ما هو الادمان السلوكي و علاج الادمان السلوكي
الادمان السلوكي هو انك ماتكنش قادر علي البعد عن سلوك معين وفي المقاله دي هنكلم عنه وعن كيفية علاج الادمان السلوكي.
مين قال إن المواد المخدرة بس هي سبب الإدمان؟
قصدك إيه يعني!
ما هو الادمان السلوكي وعلاج الادمان السلوكي
خلينا متفقين إن كلنا بنقوم ببعض السلوكيات المتكررة بشكل مستمر زي الأكل والشرب والنوم عشان دي كلها حاجات فسيولوجية.
وبنضمن بيها بقاء حياتنا ولكن في بعض السلوكيات اللي بنقوم بيها برضه بشكل مستمر عشان نوصل لإحساس معين من المتعة وتدريجياً بندمنها وده بيسمي “الإدمان السلوكي”.
الإدمان السلوكي “Behavioral Addiction”
هو عبارة عن إدمان سلوك معين بيخلق عندك رغبة في تكرار السلوك ده زي إدمان القمار والسوشيال ميديا والاكتناز القهري.
وكمان الشوبينج وإدمان بعض أنواع الأكل زي الشيكولاتة مثلا وقيس على كده كل سلوك انت شايف نفسك مدمن عليه.
والإدمان السلوكي بينتج عنه نفس عواقب إدمان المواد المخدرة اللي بتتمثل في الهيروين والترامادول والكحول.
طب ليه مع أن كل السلوكيات دي قد تكون عادية بالنسبة لمعظم الناس ازاي توصلنا للادمان؟
بكل بساطة فيه مناطق معينة في أدمغتنا مسئولة عن رفع مستوى الدوبامين وده بيتولد عنه شعور إيجابي وهو شعور بالمكافأة.
أياً كان السبب اللي رفع مستوى الدوبامين في الدماغ وزي ما المواد المخدرة فيها مواد كيميائية بترفع مستوى الدوبامين.
وبتسبب إثارة عالية لجهازنا العصبي فالعلماء لقوا إن بعض السلوكيات دي بتاخد نفس المسار بدون اي مواد كيميائية. لأن دماغنا دائما بتميل ناحية أي حاجة ليها متعة وبتسبب لنا السعادة لكن مع الوقت والتعود بيقل حساسية نظام المكافأة.
فبيكون عايز قدر أكبر من السعادة عشان كده مدمنين المواد المخدرة بيزودا الجرعة مع الوقت كذلك زيادة الإفراط في السلوك وده اللي بيوصلك للإدمان السلوكي.
وتبعا للدليل التشخصيي والاحصائي للاضطرابات العقلية والنفسية ( DSM-5 ) إن الأعراض اللي بتوصل للإدمان السلوكي بتتمثل في عدم قدرتك في البعد عن السلوك ده.
وحتى لما تكرر إنك تقاومه لازم هتعاني من أعراض الانسحاب وهتبقى حاسس معظم الوقت بملل واكتئاب لأنك دايما كنت شاغل وقتك بيه.
اسباب الادمان السلوكي
فيه بعض الأسباب اللي بتؤدي للإدمان السلوكي زي:
- بعض الجينات المنقولة من الآباء
- انك تكون اتوجدت في بيئه بتسمحلك بالتجاوز في السلوك ده زي الأم مثلا اللي بتسيب لإبنها الgames على طول ومع الوقت ما بيبقاش قادر يبعد عنها،
- بعض المشاكل اللي مسببة لك توتر أو قلق فبتلجأ للهروب منها بالسلوك اللي بتحس فيه بالمتعة.
طرق علاج الادمان السلوكي
- لازم يكون عندك وعي بسلوكياتك واستبصار بنفسك
ولو عارف إنك مدمن على سلوك معين يبقي تاخد قرار بينك وبين نفسك إنك لازم تساعد نفسك عشان ترجع تمشي حياتك بشكل طبيعي ومتزن. - العلاج الشخصي
وده بيكون عبارة عن إقناع المريض بإنه بيعاني من الإدمان السلوكي ويعرف إيه الأسباب اللي وصلته لكده ومن ضمن الأسباب المشاكل الطفولية.
- العلاج الأسري
وده بيكون دور الأسرة في أنك تحسسه بالحب وترجع ليه ثقته بنفسه وتقويه دايما. - مجموعات الدعم
زي أن يكون ليه علاقة بحد بيتعالج أصلا من الإدمان السلوكي والصحاب ليهم دور مهم في إنهم مش بيحسسوه بالوحدة ويكونوا مصدر أمان وتشجيع ليه - لازم تبقي عارف مصدر قوتك ومصدر ضعفك وتبقي مؤمن بنفسك
ما تسيبش نفسك لأي حاجة تانية تستعبدك حتى لو كنت حاولت 100 مرة فحاول للمليون مرة لأنك هتقدر.
قولوا لي طلعتوا بتعانوا من الإدمان السلوكي ولا لا ؟!
كتبه| مي علام
اقرا ايضا