ملخصات كتب

كتاب الذكاء الاجتماعي دانييل جولمان مترجم

بعتبر الذكاء الإجتماعي واحد من أهم أركان أي شخصية ناجة و بيتقبلها معظم فئات المجتمع. بس للآسف في ناس كتير مفتقدة الذكاء الإجتماعي و ده بيخليهم سعات شخصيات منبوذة و لا حبذا التعامل معاهم، رغم انهم ناس طيبة و كويسة جداً.
بس انعدام الذكاء الإجتماعي من عندهم هو السبب إن الناس كلها تزعل وتنفر منهم، و هما بيبقوا مستغربين أوي!

مثال على الذكاء الإجتماعي هو الكلام مع الناس الي حوالينا. امتى نتكلم و في ايه؟ اختيار الكلمات الي المفروض تتقال، هل ده وقت مناسب تفتح موضوع نقاش معين؟ و لا أصلاً ماتتكلمش فيه عشان مايخصكش؟! امتى تعاتب و امتى تلتزم الصمت، امتى تهزر و امتى لا، و هزار عن ايه و شكله ايه؟ و في حجات مينفعش تتكلم فيها مع الي قدامك إلا لو مثلاً قريبين جداً من بعض، فمن الذكاء انك تعرف مين الي أقدر اتكلم معاه في نقاط معينة و مين لا. امتى تحكي مشاكلك و همومك للقدامك، يا ترى هو مستعد انه يتقبل ده دلوقتي؟ في ناس حقيقي كل ما تشوفها بيحكولك عن مشكلة و هم و غم، طيب عمركوا سألتوا نفسكوا يا ترى الي قدامي ينفع اتكلم معاه في كده و لا لأ؟ الإنتقادات. مش كل تعليق سلبي هتعلقه على شماعة “الإنتقاد”. انتقادك للقدامك ليه قواعد و المفروض انه يكون بنّاء.المكلمات و الرسايل النصية، هل يا ترى الشخص ده دلوقتي وقت مناسب اني اكلمه فيه؟ ليه في ناس ممكن تلاقيها رنة عليك ٤٠ مكلمة فائتة؟ :”) كده مش هيرد أسرع و الله انت كده هتنفره منك. الرسايل برضو مش كل الناس ماسكة تليفوناتها ٢٤ ساعة، حتى لو شافوها، أكيد في حاجة أهم تشغل وقتهم مش لازم نسبلهم انبوكس في ١٠٠ رسالة من؛ “؟؟؟!”. امتى تنده لواحد من وسط حاجة مهمة بيعملها عشان تتكلم معاه و امتى لأ، اكيد لو الحاجة الي بيعملها اهم من موضوعك، فهيحرجك.
و طبعاً حجات تانية كتير جداً مش هعرف أحصرها في بوست واحد بس لازم نتعامل بذكاء مع الي حاولينا، لان غير كده فانت بتتحول لمصدر ضغط نفسي غير مريح على الي قدامك
ولو مش مُلزمين إنهم يعرفوك هتبقى سبب إن الناس تبعد عنك أو تتجاهلك عشان تتجنب الضغط ده. فخليكوا خُفاف في تعاملكم مع المجتمع، هتلاقوا و الله راحة نفسية ليكوا و للناس. في كتاب بحترم أفكاره جداً عن الذكاء الإجتماعي؛

(Social Intelligence by Daniel Goleman)

لو حد حابب يقرأه، حقيقي هيستفيد جداً و هيخليه يشتغل على النقاط الضعيفة عنده في موضوع الذكاء الإجتماعي ده.

تلخيص بواسطة | ريم عاطف

تحميل الكتاب

مقالات ذات صلة

زر الذهاب إلى الأعلى
إغلاق
إغلاق