تحفيزي

ما هو التحفيز الذاتى Self-motivation

خلينا نعرف الاول ايه هو التحفيز عامة؟!

التحفيز هو القوة اللى بتدفعك انك تحقق حاجات معينة فى حياتك.

هو كده الشعله او اللمبة اللى بتضىء جواك.

هو اللى بيسببلك نوع من انواع الرضا و الشغف، مش عارف إزى بس اهو.

ادرينالين بيجيلك اما تسمع كلام حد معين بتقدره، او صديق او اى شخصية بتديك دفعة للامام

بتلهمك انك تعمل الكتير فى حياتك.

طيب.. هل فى انواع للتحفيز ده:

أينعم يا فندم

فى نوعين: تحفيز خارجى و ده اللى لسه متكلمه عنه فوق.

و فى النوع الداخلى، و ده اللى بيجيى من جواك انت. و ده من اهم و اقوى انواع التحفيز.

لان ببساطة قوتك جاية من جواك، من عقلك و من تشجعيك لنفسك و من حاجات كتير اوى.

افتكر كده معايا!

كام مرة سمعت لحد مشهور او انت معجب بيه، و لقيت جواك القوة و الشغف و الاصرار انك تعمل حاجات كتير اوى فى حياتك!!

و بعد كام يوم بيحصلك فتور! و مبقتش عارف تبدأ ازى و ليه اصلا!

فترجع تانى تدور على نفس الشخصية تسمعلها تانى و تقتنع بكلامها و تبقى خلاص هتقوم دلوقت تهد الجبال!!

و بعدها يحصل نفس الموضوع.

طبعا الكلام مش معمم. بتكلم على اغلب الحالات اللى قابلتنى و اللى انا شخصيا كنت منهم.

طيب لو كل الحماس و الشغف ده و اللمض اللى بتضىء جواك دى كانت نابعه منك انت، من تفكيرك ،من تشجعيك و من الهامك انت!! اكيد انت الكسبان و بكتير.

طيب دلوقت بقى نتكلم عن اكتر سؤال متداول!

إزى اطور و انمّى تحفيزى الذاتى. ازى اشجع نفسى بنفسى و كل الادرينالين ده يبقى جاى من جوه و مش من بره.

هقولك:

1- افرح بأى انجاز حتى لو بسيط فى حياتك

اى انتصارات او حاجات حققتها حتى لو صغيرة، قّدرها و افرح بيها و احتفل بيها كمان. ده مهم جدا انه بيشجعك و بيقوى من ثقتك فى نفسك و بيعلى من صورتك امام نفسك.

2- متتكلمش عن خططك و اهدافك امام الناس.

خطأ كتير منا بيقع فيه! هو اننا بنحب نرغى عن احلامنا و طموحتنا لاى حد و لكل الناس!

و ده مش صح! لييييييه! لان اغلب اللى بنحلم بيه و اللى بنسعى ليه كتير من الناس مش بتؤمن بيه! و بيحاربوك و بيتريقوا عليك.

و طبعا ده له تأثير سىء جدا عليك و بتحبط و بتتضايق.

أحسن حاجة تملها انك تهتم بالنتائج. اتكلم عن نتائج سعيك و نجاحك مش عن لسه خطوات فى علم الغيب.

و تتكلم ليه!! نفس الناس اللى كانوا بيتريقوا عليك، هيجيوا هما يكلموك و يكتبوا فيك اشعار عن نجاحك الساحق ان شاء الله.

3- بلاش تقارن نفسك بحد.

المقارنة دى نفسها بتقلل منك و من قدراتك و بتحبطك. مينفعش تقارن نفسك بواحد ناحج جدا! لان نجاحة ده مكنش بين يوم و ليلة! ده تعب سنيين و معافرة و ارهاق و فشل و فشل و فشل قبل كل اللى انت شايفة ده.

هتقارن بينك و بينه مش هتبقى فى صالحك.

خليك زى ما انت.. اما تيجى تبص لحد. بص عليه كمصدر الهام مش منافسة و مقارنة بينك و بينه.

ديما حاول تغير طريقة تفكيرك

4- ساعد الناس

مش متخيل اما تساعد الناس هتلاقى نفسك فرحان و مبسوط ازى، هتكبر فى نظر نفسك اوى.

مساعدة الناس فضيلة. و انك تساعد الناس فطبيعى ان رب الناس يساعدك و يكرمك و يوفقك فى كل حاجة فى حياتك.

5- احترم نفسك

“متفهمنيش غلط”

قّدرنفسك و حبها. ابعد عن اى حاجة او اى حد يقلل منها. انت مفيش زيك.

احترام النفس واجب و ضرورى. خلى ده فى بالك.

و ده اللى بخليك تحترم قراراك و تقدره و تمشى وراه بمنتهى الاقتناع.

6- اعمل اللى بتحبه

للاسف المشكلة اللى بتقابل معظمنا، اننا بنضطر نعمل حاجات مش بنحبها و لا مقتنعين بيها.

فدة بيخلينا نشعر بالفتور و الرتابة و الملل من الحياة.

عارفة و مدركة كويس جدا ان الحياة و متطلباتها بتجبرنا نعمل حاجات مش بنحبها، بس ايه المشكلة اما نحاول نغير التفكير.

بمعنى اوضح: يا تّدور على حاجة بتحبها و تعملها!

يا تحب اللى انت بتعمله، او تّدور على طريقة تحّسن من مشاعرك للحاجة اللى انت بتعملها.

فى حل تالت: دّور على هواية او حاجة تعملها بتحبها بجانب الشىء اللى بتعمله و مش بتحبه!

من الاخر إعمل توازن.

ده هيديك الطاقة و القدرة على تحّمل بعض المشاعرالفاترة و اللى بعدها هتروح بمنتهى الشغف تعمل اللى تحبه.

جرب و شوف و عرفنا.

7- قّسم اهدافك الكبيرة على مراحل

اول ما بتيجى تحط هدف معين علشان تحققه بتلاقى ان الموضوع كبير كبير كبير و محتاج عمر و جهد و نضال متواصل علشان تحقق اغلى و اسمى و اكبر هدف فى حياتك!

طيب ما تقسم الهدف الكبير ده لمهام صغيرة و قصيرة و كلها بتصب فى نفس محتوى الهدف بتاعك.

انا عاوز ابقى اهم و اشهر لاعب كرة قدم!

ده محتاج ايه؟ جهد ووقت طيب و ايه كمان! طيب هتقسم الهدف ده ازى؟

انا عاوز ابقى اكبر و اهم مهندس او دكتور!

او عاوزة ابقى انجح مدربة على الصعيد الدولى!

مش هتعرف تحقق هدف كبير مرة واحدة. قّسمه لشوية خطوات و حقق كل خطوة فى وقت معين و افرح بإنجازك و شوف اللى بعده.

ده هيحفزك تدور على اللى بعده و تشوف هدف تانى بردة يمكن قياسة و يكون واقعى و تبدأ تسعى من اجلة.

مقالات ذات صلة

زر الذهاب إلى الأعلى
إغلاق
إغلاق