الفرق بين التسويق والمبيعات

المفهوم الفعلى للتسويق والفرق بين التسويق والمبيعات

مفهوم التسويق فى الوطن العربي الناس بتعتبره جديد؛ بس فى الحقيقة هو قديم وبدأ فى القرن ال18

مع بداية الثوره الصناعية، وزادت المنافسة وبقى فيه تطور فى السوق التجارى يوميا.

ودا اللى خلى المنتجين يدوروا على تقنيات جديدة عشان يعرضوا ويسوقوا المنتجات بتاعتهم.

وعلى مدار التلت سنين اللى فاتوا التسويق بقى جزء أساسى من حياتنا، كلنا بنمارس التسويق بشكل مستمر

بدايه من اللى بدور على فرص شغل وبيسوق للبيزنس بتاعته، وصاحب السوبر باركت اللى ف أول الشارع اللى بيعرض منتجاته

قدام المحل، وفرن العيش اللى ف أول الشارع اللى بيبقى حاطط الصوانى والعيش السخن فى دخلة العصاره اللى

ف وسط البلد بتحط قدامها كام عود قصب بيبقوا واقفين كدا عشان يشدوك وانت ماشي ف عز الحر تدخل تشرب.

كل دول بيمارسوا التسويق بطريقة صحيحه جدا ومن غير ماياخدوا بالهم.

لحد مانوصل للشركات الكبيره اللى بتعمل خطط وتسويق لمنتاجها وبتصرف ملايين فى مقابل انها تاخد مئات الملايين.

ودلوقتى عزيزى القارئ تعال ندردش شويه عن التسويق.

التسويق موهبة ولا مهاره مكتسبة؟

التسويق موهبه!

لما بنقول ان التسويق موهبة فدا معناه ان الشخص بيكون اوريدى عنده موهبة انه يسوق للمنتج بتاعه

ويدرس السوق ورغبات العميل وبيعرف يقنع اللى قدامه بالمنتج وبفوايده ومميزاته.

وازاى المنتج هيخدم احتياجاته ويعملها اشباع تام، وبكدا احنا بنقول عن الشخص دا انه عنده موهبة التسويق.

التسويق مهارة مكتسبة!

لما يكون الشخص معندوش موهبة التسويق فهو بيقدر يكتسبها عن طريق انه ياخد كورسات او يحضر سيشنز او يتعلم فن

التسويق وازاى يدرس متطلبات السوق ويشوف خطط المنافسين وازاى بينفذوها، ويدرس الاستراتيجيات التسويقه بتاعت الشركات الكبيرة

والمتطورة جدا فى المجال دا لحد مايكون عنده الأبيلتى انه يسوق المنتج بأكتر طريقه بروفيشينال تحققله التارجت المناسب من الأرباح.

وبكدا احنا نقدر ان الماركيتينج مش موهبة بس ولا مهارة مكتسبة بس، “الماركيتينج بيتضمن الاتنين”

الفرق بين التسويق والمبيعات

يعنى ايه تسويق؟

التسويق دا عملية بتبدأ من التصور والتخطيط للمنتج والخدمة اللى بنقدمها وبتنفيذ التصور اللى احنا تخيلناه عن المنتج

ونعمل تسعيره للمنتج ونوزعها ونحطها ف المكان المناسب، ونعملها تسويق وترويج بكل الأساليب الممكنه عندنا.

وبكدا احنا بنحقق الهدف الأساسى من التسويق وهو اننا نحصل على أرباح ونسبة مبيعات كويسة.

عشان كدا التسويق مش مجرد خطط بسيطه بيعملها مديريين التسويق.

التسويق بيقوم على التحليل

  • تحليل السوق او تحليل احتياجات العميل اللى قدامك، الاحتياجات اللى انت بتخدمها بعدين فى المنتج او الخدمة اللى هتقدمهاله، وبتعمل استراتيجية تسويقية ذكية.
  • وبتعمل تحليل لسلوكيات العميل ورغباته والحجات اللى بيفضلها والحجات اللى مش بيفضلها وانك تجمع بيانات تخص العميل اللى بتستهدفه.
  • وانك تدرس السوق كويس وبتدرس حجمه وظروفه الخاصه وأهم حاجه لازم تاخد بالك منها هما المنافسين اللى حواليك فى السوق.

احنا بنستخدم التحليل دا فى انتاج منتج كويس وبنعمل سعر مناسب وأهم حاجه اننا نختار المكان المناسب

اللى هنقدم فيه المنتج بتاعنا عشان مثلا:

مينفعش نبيع غسالة اطباق متطوره وغاليه فى منطقة ريفية؛ ومعروف انه من الصعب وصول المايه ليها.

أكيد فيه منتج هيتناسب مع الناس اللى عايشين فى المنطقه دى بس مش المنتج بتاعنا.

عشان كدا لازم نعمل استهداف كويس اوى فى المكان اللى هنعرض فيه المنتج بتاعنا.

وممكن نقول ان التسويق: هو مجموعة من العمليات والأنشطه اللى بنعملها عشان نفهم رغبة العميل ونعرف ازاى نطور المنتجات.

زى مثلا: لما تدخل مطعم بكون فيه ورقه فى المنيو لما بتخلص بيسألك ايه رأيك فى الخدمه اللى اتقدمت او

المنتج اللى اتعرض ليك، ايه الحجات اللى عجبتك فيه وايه الحجات اللى معجبتكش، هما بياخدوا الحجات دى وبيعدلوا من الأساليب بتاعته

عشان يفضلو على طول فى المقدمة، وتكون الخدمة اللى بيقدموها متاحة ومتطورة طول الوقت وميقفوش مكانهم.

بحيث انها تكون طول الوقت مناسبه لرغبة العميل واحتياجاته؛ وكمان تكون مناسبة للمنافسة اللى بتكون موجودة فى السوق وقتها.

ودا كله عشان تحقق المؤسسة الهدف بتاعها وهو تحقيق اكبر نسبة من الارباح.

الفرق بين التسويق والمبيعات

عملية التسويق مش مجرد فكرة مبيعات بس

التسويق ليه أبعاد كتيره وأهم بعد للتسويق هو البعد الاجتماعى أن التسويق وقتها بيكون الرابط الأساسى بين المجتمع

واحتياجات المجتمع، وبنشوف المجتمع وقتها محتاج ايه.

ف بنوفرله الحتياجات المادية والاقتصاديه بحيث اننا ف الأخر نرضى الرغبات كلها، وأهم حاجه اننا نستهدف

السوق زي ما عمل التجار فى الحضارات القديمة.

كانوا بيعملوا تسويق كويس جدا، بيجو فى أسواق معينه يبيعوا قماش غالى وراقى جدا فى مكان عارفين

ان الناس اللى عايشين فيه أغنياء وحالتهم المادية كويسه وبالتالى القماش الغالى دا هيناسبهم.

ويجو عند الفئه المتوسطه ماديا يبيعوا قماش يناسبهم ويناسب حالتهم الماديه وبكدا بيكونوا قدروا يستهدفوا السوق والعميل بصوره كويسه.

وطبعا زمان مكنش فيه مصطلع الماركيتينج بالشكل المتطور اللى نعرفه دلوقت بس كانوا مسوقين محترفين

وقدروا يعملوا اشباع كامل ويغطوا السوق واحتياجاته وقدروا يعرضوا المنتجات بتاعتهم بطريقه كويسه وجذابه جدا.

مثال عملى على الفرق بين التسويق والمبيعات والعمليات اللى بيتضمنها التسويق

نفترض ان فيه سيرك جاى المدينه يوم التلات، لو حطينا يافطه بتقول ان فيه سيرك التلات الجاى يبقى دا اعلان.

لو جيبنا فيل وحطينا عليه الاعلان وخليناه يمشى فى المدينه يبقى دا اسمه ترويج للحدث اللى هيحصل.

لو الفيل اتحرك فى المدينه والصحف والجرايد كتبت عنه يبقى دا معناه اننا عملنا دعاية.

ولو حد مشهور اتفاعل مع الموضوع واتكلم عنه وقال ان السيرك دا كويس وأبدى اعجابه بيه

ف دا اسمه علاقات عامة.

ولما تشرح مميزات السيرك وايه اللى بيفرقه عن اى سيرك تانى ف دا اسمه بيع.

ولما تاخد كل المصطلحات اللى فاتت دى كلها وتضربها فى الخلاط هيطلعلك مصطلح شامل اسمه التسويق.

الفرق بين التسويق والمبيعات

الفرق بين التسويق والمبيعات

  • التسويق دا عملة بنعملها قبل ما عملية الانتاج بتحصل، وبتكون مسئوله عن دراسة وتحليل السوق ومسئوله عن

التخطيط والتنظيم والأكيد واحنا بنسوق اننا نهتم بخدمة المستهلك وازاى نحافظ عليه لأطول فتره ممكنه.

وبتكون الخطة التسويقية على المدى الطويل.

  • المبيعات بتحصل بعد عملية الانتاج وبتكون مسئوله عن اقناع العميل بالمنتج وبتهتم كمان بمراكز البيع وهل تارجت الأرباح اتحقق ولالا.

وبتكون خطة المبيعات على المدى القصير نظرا لتغير السوق والاحتياجات اللى بيطلبها كل فتره.

ودلوقتى عزيزى القارئ هقولك على شويع كورسات جامده تنين على منصة كورسيرا وانت وشطارتك بقى خلصهم وشوف فى منصات تانيه زى يوديمى وادراك وفرصه.

كورسات مهمه فى مجال التسويق

Marketing Digital

Marketing con Redes Sociales

Brand Management: Aligning Business, Brand and Behaviour Free

The Strategy of Content Marketing Free

Social Media Marketing

وهتلاقى كل الكورسات دى هنا

كتبته /سهيلة أشرف العمروسى

اقرأ أيضا لنفس الكاتب

تعلم اللغة الانجليزية للمبتدئين من الصفر

أفضل موقع لتعلم اللغة الانجليزية للمبتدئين مجانا

كورس power English

كيف تواصل نجاحك