأ إيه الكتب أم الروايات أفضل لتحقيق الاستفادة من القراءة ؟.. وأنهي فيهم اللي هخرج منه بفايدة ومش هبقى ضيعت وقتي فيه؟! ده موضوع حلقتنا انهارده.

الكتب أم الروايات أفضل؟

مبدئياً خلينا متفقين إن فعل القراءة نفسه عمره ما كان تضييع وقت، سواء بتقرأ رواية أو كتاب إنت في كل الأحوال
كسبان. لكن بعض القراء بيحب إنه يستفيد أكتر ويحقق فايدة من الحاجة اللي بيقرأها. وده بيحصل أكتر في قراءة
الكتب.

ثانية واحدة، هو إيه أصلاً الفرق بين الكتب وبين الروايات ؟!

الفرق بين الكتب والروايات:

 سؤال جميل؛ الكتاب عبارة عن دراسات أو إحصائيات أو وجهة نظر الكاتب في موضوع ما سواء كان علمي أو
ديني أو سياسي، وجهة نظر بحتة خالية من أي مشاعر أو وصف أو قصص، يعني أسلوب أكاديمي زي اللي بتدرسه
في الجامعة بالظبط، مفهوش متعة على قد ما فيه معلومات وحقائق.

أما الرواية فهي عكس كل ده، هي عبارة عن قصة ليها أبطال وفيها بداية ونقطة صراع ونهاية، فيها مشاعر ووصف
للشخصيات والأماكن، فيها إثارة وتشويق وأكشن وأحداث تخليك قاعد مركز ومهتم باللي هيحصل، الرواية بتحقق لك
المتعة والتسلية أكتر من الكتب.

كده عرفنا الفرق، وأظن لما نرجع للسؤال اللي سألناه الأول أقرأ كتاب ولا رواية، بعض الناس هيقول خلاص كده
عرفت الإجابة، الكتب طبعاً لإن هي اللي هطلع منها بفايدة. أما الروايات دي مجرد تسلية وتضييع وقت ع الفاضي.
اسمح لي أقولك إنك غلطان نوعاً ما.

أينعم إنت عندك حق في الجزئية دي إن الروايات نادراً ما هتسفيد منها بمعلومة، بس إنت بكده تغافلت عن مميزات
تانية كتيرة لما تقرأ رواية، تعالى نذكر بعض الفوائد اللي ممكن تحصل عليها من قراءة رواية.

فوائد القراءة لتحقيق الاستفادة:

• الرواية هي خلاصة تجربة حقيقية تقدر تستفيد منها: لما تقعد مع جدّك أو جدتك وتسمع قصصهم وحكاياتهم
ونصايحهم وتلاقي نفسك استفدت منهم، الرواية بيحصل فيها نفس الشيء، الكاتب بينادي عليك ويقولك تعالى اقرأ
خلاصة التجارب اللي مريت بيها في حياتي هحكيهالك في قصة فيها شخصيات وأحداث. إنت هنا بتكتسب خبرة
تخليك تعرف تتعامل مع مواقف شبيهة في حياتك.

• الرواية هتنمّي عندك ملكة الخيال: الرواية بكل ما فيها من وصف للشخصيات والأماكن، وصف لملابس البطل
وتعبيرات وشه والتعبير عن الغضب والحزن والفرح، كل الأوصاف دي هتخليك تتخيل في عقلك الشخصيات دي
عاملة إزاي والأماكن دي عاملة إزاي، وإنت بتقرأ هتحط صورة لكل شخصية وكل مكان، بالشكل ده إنت بتمرن
عقلك ع التخيل وبالتالي تأليف صور وشخصيات مش موجودة في الواقع.

• فهم الذات والآخرين: لما تقرأ رواية درامية أو بتوصف المشاعر الإنسانية للشخصيات من مشاعر غضب وحزن
وفرح وخوف، بتقدر إنت تسقط ده ع الواقع، ع الناس اللي حواليك، بتقدر تفهم تصرفاتهم وتبقى عندك خلفية عن
مشاعرهم وبتقدر تحس بيهم وتحط نفسك مكانهم وبالتالي تلتمس ليهم العذر في لحظة غضب وتلاقي عندك قدرة على
التسامح وفهم اللي حواليك.

• قراءة الروايات بتساعدك تفصل من الواقع اللي إنت عايش فيه وبتديك فرصة تهرب وتسافر لأماكن بعيدة وإنت
قاعد مكانك، بتخفف من التوتر والضغط العصبي اللي في حياتك نتيجة المشاغل الكتيرة. هي وسيلة للاسترخاء
والهدوء وأعتقد مفيش حد فينا مش محتاج حاجة زي دي.

الروايات والاقبال عليها:

• بعض الروايات حققت بالفعل الميزة اللي موجودة في الكتب عن طريق إنه بيتكلم عن موضوع علمي فيه معلومات
كتيرة بس بطريقة روائية، زي روايات دان براون الشهيرة. أهي نفس المعلومات اللي في رواياته دي لو كانت
اتحطت لك في كتاب مكنتش هتفهمها وكنت هتزهق وتمل منها.

أينعم أغلب الروايات حالياً هابطة وكلها إسفاف ومفيش منها لا متعة ولا استفادة، ومع ذلك عليها إقبال شديد من الفئة
اللي لسه مبتدئة في القراءة. لكن تظل فكرة إن الجيل ده بيقرأ فده في حد ذاته تقدم مهم حتى لو بيقرأوا حاجات تافهة.


مع الوقت والاستمرار في عملية القراءة، هيكتسبوا وعي كافي يخليهم يقدروا يختاروا اختيارات أفضل، والروايات
اللي كانت بترضيهم وتعجبهم زمان مش هتعجبهم دلوقتي. هي عملية فلترة على المدى البعيد. أهم شيء هو إنهم
يقرؤوا، والباقي سهل.

ملحوظة: طبعاً مش محتاجين نتكلم عن فايدة وأهمية قراءة الكتب، كلنا عارفين أهميتها أكيد. وقراءة الكتب على فكرة
مش بالسوء ده زي ما أغلبنا معتقد، الفكرة إنك تختار كتاب في مجال إنت بتحبه وكاتب أسلوبه سهل وخفيف يوصلك
المعلومة بطريقة سلسة.

⁦ الخلاصة:

• للاجابة عن سؤال الحلقة وهو “الكتب أم الروايات أفضل” باختصار قراءة الروايات لا تقل أهمية عن قراءة الكتب، عندك مقدرة وطاقة وتركيز تقرأ الكتب أوكيه خير وبركة
وزي الفل، مش قادر ولسه مبتديء أو بتحب الروايات أكتر عشان بتسليك أو بتخليك مستمتع مفيش أي مشكلة.

• اقرأ وسيبك من الناس اللي هتقولك إنت بتضيع وقتك ع الفاضي في الروايات ومش هتسفيد منها حاجة.

• اقرأ حتى لو اختياراتك في الكتب والروايات غلط، استمر في القراءة ومع الوقت لا بد هتقع ع كتاب مهم هيغير فيك
حاجات كتير للأفضل.

• القراءة مش الهدف الأساسي منها الاستفادة، اقرأ الحاجة اللي تخليك مستمع ومبسوط.

__________

نشوفكم الاسبوع الجاي إن شاء الله هنتكلم عن إزاي بقى تختار الكتاب أو الرواية التي تناسبك وتناسب اهتماماتك.

#الريفيوهانجي

لينك الحلقة الأولى من هنا .

كتبه/ هشام فرج

اقرا ايضا: 6 فوائد لتجعل من القراءة عادة يومية
اقرا ايضا : قنوات الكتب على يوتيوب

الوسوم

مقالات ذات صلة

زر الذهاب إلى الأعلى
إغلاق
إغلاق